LES 09
Oracion Por Yuda Bo Hala Cerca Dios
Bo a yega di sinti cu bo mester di guia den bo bida? Bo tin pregunta importante cu bo kier haya contesta p’e? Bo mester di consuelo of animacion? Bo tin gana di tin un amistad mas pega cu Jehova? Oracion por yuda bo cu tur e cosnan ey. Pero con bo mester haci oracion? Dios ta scucha tur oracion? Con bo por haci sigur cu Dios ta scucha bo oracionnan? Laga nos ban wak kico ta contesta pa e preguntanan ey.
1. Na ken nos mester haci oracion y tocante kico nos por haci oracion?
Hesus a siña nos pa haci oracion solamente na nos Tata den cielo. Hesus mes a haci oracion na Jehova. El a bisa: “Pues, boso mester haci oracion asin’aki: ‘Nos Tata cu ta den cielo ...’” (Mateo 6:9) Ora nos ta haci oracion na Jehova, nos ta haci nos amistad cu ne mas mihor.
Nos por haci oracion tocante casi tur cos. Sinembargo, Dios ta contesta solamente e oracionnan cu ta di acuerdo cu su boluntad. Bijbel ta bisa: “Kico cu nos [pidi Dios] cu ta di acuerdo cu su boluntad, e ta tende nos.” (1 Juan 5:14) Hesus a duna ehempel di algun cos cu nos por pidi den oracion. (Lesa Mateo 6:9-13.) Pues, nos por papia cu Dios tocante nos mes asuntonan. Pero ta bon tambe pa nos corda yama Dios danki pa loke el a haci pa nos y pidie pa yuda otro hende.
2. Con nos mester haci oracion?
Bijbel ta anima nos pa “drama [of, desahoga nos] curason [Dios] su dilanti.” (Salmo 62:8) Pues, nos oracionnan mester ta sincero y di curason. Bo por haci oracion na bos halto of den bo mes. Ademas, bo por haci oracion den cualkier posicion cu ta mustra respet pa Jehova. Nos por haci oracion na cualkier momento y na cualkier luga.
3. Con Dios ta contesta nos oracionnan?
Dios ta contesta nos oracionnan na diferente manera. Jehova a duna nos Bijbel y mayoria di biaha nos ta haya contesta pa nos preguntanan den Bijbel. Ora nos ta lesa Dios su Palabra, esey por “haci [nos] ... bira sabi.” (Salmo 19:7; lesa Santiago 1:5.) Un otro manera cu Jehova ta contesta nos oracionnan ta door di duna nos paz mental ora nos ta pasa den dificultad. Ademas, e por motiva su sirbidornan pa yuda nos ora nos tin mester di yudansa.
KICO MAS NOS POR SIÑA?
Laga nos wak con bo por haci oracion cu ta agrada Dios y wak con oracion por yuda bo den bo bida.
4. Kico nos mester haci pa Dios scucha nos oracionnan?
Kico ta haci nos oracionnan aceptabel pa Dios? Pasa e VIDEO.
Jehova kier pa nos haci oracion na dje. Lesa Salmo 65:2. Despues, analisa e siguiente preguntanan:
Bo ta kere cu Dios, kende ta “scucha oracion”, kier pa abo resa na dje? Dicon bo ta pensa esey?
Pa Dios por scucha nos oracionnan, nos mester biba na un manera cu ta agrad’e. Lesa Mikeas 3:4 y 1 Pedro 3:12. Despues, analisa e siguiente pregunta:
Kico nos mester haci pa nos tin sigur cu Jehova ta scucha nos oracionnan?
Durante guera, soldaat di tur dos ehercito ta pidi Dios pa yuda nan gana e bataya. Ta logico pa spera cu Dios lo contesta nan oracion?
5. Ora nos ta haci oracion, ta bon pa nos bisa Jehova tur loke nos ta sinti
Algun hende a ser siña pa ripiti e mesun palabranan den nan oracionnan. Pero, ta asina Dios kier pa nos haci oracion? Lesa Mateo 6:7. Despues, analisa e siguiente pregunta:
Con bo por evita di “ripiti e mesun palabranan” ora di haci oracion?
Tur dia, pensa riba algo specifico cu bo por gradici Jehova p’e. Ora bo haci esey tur dia pa un siman largo, lo bo a haci oracion tocante shete diferente topico sin cu bo a ripiti e mesun palabranan.
Mescos cu un tata kier pa su yiu bis’e tur loke e ta sinti, asina tambe Jehova kier pa nos expresa nos sintimentonan na dje den oracion
6. Oracion ta un regalo di Dios
Con oracion por yuda nos, specialmente ora nos ta pasando den tempo dificil? Pasa e VIDEO.
Bijbel ta bisa cu oracion por yuda nos sinti nos trankil. Lesa Filipensenan 4:6, 7. Despues, analisa e siguiente preguntanan:
Aunke oracion no ta resolve tur nos problemanan, con oracion ta yuda nos?
Tocante kico abo kier papia cu Jehova den oracion?
Bo tabata sa?
E palabra “amen” ta nifica “sea asina” of “berdad.” For di den tempo biblico, hende tabata caba nan oracionnan cu “amen.”—1 Cronicanan 16:36.
7. Traha tempo pa bo haci oracion
Tin biaha, nos ta asina ocupa cu nos ta lubida di haci oracion. Con importante oracion tabata pa Hesus? Lesa Mateo 14:23 y Marco 1:35. Despues, analisa e siguiente preguntanan:
Con Hesus a traha tempo pa haci oracion?
Ki ora abo por traha tempo pa bo haci oracion?
LOKE HENDE SA BISA: “Oracion no ta yuda cu nada. Dios no ta contesta mi oracionnan toch.”
Kico bo por bisa un hende cu bisa bo esey?
RESUMEN
Ora nos ta haci oracion di curason, nos lo tin un amistad mas pega cu Dios, nos lo tin paz mental y nos lo tin e forsa pa haci loke ta agrada Jehova.
Repaso
Na ken nos mester haci oracion?
Con nos mester haci oracion?
Con oracion por yuda nos?
MAS INFORMACION INTERESANTE
Wak contesta pa pregunta cu hopi hende sa haci tocante oracion.
“Shete Cos Cu Bo Mester Sa Tocante Oracion” (E Toren di Vigilansia di 1 di october 2010)
Wak dicon ta importante pa haci oracion y con bo por mehora bo oracionnan.
Wak na ken Bijbel ta bisa cu nos tin cu haci oracion.
Wak e video musical aki y tuma nota si nos mester haci oracion na un luga of ora specifico.