LES 28
Mustra Aprecio pa Loke Jehova y Hesus A Haci pa Bo
Con bo ta sinti bo ora un amigo duna bo un bunita regalo? Probablemente, lo bo ta masha contento y lo bo tin gana di mustra bo amigo cu bo ta aprecia su regalo. Jehova y Hesus a duna nos e mihor regalo cu hende por haya: e rescate. Con nos por mustra aprecio pa e regalo ey?
1. Con ta un manera cu nos por mustra aprecio pa loke Dios y Cristo a haci pa nos?
Bijbel ta priminti cu “tur cu pone fe den [Hesus]” lo por biba pa semper. (Juan 3:16) Kico kiermen pone fe den Hesus? Esey kiermen cu nos mester haci mas cu djis kere den Hesus. E decisionnan cu nos ta tuma y e cosnan cu nos ta haci mester demostra cu nos tin fe den Hesus. (Santiago 2:17) Ora nos ta demostra nos fe pa medio di loke nos ta bisa y haci, nos ta fortalece nos amistad cu Hesus y su Tata, Jehova.—Lesa Juan 14:21.
2. Ki ocasion special ta duna nos oportunidad pa mustra aprecio pa loke Jehova y Hesus a haci?
E anochi prome cu Hesus a muri, el a bisa su siguidornan cu tabatin un otro manera mas cu nan por mustra aprecio pa su sacrificio. El a bisa nan pa bin hunto pa un ocasion special cu Bijbel ta yama “e Cena di Señor”, cu ta conoci tambe como Conmemoracion di e morto di Cristo, of Memorial. (1 Corintionan 11:20) Hesus tabata kier pa su apostelnan, y tur cristian berdadero despues di nan, corda cu el a duna su bida pa nos. Pues, el a bisa nan: “Sigui haci esaki na mi memoria [of, pa corda riba mi].” (Lucas 22:19) Ora bo asisti na Memorial, bo ta mustra aprecio pa e amor cu Jehova y Hesus tin pa nos.
KICO MAS NOS POR SIÑA?
Wak den ki manera mas bo por mustra aprecio pa e amor cu Jehova y Hesus a mustra na nos. Ademas, wak dicon Conmemoracion di e morto di Cristo ta asina importante.
3. Kico nos por haci pa mustra cu nos ta agradecido?
Imagina si un hende a salba bo bida. Lo bo djis lubida loke e persona a haci pa bo? Of lo bo busca manera pa mustr’e cu bo ta aprecia loke el a haci pa bo?
Danki na Jehova, nos tin e oportunidad pa biba pa semper. Lesa 1 Juan 4:8-10. Despues, analisa e siguiente preguntanan:
Dicon Hesus su sacrificio ta un regalo special?
Con bo ta sinti bo ora bo pensa riba loke Jehova y Hesus a haci pa bo?
Con nos por mustra aprecio pa loke Jehova y Hesus a haci pa nos? Lesa 2 Corintionan 5:15 y 1 Juan 4:11; 5:3. Despues di lesa cada texto, analisa e siguiente pregunta:
Di acuerdo cu e textonan ey, con nos por mustra cu nos ta agradecido?
4. Imita Hesus
Un otro manera pa mustra nos aprecio ta door di imita Hesus. Lesa 1 Pedro 2:21. Despues, analisa e siguiente pregunta:
Kico bo tin cu haci pa sigui Hesus su pasonan fielmente?
Hesus a stima e Palabra di Dios, a predica e bon noticia y a yuda otro hende
5. Asisti na Conmemoracion di e morto di Cristo
Pa haya sa loke a tuma luga na e prome Cena di Señor, lesa Lucas 22:14, 19 y 20. Despues, analisa e siguiente preguntanan:
Kico a tuma luga na e prome Cena di Señor?
Kico e pan y e biña ta representa?—Wak versiculo 19 y 20.
Hesus tabata kier pa su discipelnan conmemora su morto un biaha pa aña, riba e fecha cu el a muri. Pues, testigonan di Jehova ta reuni tur aña pa conmemora e morto di Cristo na e manera cu el a siña su discipelnan pa haci esey. Pa haya sa tocante e ocasion special aki, pasa e VIDEO. Despues, analisa e siguiente pregunta:
Kico bo por spera ora bo asisti na Conmemoracion di e morto di Hesus?
Kico e pan y e biña ta representa? E pan ta representa Hesus su curpa humano perfecto cu el a sacrifica pa nos. E biña ta representa su sanger
LOKE HENDE SA BISA: “E unico cos cu bo tin cu haci pa ser salba ta acepta Cristo den bo curason.”
Con bo por uza Juan 3:16 y Santiago 2:17 pa mustra un persona cu bo tin cu haci mas cu esey?
RESUMEN
Nos ta mustra aprecio pa loke Hesus a haci pa nos ora nos ta pone fe den dje y ta asisti na Conmemoracion di su morto.
Repaso
Kico kiermen pone fe den Hesus?
Abo kier mustra aprecio pa loke Jehova y Hesus a haci pa bo? Con bo por haci esey?
Dicon ta asina importante pa asisti na Conmemoracion di e morto di Cristo?
MAS INFORMACION INTERESANTE
Kico morto di Cristo ta motiva nos pa haci?
Haya sa mas tocante fe y siña con bo por demostra cu bo tin fe.
“Pone Fe den e Promesanan di Jehova” (E Toren di Vigilansia di october 2016)
Lesa e relato “Awor Mi Ta Disfruta di Bida y Ta Sinti Mi na Paz” pa wak con un señora su bida a cambia ora el a haya sa con valioso e sacrificio di Hesus ta.
“Bijbel Ta Cambia Bida di Hende” (La Atalaya di 1 di augustus 2011)
Wak ta dicon un par di hende so ta come di e pan y bebe di e biña na Conmemoracion.