LES 19
Testigonan di Jehova Ta Cristian Berdadero?
Como testigonan di Jehova, nos ta kere cu nos ta cristian berdadero. Dicon nos ta kere esey? Laga nos analisa e siguiente puntonan: Riba kico nos ta basa nos creencianan? Dicon nos ta yama nos mes testigonan di Jehova? Con nos ta demostra cu nos ta stima otro?
1. Riba kico testigonan di Jehova ta basa nan creencianan?
Hesus a bisa: “[Dios su] palabra ta e berdad.” (Juan 17:17) Mescos cu Hesus, semper testigonan di Jehova a basa nan siñansanan riba Dios su Palabra. Laga nos wak historia di testigonan di Jehova, kendenan un tempo tabata conoci como studiante di Bijbel. Rond di aña 1870, un grupo di studiante di Bijbel a cuminsa analisa Bijbel hunto pa haya sa kico Bijbel ta siña realmente. Nan a basa nan creencianan riba Bijbel hasta ora nan creencianan no tabata na harmonia cu loke e iglesianan tabata siña hende. Despues, nan a cuminsa papia cu otro hende tocante e berdadnan di Bijbel cu nan a siña.a
2. Dicon nos ta yama nos mes testigonan di Jehova?
Jehova ta yama su sirbidornan su testigonan pasobra nan ta papia e berdad tocante dje. (Hebreonan 11:4–12:1) Por ehempel, den tempo biblico, Dios a bisa su pueblo: “Boso ta mi testigonan.” (Lesa Isaias 43:10.) Bijbel ta yama Hesus: “E Testigo Fiel.” (Revelacion 1:5) Pues, na aña 1931 nos a scoge e nomber testigonan di Jehova. Esta un honor pa carga e nomber aki!
3. Con testigonan di Jehova ta mustra amor mescos cu Hesus?
Hesus tabata stima su discipelnan masha hopi mes. Nan tabata manera famia p’e. (Lesa Marco 3:35.) Di mes manera, testigonan di Jehova ta un famia mundial y uni. Ta pesey, nos ta yama otro ruman. (Filemon 1, 2) Ademas, nos ta cumpli cu e siguiente mandato: “Stima henter e hermandad.” (1 Pedro 2:17) Testigonan di Jehova ta mustra amor na otro na varios manera. Por ehempel, nos ta yuda nos rumannan na tur parti di mundo cu ta pasa den dificultad.
KICO MAS NOS POR SIÑA?
Laga nos siña mas tocante e historia di testigonan di Jehova y wak mas prueba cu ta mustra cu di berdad nos ta cristian berdadero.
Cristian berdadero ta basa nan siñansanan riba Bijbel y ta papia cu otro hende tocante loke nan ta siña for di Bijbel
4. Nos ta basa nos creencianan riba Bijbel
Jehova a profetisa cu den tempo di fin hende lo haya mihor comprondemento di e berdadnan di Bijbel. Lesa Daniel 12:4. Despues, analisa e siguiente pregunta:
Kico “lo aumenta” den e pueblo di Dios segun cu nan ta analisa loke Bijbel ta bisa?
Wak con Charles Russell hunto cu algun otro studiante di Bijbel a cuminsa studia Bijbel. Pasa e VIDEO. Despues, analisa e siguiente pregunta:
Den e video, con Charles Russell y e otro studiantenan di Bijbel tabata studia Bijbel?
Bo tabata sa?
Tin biaha, nos ta ahusta e manera cu nos ta compronde cierto berdad di Bijbel. Dicon nos ta haci esey? Wel, mescos cu ora solo ta sali nos por mira cierto detaye di un paisahe mas mihor, asina Dios ta laga nos compronde e berdadnan di Bijbel pocopoco mas mihor. (Lesa Proverbionan 4:18.) Pues, aunke Bijbel no ta cambia, nos ta ahusta nos creencianan segun cu nos ta haya mihor comprondemento di e berdadnan cu tin den Bijbel.
5. Nos ta predica e berdad tocante Jehova
Dicon nos ta yama nos mes testigonan di Jehova? Pasa e VIDEO. Despues, analisa e siguiente pregunta:
Dicon e nomber testigonan di Jehova ta un nomber adecuado pa nos?
Dicon Jehova a scoge hende pa nan por ta su testigonan? Pasobra tin hopi mentira tocante Dios, y su testigonan lo conta otro hende e berdad tocante Jehova, e Dios berdadero. Laga nos trata djis dos di e mentiranan ey.
Algun iglesia ta siña nan miembronan cu Dios kier pa nan uza imagen pa ador’e. Pero esey ta berdad? Lesa Levitico 26:1. Despues, analisa e siguiente preguntanan:
Segun Bijbel, kico Jehova ta pensa tocante uzo di imagen?
Algun iglesia ta siña nan miembronan cu Hesus ta Dios. Pero esey ta berdad? Lesa Juan 20:17. Despues, analisa e siguiente preguntanan:
Segun Bijbel, ta berdad cu Dios y Hesus ta e mesun persona?
Con bo ta sinti bo awor cu bo a haya sa e berdad tocante Jehova y su Yiu? Con bo ta haya e echo cu Jehova a manda su Testigonan pa conta otro hende e berdad ey? Abo tambe lo tin gana di siña hende e berdad ey?
6. Nos ta mustra amor na otro
Bijbel ta compara e cristiannan cu diferente parti di un curpa humano. Lesa 1 Corintionan 12:25, 26. Despues, analisa e siguiente preguntanan:
Kico cristian berdadero mester haci ora otro cristian ta pasa den dificultad?
Kico bo a mira entre testigonan di Jehova cu ta mustra cu nan tin amor pa otro?
Ora testigonan di Jehova na cierto parti di mundo ta pasa den dificultad, testigonan di Jehova di tur parti di mundo ta purba di yuda nan mesora. Pa wak un ehempel di esaki, pasa e VIDEO. Despues, analisa e siguiente pregunta:
Con testigonan di Jehova a mustra amor na nan rumannan despues di un horcan?
Cristian berdadero ta mustra amor y ta yuda hende
LOKE HENDE SA BISA: “Testigonan di Jehova ta djis un otro religion mas.”
For di ki tempo Jehova ta yama su sirbidornan su testigonan?
RESUMEN
Testigonan di Jehova ta cristian berdadero. Nos ta un famia mundial cu ta sirbi Jehova. Nos ta basa nos creencianan riba Bijbel y ta siña otro hende e berdad tocante Jehova.
Repaso
Dicon nos a scoge e nomber testigonan di Jehova?
Con nos ta mustra amor na otro?
Bo ta kere cu testigonan di Jehova ta cristian berdadero?
MAS INFORMACION INTERESANTE
Haya sa mas tocante e historia di testigonan di Jehova.
Los testigos de Jehová: una historia de fe viva. Parte 1: Salen de la oscuridad (1:00:53)
Wak ehempel di un siñansa falso cu testigonan di Jehova a saca na cla.
Haya contesta pa algun pregunta cu bo por tin tocante testigonan di Jehova.
“Pregunta Cu Hopi Hende Sa Haci Tocante Testigonan di Jehova” (seccion riba jw.org)
Un homber cu yama Stephen tabata odia hende di otro rasa y tabata trata nan na un manera violento. Wak kico a motiv’e pa cambia.
“Mi Bida Tabata Bay di Malo pa Pio” (E Toren di Vigilancia di 1 di juli 2015)
a Desde aña 1879, e pueblo di Jehova ta publica e revista E Toren di Vigilancia pa splica e berdadnan cu tin den Bijbel.