LES 21
Con e Bon Noticia Ta Ser Predica?
Pronto Dios lo caba cu tur nos problemanan mediante su Reino. E noticia ey ta asina bon cu tur hende mester tend’e. Hesus tabata kier pa su siguidornan conta tur hende e mensahe aki. (Mateo 28:19, 20) Con testigonan di Jehova ta cumpli cu e mandamento ey di Hesus?
1. Con Mateo 24:14 ta cumpliendo den nos tempo?
Hesus a bisa: “E bon noticia aki di e Reino lo ser predica den henter e Tera habita.” (Mateo 24:14) Testigonan di Jehova ta gusta participa den e trabou importante aki! Nos ta predica e bon noticia rond mundo na mas cu 1.000 idioma. E trabou inmenso aki ta rekeri hopi esfuerso y organisacion. Nos lo no por haci e trabou aki sin Jehova su yudansa.
2. Kico nos ta haci pa logra predica na hende?
Nos ta predica tur caminda cu nos por haya hende. Mescos cu e cristiannan di prome siglo, nos ta predica “di cas pa cas.” (Echonan 5:42) E manera di predica aki ta duna hopi bon resultado y ta permiti nos papia cu miyones di hende tur aña. Debi cu no ta semper nos ta haya hende na cas, nos ta predica na hopi luga publico tambe. Semper nos ta busca oportunidad pa conta otro hende tocante Jehova y su proposito.
3. Ken mester predica e bon noticia?
Tur cristian berdadero mester predica e bon noticia. Nos ta tuma e responsabilidad di predica na serio. Nos ta predica mas tanto posibel pasobra nos sa cu esey ta salba bida di hende. (Lesa 1 Timoteo 4:16.) Niun hende no ta paga nos pa haci e trabou aki, pasobra Bijbel ta bisa: “Boso a ricibi pornada, duna pornada.” (Mateo 10:7, 8) No ta tur hende ta scucha nos mensahe. Pero, nos ta sigui predica pasobra e ta parti di nos adoracion na Jehova y esaki ta haci Jehova feliz.
KICO MAS NOS POR SIÑA?
Haya sa mas tocante e esfuerso cu nos como testigonan di Jehova ta haci pa predica rond mundo y mira con Jehova ta yuda nos haci esey.
Predicando rond mundo: (A) Costa Rica, (B) Merca, (C) Benin, (D) Tailandia, (E) Yap, (F) Suecia
4. Nos ta haci esfuerso pa predica na tur hende
Testigonan di Jehova ta haci hopi esfuerso pa predica e bon noticia unda cu nan topa hende. Pasa e VIDEO. Despues, analisa e siguiente pregunta:
Kico ta impresiona bo di e esfuerso cu testigonan di Jehova ta haci pa predica?
Lesa Mateo 22:39 y Romanonan 10:13-15. Despues, analisa e siguiente preguntanan:
Con e trabou di predica cu nos ta haci ta mustra cu nos ta stima hende?
Kico Jehova ta pensa di hende cu ta predica e bon noticia?—Wak versiculo 15.
5. Nos ta compañero di trabou di Dios
Tin hopi experencia cu ta mustra cu Jehova ta dirigi nos trabou di predica. Ban wak loke a sosode na Nueva Zelandia. Un atardi, un testigo di Jehova cu yama Paul tabata predica di cas pa cas y a topa cu un señora. E mainta ey, e señora a haci oracion na Dios mencionando Dios su nomber, Jehova, y el a pidi pa un hende bishit’e y siñ’e tocante Dios. Paul a bisa: “Tres ora despues, mi tabata na su porta.”
Lesa 1 Corintionan 3:9. Despues, analisa e siguiente pregunta:
Con experencia manera esun na Nueva Zelandia ta mustra cu Jehova ta dirigi e trabou di predica?
Lesa Echonan 1:8. Despues, analisa e siguiente pregunta:
Dicon nos tin mester di Jehova su yudansa pa cumpli cu nos trabou di predica?
Bo tabata sa?
Tur siman, na nos reunion den siman, nos ta haya entrenamento pa yuda nos predica. Si bo a asisti na un di e reunionnan aki, con bo ta haya e entrenamento cu ta ser duna?
6. Nos ta obedece Dios su mandamento pa predica
Den prome siglo, e enemigonan di e siguidornan di Hesus a purba di stop nan di predica. E cristiannan di prome siglo a “defende e bon noticia y establece e derecho legal di predic’e.” (Filipensenan 1:7) Testigonan di Jehova ta haci mescos awe.a
Lesa Echonan 5:27-42. Despues, analisa e siguiente pregunta:
Dicon nos lo no stop di predica?—Wak versiculo 29, 38 y 39.
SI UN HENDE PUNTRA: “Dicon testigonan di Jehova ta bay di cas pa cas?”
Con lo bo contesta?
RESUMEN
Hesus a bisa su siguidornan pa predica e bon noticia na tur nacion. Jehova ta yudando su pueblo pa haci e trabou aki.
Repaso
Con e bon noticia ta ser predica rond mundo?
Con e trabou di predica cu nos ta haci ta mustra cu nos ta stima hende?
Bo ta kere cu e trabou di predica por haci nos feliz? Dicon bo ta pensa esey?
MAS INFORMACION INTERESANTE
Wak con testigonan di Jehova ta predica na hende den stad grandi.
Predikashon Públiko Spesial den Área Metropolitano na Paris (5:11)
Kico testigonan di Jehova ta haci pa yuda refugiado?
Wak con feliz bo por ta si bo dedica bo bida na e trabou di predica.
Wak con algun decision importante cu corte a tuma a yuda pa nos por a sigui predica.
“Predicadornan di Reino Ta Bay Corte” (E Reino di Dios Ya Ta Goberna, capitulo 13)
a Dios ta esun cu a duna nos e mandamento pa predica. Pues, testigonan di Jehova no mester di permit di gobierno humano pa predica e bon noticia.