LES 22
Con Bo Por Papia cu Otro Hende Tocante e Bon Noticia?
Segun cu bo ta siña e berdadnan cu tin den Bijbel, kisas bo ta pensa: Wauw, tur hende mester haya sa loke Bijbel ta siña! Anto bo tin rason: Tur hende mester haya sa e berdadnan aki. Pero, kisas bo tin miedo pa bisa otro hende loke bo ta siñando. Ban wak con bo por vence e miedo ey y cuminsa papia cu otro hende tocante e bon noticia.
1. Con bo por conta loke bo a siña na hende cu bo conoce?
Hesus su discipelnan a bisa: “[Nos] no por stop di papia tocante e cosnan cu nos a mira y tende.” (Echonan 4:20) Nan a stima e berdad asina tanto cu nan kier a cont’e na mas tanto hende posibel. Bo tambe ta sinti asina? Si esey ta e caso, busca oportunidad pa conta loke bo a siña na bo famia y amigonan na un manera respetuoso.—Lesa Colosensenan 4:6.
Algun cos cu bo por haci:
Ora cu bo ta papia cu un miembro di bo famia, lo bo por cuminsa papia cu ne tocante un topico di Bijbel door di bis’e: “Mi a siña algo interesante e siman aki.”
Uza un texto di Bijbel pa anima un amigo cu ta malo of cu ta preocupa.
Ora un colega di trabou puntra bo con a bay cu bo weekend, bo por cont’e loke bo a siña durante bo curso di Bijbel of na un reunion di congregacion.
Mustra bo amigonan e website jw.org.
Puntra otro hende pa join bo ora bo tin bo curso di Bijbel of mustra nan con nan por pidi pa un curso di Bijbel riba jw.org.
2. Dicon ta bale la pena pa bo pone meta pa predica hunto cu e congregacion?
E discipelnan di Hesus no a djis papia cu otro hende cu nan tabata conoce tocante e bon noticia. Hesus “a manda nan dos dos su dilanti na tur stad” pa predica. (Lucas 10:1) E manera organisa di predica ey a duna mas hende oportunidad pa scucha e bon noticia. Ademas, e discipelnan a haya goso ora nan a bay predica hunto. (Lucas 10:17) Abo tambe ta desea di pone meta pa predica hunto cu e congregacion?
KICO MAS NOS POR SIÑA?
Laga nos wak con bo por vence bo miedo y sinti e alegria di papia cu otro hende tocante e bon noticia.
3. Jehova lo ta cu bo
Algun hende cu kier predica tin miedo di loke hende lo pensa di nan y di e manera cu hende lo reacciona.
Abo tin miedo di conta otro hende loke bo a siña? Dicon si, of dicon no?
Pasa e VIDEO. Despues, analisa e siguiente pregunta:
Con e Testigonan hoben den e video a vence nan miedo?
Lesa Isaias 41:10. Despues, analisa e siguiente pregunta:
Dicon ta bon pa haci oracion ora bo tin miedo di predica?
Bo tabata sa?
Hopi testigo di Jehova a yega di pensa cu nunca nan lo por papia cu otro hende tocante e bon noticia. Por ehempel, Sergey no tabatin confianza den su mes, y tabata dificil pa e papia cu otro hende. Pero despues cu el a studia Bijbel, el a bisa: “A pesar cu mi tabatin miedo, mi a cuminsa papia cu otro hende di loke mi tabata siña. Pa mi sorpresa, mi a haya mas confianza segun cu mi tabata conta otro hende tocante Bijbel. Ademas, mi fe a bira mas fuerte.”
4. Mustra respet
Prome cu bo comparti e bon noticia cu otro hende, pensa kico bo ta bay bisa y con bo ta bay bis’e. Lesa 2 Timoteo 2:24 y 1 Pedro 3:15. Despues, analisa e siguiente preguntanan:
Con bo por aplica e textonan aki ora bo ta papia cu otro hende tocante Bijbel?
Kisas algun miembro di bo famia of amigo lo no ta di acuerdo cu bo. Kico bo por haci? Kico lo no ta sabi pa haci?
Dicon ta mihor pa haci pregunta cu tacto en bes di bisa hende loke nan tin cu kere?
5. Bo ta sinti bo feliz ora bo conta otro hende tocante e bon noticia
Jehova a duna Hesus e trabou di predica e bon noticia. Kico Hesus a pensa di e trabou ey? Lesa Juan 4:34. Despues, analisa e siguiente preguntanan:
Nos mester di cuminda pa nos biba. Cuminda ta haci nos feliz tambe. Dicon Hesus a bisa cu haci Dios su boluntad—incluso predica—ta manera cuminda p’e?
Den ki manera bo ta pensa cu e trabou di predica por haci bo feliz?
Algun sugerencia:
Durante e reunion den siman, tuma nota di diferente manera cu bo por cuminsa un combersacion.
Puntra e ruman cu ta duna bo curso di Bijbel kico bo tin cu haci pa bo por bira un studiante cu ta duna parti na e reunion den siman. E asignacionnan cu bo ta haya por duna bo mas confianza pa papia cu otro hende tocante loke bo ta siña.
E cuadronan “Loke Hende Sa Bisa” of “Si un Hende Puntra” den e publicacion aki por yuda bo practica con pa contesta pregunta cu hende por haci bo y con pa vence obhecion comun of con pa reacciona na loke nan sa bisa.
SI UN HENDE PUNTRA: “Kico bo tin di conta mi?”
Con bo por uza e oportunidad aki pa conta loke bo a siña durante bo curso di Bijbel?
RESUMEN
E trabou di predica e bon noticia lo haci bo feliz. Ademas, predica ta mas facil di loke bo ta pensa.
Repaso
Kico por motiva bo pa conta otro hende tocante e bon noticia?
Con bo por papia tocante e bon noticia na un manera respetuoso?
Con bo por vence bo miedo di predica?
MAS INFORMACION INTERESANTE
Wak cuater manera simpel pa uza e carchi di contacto di jw.org pa predica e bon noticia.
Haya sa di cuater cualidad cu por yuda bo papia cu otro hende tocante e bon noticia.
“Bo Ta Dispuesto pa Bira Piscador di Hende?” (E Toren di Vigilansia di september 2020)
Wak con un ehempel di Bijbel por duna nos curashi pa papia tocante e bon noticia cu otro hende hasta si nos ta hopi jong.
Wak con bo por papia tocante Bijbel cu miembro di bo famia cu ainda no conoce Jehova.