LES 39
Dios Su Punto di Bista Tocante Sanger
Sanger ta importante pasobra sin dje nos no por biba. Como cu Dios ta nos Creador, e tin derecho di bisa nos con pa uza sanger. Kico el a bisa tocante sanger? Nos mag come sanger of acepta transfusion di sanger? Con bo por tuma bon decision den e asunto aki?
1. Kico ta Jehova su punto di bista tocante sanger?
Den tempo di Bijbel, Jehova a bisa su sirbidornan: “Bida di un kriatura ta den su sanger.” (Levitico 17:14, BPK) Pues, pa Jehova, sanger ta representa bida. Como cu bida ta un regalo di Dios y ta algo sagrado of santo, sanger tambe ta sagrado.
2. Kico Dios a bisa tocante sanger?
Hopi tempo prome cu e congregacion cristian a ser forma, Jehova a duna su sirbidornan e mandamento pa no come sanger. (Lesa Genesis 9:4 y Levitico 17:10.) Anto ora e congregacion cristian a ser forma, Jehova a bolbe ripiti e mandamento ey. Cuerpo gobernante, esta, e grupo di apostel- y ancianonan cu tabata dirigi e congregacion den prome siglo, a duna e cristiannan e siguiente instruccion: “Sigui abstene ... di sanger.”—Lesa Echonan 15:28, 29.
Kico kiermen abstene di sanger? Pensa riba lo siguiente: Si un dokter bisa bo abstene di alcohol, lo bo no bebe alcohol. Pero lo bo por come cuminda cu tin alcohol den dje of inyecta alcohol den bo bena- of adernan? Claro cu no! Di mes manera, Dios su mandamento pa abstene di sanger ta nifica cu nos no mester come ni bebe sanger ni come carni di bestia cu hende no a laga sangra bon. Ademas, nos mester evita cualkier co’i come cu tin sanger den dje.
Awor kico di uzo medico di sanger? Tin algun tratamento medico cu claramente ta bay contra Dios su ley. E tratamentonan ey ta inclui transfusion di sanger completo of di cualkier un di su componentenan principal, esta, cel cora (globulo cora), cel blanco (globulo blanco), plaketa y plasma. Pero den caso di otro tratamento medico kisas no ta masha cla si nan ta bay contra Dios su leynan of no. Por ehempel, algun tratamento medico ta uza fraccion di un di e componentenan principal di sanger. Otro tratamento medico ta uza sanger di e persona mes. Ora ta trata di un di e opcionnan ey, cada persona tin cu tuma su mes decision.a—Galationan 6:5.
KICO MAS NOS POR SIÑA?
Laga nos wak kico nos tin cu tene cuenta cu ne ora di scoge tratamento medico.
3. Scoge tratamento medico cu ta agrada Jehova
Con bo por scoge un tratamento medico cu ta na harmonia cu Dios su punto di bista tocante sanger? Pasa e VIDEO. Despues, analisa dicon ta importante pa sigui e siguiente pasonan:
Pidi Dios pa sabiduria.—Santiago 1:5.
Busca principio di Bijbel y wak con bo por aplica nan den bo situacion.—Proverbionan 13:16.
Haya sa ki tratamento medico ta disponibel caminda bo ta biba.
Wak cua tratamento medico sigur lo bo no acepta.
Haci sigur cu bo decision ta laga bo keda cu un consenshi limpi.—Echonan 24:16.b
Corda cu ningun hende—ni bo casa, ni anciano ni e persona cu ta studia Bijbel cu bo—no tin mag di bisa bo kico pa haci ora ta trata di un asunto di consenshi.—Romanonan 14:12.
Skirbi riba papel ki decision bo a tuma pa asina otro hende por ta na altura di bo decision.
4. Testigonan di Jehova kier haya e mihor tratamento medico
Nos por obedece Dios su leynan tocante sanger y na mes momento haya bon tratamento medico cu no ta envolve sanger. Pasa e VIDEO.
Lesa Tito 3:2. Despues, analisa e siguiente pregunta:
Dicon semper nos mester ta respetuoso y calmo ora nos ta papia cu dokter?
Nos no ta acepta |
Decision personal |
|---|---|
A. Plasma di sanger |
Fraccion di plasma |
B. Cel blanco |
Fraccion di cel blanco |
C. Plaketa |
Fraccion di plaketa |
D. Cel cora |
Fraccion di cel cora |
5. Fraccion di sanger
Sanger tin cuater componente principal: cel cora, cel blanco, plaketa y plasma. Cada un di e componentenan aki ta consisti di varios particula mas chikito di sanger.c Algun fraccion di sanger ta ser uza den remedi pa yuda combati maleza of pa stop sangramento.
Ora ta trata di fraccion di sanger, cada cristian mester tuma su mes decision basa riba su consenshi cu ta biblicamente entrena. Algun cristian por dicidi cu nan no ta acepta un tratamento of procedura medico den cua ta uza fraccion di sanger. Otro cristian ta sinti cu nan consenshi si ta permiti nan acepta fraccion di sanger.
Ora bo tin cu tuma un decision, pensa riba e pregunta aki:
Con mi por splica mi dokter dicon mi ta acepta of rechasa cierto fraccion di sanger?
LOKE HENDE SA BISA: “No tin nada malo den duna sanger of acepta transfusion di sanger.”
Kico abo ta pensa?
RESUMEN
Jehova kier pa nos mira sanger como algo sagrado.
Repaso
Dicon sanger ta sagrado pa Jehova?
Con nos por sa cu Dios su mandamento pa abstene di sanger ta inclui transfusion di sanger?
Kico por yuda bo tuma bon decision tocante uzo medico di sanger?
MAS INFORMACION INTERESANTE
Riba kico bo mester pensa prome cu bo dicidi si bo ta acepta un procedura medico cu ta uza bo mes sanger?
“Pregunta di Lector” (E Toren di Vigilansia di 15 di october 2000)
Kico bo mester tene cuenta cu ne ora di dicidi si lo bo acepta fraccion di sanger?
“Pregunta di Lector” (E Toren di Vigilancia di 15 di juni 2004)
Kico a convence un dokter cu Dios su punto di bista di sanger ta rasonabel?
“Mi A Acepta Dios Su Punto di Bista di Sanger” (Spièrta! di 8 di december 2003)
Haya sa con algun anciano cu ta forma parti di Comite di Contacto cu Hospital ta yuda nan rumannan.
c Algun dokter ta mira e cuater componentenan principal di sanger como fraccion di sanger. Pesey, bo tin cu haci sigur cu bo dokter ta compronde bo decision pa no acepta transfusion di sanger completo ni di cel cora, cel blanco, plaketa of plasma.