LES 43
Kico Bijbel Ta Bisa Tocante Bebemento di Alcohol?
Rond mundo, hende tin varios opinion tocante alcohol. Algun hende sa bebe alcohol ora nan ta pasa tempo cu nan amigonan. Anto tin hende cu ta scoge pa no bebe alcohol mes. Di otro banda, tin hende ta bebe asina tanto cu nan ta bira burachi. Kico Bijbel ta bisa tocante alcohol?
1. Ta malo pa bebe bibida alcoholico?
Bijbel no ta bisa cu ta malo pa bebe alcohol. Al contrario, entre e varios cosnan bon cu Bijbel ta bisa cu Dios a duna nos, e ta menciona tambe “biña cu ta haci hende su curason contento.” (Salmo 104:14, 15) Bijbel ta hasta menciona algun fiel sirbidor di Dios cu a bebe bibida alcoholico.—1 Timoteo 5:23.
2. Ki conseho Bijbel tin pa hende cu scoge pa bebe alcohol?
Jehova ta condena bebemento di mas y buracheria. (Galationan 5:21) Bijbel ta bisa: “No anda cu hende cu ta bebe demasiado biña.” (Proverbionan 23:20) Pues, si nos scoge pa bebe alcohol, sea hunto cu otro hende of nos so, nos no mester bebe asina hopi cu nos no por pensa cla mas ni no por controla loke nos ta bisa y haci. Ademas, nos no mester bebe asina tanto cu nos ta daña nos salud. Si nos ta sinti cu nos no por controla nos bebemento di alcohol, ta mihor nos stop di bebe.
3. Con nos por mustra cu nos ta respeta e decisionnan cu otro hende ta tuma relaciona cu alcohol?
Cada persona mester dicidi si nan kier bebe alcohol of no. Nos no mester husga un persona cu dicidi di bebe alcohol na un manera modera ni nos no mester presiona un persona cu no kier bebe alcohol. (Romanonan 14:10) Anto si nos bebemento di alcohol lo por laga hende rond di nos sinti nan incomodo, ta mihor nos no bebe. (Lesa Romanonan 14:21.) Nos ta busca “no [nos] mes beneficio, sino esun di e otro persona.”—Lesa 1 Corintionan 10:23, 24.
KICO MAS NOS POR SIÑA?
Laga nos wak algun principio di Bijbel cu lo yuda bo dicidi si bo ta bebe alcohol of no y cuanto lo bo bebe si bo dicidi di haci esey. Ademas, wak kico bo por haci si bo tin problema cu bebemento di mas.
4. Dicidi si bo ta bebe alcohol of no
Kico Hesus a pensa tocante bebemento di alcohol? Pa bo por haya contesta pa e pregunta ey, tuma nota di e prome milager cu Hesus a haci. Lesa Juan 2:1-11. Despues, analisa e siguiente preguntanan:
For di loke bo a caba di lesa, kico Hesus tabata pensa tocante alcohol y tocante hende cu ta bebe alcohol?
Hesus no a condena bebemento di alcohol. Pues, con un cristian mester mira un persona cu ta scoge pa bebe alcohol?
E echo cu un cristian por scoge pa bebe alcohol no ta nifica cu ta semper sabi pa e haci esey. Lesa Proverbionan 22:3. Despues, analisa si ta sabi pa bebe den e siguiente situacionnan:
Bo tin cu traha cu un mashin of core auto.
Bo ta na estado.
Dokter a conseha bo pa no bebe alcohol.
Bo tin problema pa controla e cantidad di alcohol cu bo ta bebe.
Ley di bo pais ta prohibi bo di bebe alcohol.
Bo ta hunto cu un persona cu ta scoge pa no bebe alcohol debi cu den pasado e tabatin problema cu bebemento di mas.
Bo mester sirbi alcohol na casamento of otro evento social? Pasa e VIDEO pa wak kico ta algun punto cu bo tin cu tene cuenta cu ne.
Lesa Romanonan 13:13 y 1 Corintionan 10:31, 32. Despues di lesa cada texto, analisa e siguiente pregunta:
Si bo aplica e principio aki, con esey por yuda bo tuma un decision cu ta haci Jehova contento?
Cada cristian por dicidi pa su mes si e ta bebe alcohol of no. Hasta ora un cristian scoge pa bebe alcohol na cierto momento, por tin otro momento cu e ta scoge pa no haci esey
5. Dicidi cuanto alcohol lo bo bebe
Si bo scoge pa bebe bibida alcoholico, bo tin cu corda cu aunke Jehova no ta condena bebemento di alcohol, loke si e ta condena ta bebemento di mas. Dicon? Lesa Oseas 4:11, 18. Despues, analisa e siguiente pregunta:
Kico por pasa cu un persona cu bebe di mas?
Kico por yuda nos evita di bebe di mas? Nos mester ta modesto, cu otro palabra, nos mester ta consciente di nos limitacionnan. Lesa Proverbionan 11:2. Despues, analisa e siguiente pregunta:
Dicon ta bon pa bo pone limite na e cantidad di alcohol cu bo ta bebe?
6. Kico por yuda un persona stop di bebe di mas?
Wak kico a yuda un homber stop di bebe di mas. Pasa e VIDEO. Despues, analisa e siguiente preguntanan:
Con Dmitry tabata bira ora e bebe alcohol?
Dmitry por a stop di biaha cu su bicio di bebe alcohol?
Con Dmitry a logra vence su adiccion na alcohol?
Lesa 1 Corintionan 6:10, 11. Despues, analisa e siguiente preguntanan:
Kico Bijbel ta bisa tocante buracheria?
Con nos por sa cu hende cu ta bebe di mas por cambia?
Lesa Mateo 5:30. Despues, analisa e siguiente pregunta:
Ora Hesus a menciona kapmento di man den e ilustracion aki, e kier a mustra cu tin biaha nos mester haci sacrificio pa agrada Jehova. Si bo ta haya dificil pa stop di bebe di mas, kico bo por haci?a
Lesa 1 Corintionan 15:33. Despues, analisa e siguiente pregunta:
Kico lo ta e resultado si bo ta anda cu hende cu ta bebe di mas?
SI UN HENDE PUNTRA: “Ta malo pa bebe alcohol?”
Kico lo bo contesta?
RESUMEN
Jehova a duna hende alcohol pa nan disfruta di dje, pero e ta condena bebemento di mas y buracheria.
Repaso
Kico Bijbel ta bisa tocante bebemento di alcohol?
Kico ta e peliger di bebemento di mas?
Con nos por respeta e decisionnan cu otro hende ta tuma relaciona cu bebemento di alcohol?
MAS INFORMACION INTERESANTE
Con un teenager por tuma bon decision ora ta trata di alcohol?
Wak kico ta algun cos cu bo por haci pa stop cu bebemento di mas.
“Tene Alcohol na Su Debido Luga” (E Toren di Vigilansia di 1 di januari 2010)
Ta bon pa un cristian brinda of toast?
“Pregunta di Lector” (E Toren di Vigilancia di 15 di februari 2007)
Lesa e relato “Mi Tabata Manera un Bari sin Fondo” pa wak con un homber a stop cu bebemento di mas.
“Bijbel Ta Cambia Bida di Hende” (La Atalaya di 1 di mei 2012)
a Hende cu ta adicto na alcohol kisas mester di yudansa profesional pa nan por stop. Segun hopi dokter, hende cu tabatin problema cu bebemento di alcohol den pasado no mester bebe mes.