LES 53

Scoge Entretenimento Cu Ta Agrada Jehova

Edicion Imprimi

Jehova ta “e Dios feliz.” (1 Timoteo 1:11) E kier pa nos ta feliz y disfruta di bida. Jehova ta keda contento ora nos ta tuma tempo pa sosega di nos trabou y ta recrea. Den e les aki, nos lo mira con nos por disfruta di nos tempo liber y na mes momento agrada Jehova cu loke nos ta scoge como diberticion.

1. Kico nos tin cu tene cuenta cu ne ora di scoge entretenimento?

Kico bo ta gusta haci pa relaha den bo tempo liber? Algun hende ta gusta pasa un rato trankil na cas pa lesa buki, scucha musica, wak pelicula of subi Internet. Otro hende ta gusta ta mas activo y pasa tempo cu nan amigonan; nan ta gusta bay cana, landa of hunga wega hunto. Sin importa kico nos ta gusta haci den nos tempo liber, nos mester haci sigur cu nos entretenimento ta “agrada Señor.” (Efesionan 5:10) Esey ta masha importante pasobra loke mayoria di hende ta scoge pa wak, scucha of haci tin di haber cu cos cu Jehova ta odia, manera violencia, inmoralidad sexual of spiritismo. (Lesa Salmo 11:5.) Kico lo yuda nos scoge entretenimento cu ta bon pa nos?

Si nos scoge amigo cu ta stima Jehova, nan por tin bon influencia riba nos y por yuda nos scoge entretenimento cu ta bon pa nos. Manera nos a siña den Les 48, “hende cu ta anda cu hende sabi ta bira sabi.” Di otro banda, si nos ta anda regularmente cu hende cu no ta stima Jehova su normanan, nos “lo sufri daño.”—Proverbionan 13:20.

2. Dicon ta importante pa wak cuanto tempo nos ta dedica na entretenimento?

Aunke nos scoge entretenimento cu ta aceptabel pa Jehova, nos mester wak pa nos no dedica demasiado tempo na dje. Si nos dedica demasiado tempo na entretenimento, nos lo no resta suficiente tempo pa loke ta mas importante. Bijbel ta anima nos pa uza nos “tempo di e mihor manera.”—Lesa Efesionan 5:15, 16.

KICO MAS NOS POR SIÑA?

Laga nos wak kico nos por haci pa scoge entretenimento cu ta bon pa nos.

3. Evita entretenimento cu no ta agrada Jehova

Dicon nos tin cu wak bon ki entretenimento nos ta scoge? Pasa e VIDEO. Despues, analisa e siguiente preguntanan:

VIDEO: Ki Tipo di Dibertishon Mi Mester Skohe? (4:39)

Den ki manera e weganan cu hende tabata hunga na Roma di antiguedad ta similar na algun entretenimento di awe?
Kico Danny a siña tocante entretenimento?

Lesa Romanonan 12:9. Despues, analisa e siguiente pregunta:

Con e texto aki por yuda bo scoge entretenimento cu ta bon pa bo?

Kico ta algun cos cu Jehova ta odia? Lesa Proverbionan 6:16, 17 y Galationan 5:19-21. Despues di lesa cada texto, analisa e siguiente pregunta:

Cua di e cosnan cu e textonan ta menciona bo ta mira den entretenimento awe?

Con bo por scoge entretenimento cu ta bon pa bo?

Puntra bo mes:

Tocante kico e ta bay? E tin di haci cu loke Jehova ta odia?
Ki ora? E ta kita tempo for di cos mas importante?
Cu ken? Lo mi pasa mucho tempo cu hende cu no ta stima Jehova?

Ta importante pa nos keda caminda ta safe, esta, mas leu for di peliger posibel. Di mes manera, nos mester keda leu for di entretenimento cu nos ta pensa cu no ta bon

Un auto ta core na rand di un caminda riba un sero. Parti patras di e auto a cuminsa baha for di rand di e sero.

4. Uza bo tempo bon

Pasa e VIDEO. Despues, analisa e siguiente pregunta:

VIDEO: Ku Kiko Bo Ta Okupá Bo Tempu? (2:45)

Aunke e ruman homber den e video su entretenimento no tabata malo, kico tabata su problema?

Lesa Filipensenan 1:10. Despues, analisa e siguiente pregunta:

Con e texto aki por yuda bo dicidi cuanto tempo lo bo dedica na recreo?

5. Scoge entretenimento cu ta bon pa nos

Aunke tin entretenimento cu ta desagrada Jehova, tin hopi cos leuk cu nos por haci cu si ta aceptabel p’e. Lesa Eclesiastes 8:15 y Filipensenan 4:8. Despues, analisa e siguiente pregunta:

Ki entretenimento sano abo ta gusta?

Collage: Hende di diferente edad ta disfruta di entretenimento y recreo sano. 1. Un mucha muher ta scucha musica y ta pinta. 2. Tres homber hoben ta hunga basketball. 3. Dos mucha homber ta core bais. 4. Un mucha homber ta traha un auto di coy hunga. 5. Un homber ta toca drum. 6. Un mucha homber ta hunga video game cu su tata. 7. Un señora ta saca potret. — Bo por disfruta di entretenimento y recreo cu ta bon pa bo

LOKE HENDE SA BISA: “Mi no ta mira nada malo si mi entretenimento ta contene violencia, inmoralidad sexual of spiritismo pasobra mi mes no ta practica e cosnan ey.”