Siña Mas di Jehova Su Cualidadnan y Imit’e

1. (a) Menciona algun cualidad di Jehova. (b) Con un analisis di e cualidadnan di Dios lo beneficia bo?

KI CUALIDADNAN ta bin na bo mente ora bo pensa riba Jehova? Hopi di nos lo pensa riba amor, husticia, sabiduria y poder. Pero Jehova tin hopi cualidad maraviyoso. De echo, nos por menciona mas cu 40 cualidad di Jehova cu nos publicacionnan a yega di analisa a traves di añanan. Bo no por imagina bo cuanto cos fascinante bo por siña tocante Jehova si bo analisa e cualidadnan aki durante bo estudio personal of boso Adoracion Como Famia. Con un estudio asina por beneficia bo? Lo bo haya hasta mas aprecio pa nos Tata celestial y pa su cualidadnan. Y esey na su turno lo motiva bo pa hala mas cerca dje y imit’e.—Jos. 23:8; Sal. 73:28.

2. (a) Ilustra con nos por haya mas aprecio pa Jehova su cualidadnan. (b) Kico nos lo trata den e articulo aki y e siguiente dosnan?

² Awor, con bo por siña aprecia algo mas y mas? Wel, supone cu bo ta bay purba un cuminda cu nunca bo a yega di come. E prome cos cu ta hala bo atencion ta cu e cuminda ta hole bon. Y ora bo purb’e, bo ta realisa cu e ta masha dushi mes. Pesey, bo ta dicidi cu bo mes ta bay cushin’e. Di mes manera, nos ta siña aprecia un cierto cualidad di Jehova mas y mas ora nos siña tocante e cualidad aki, medita riba e manera cu Jehova ta despleg’e y finalmente imita Jehova desplegando e cualidad aki den nos bida. (Efe. 5:1) E articulo aki y e dosnan cu ta sigui lo analisa algun cualidad di Jehova cu nos no sa pensa riba dje tur ora. Tal analisis lo aumenta nos aprecio pa e cualidadnan ey. Segun cu nos ta analisa cada un di e cualidadnan di Jehova, nos lo contesta tres pregunta. Nan ta: Kico e cualidad ta encera? Con Jehova ta despleg’e? Y con nos por imita Jehova desplegando e cualidad aki?

JEHOVA TA ACERCABEL

3, 4. (a) Con lo bo describi un persona acercabel? (b) Con Jehova ta demostra cu e ta acercabel?

³ Laga nos cuminsa wak kico kiermen ser acercabel. Con lo bo describi un persona acercabel? Kisas lo bo bisa cu un persona asina ta cariñoso, semper cla pa yuda hende y facil pa papia cu ne. Hopi biaha, bo por saca afo si un persona ta acercabel of no si bo paga tino na su comentarionan, su expresion di cara y otro gestonan cu e ta haci.

⁴ Awor, con Jehova ta demostra cu e ta acercabel? Aunke Jehova ta e Creador y e Persona di mas poderoso den universo, e ta sigura nos cu e ta dispuesto y cla pa scucha nos oracionnan y contesta nan. (Lesa Salmo 145:18; Isaias 30:18, 19.) Nos por papia cu ne cuanto cu nos kier, ki ora cu nos kier y unda cu nos ta. Nos por acerc’e libremente pasobra nos sa cu nunca lo e rabia ni tira cos na nos cara. (Sal. 65:2; Sant. 1:5) E manera cu e Palabra di Dios ta describi Jehova ta indica cu Jehova kier pa nos acerc’e. Por ehempel, David a skirbi cu “e wowonan di SEÑOR ta riba” nos y cu Su “man drechi ta sostene” nos. (Sal. 34:15; 63:8) Profeta Isaias a compara Jehova cu un wardador di carne, bisando: “E lo coge e lamchinan den su brasa, y tene nan cerca di su curason.” (Isa. 40:11) Imagina bo! Jehova kier pa nos sinti nos pega na dje mescos cu un lamchi den brasa di un wardador amoroso. Si, Jehova ta un Tata acercabel. Awor con nos por imita e cualidad aki di Jehova?

UN CUALIDAD MASHA IMPORTANTE

5. Dicon ta importante pa ancianonan ta acercabel?

⁵ “Ki cualidad abo ta gusta mas di un anciano?” Esaki ta un pregunta cu a ser haci recientemente na varios Testigo di Jehova di diferente parti di mundo. Mayoria di nan a bisa: “E echo cu e ta acercabel.” Ta berdad cu tur cristian mester ta acercabel. Pero ta masha importante pa specialmente ancianonan desplega e cualidad aki. (Isa. 32:1, 2) Un ruman muher a splica dicon e ta haya cu ta masha importante pa un anciano ta acercabel. El a bisa: ‘Ta solamente si un anciano ta acercabel, nos lo por conoce su otro bon cualidadnan.’ Esey ta logico, no ta berdad? Pero awor, kico un persona mester haci pa e ta acercabel?

6. Con un persona por ta acercabel?

⁶ Pa un persona ta acercabel, e mester demostra interes sincero den otro hende. Si un anciano ta interesa den su rumannan, incluso hobennan, y ta dispuesto pa duna di su mes pa yuda nan, nan lo sinti nan mas liber pa acerc’e. (Mar. 10:13-16) Carlos, un hobencito di 12 aña di edad, a bisa: “Mi ta gusta wak con e ancianonan na Salon ta smile y ta trata e rumannan bon.” Ta claro cu no ta suficiente pa un anciano djis bisa cu e ta acercabel; e mester demostra esey. (1 Juan 3:18) Con e por hacie?

7. Con bin nos badge di congreso por lanta un combersacion, y kico nos por siña for di esaki?

⁷ Pensa riba e ehempel aki: Recientemente, un ruman homber tabata den avion, regresando cas despues di a asisti na un congreso den exterior. E tabatin su badge di congreso bisti, cu ta bisa: “Laga e Reino di Dios Bin!” Un steward cu a tuma nota di esaki a bisa e ruman: “Lag’e bin berdad.” Ademas, el a bisa e ruman cu nan tin cu papia. Nan tabatin un combersacion ameno y gustosamente e steward a acepta nos revistanan. Hopi di nos tin experencianan similar. Pero, con bin un badge di congreso por lanta un combersacion? Pasobra den un sentido, e badge ta papia cu e hendenan, bisando: “Sinti boso liber pa acerca mi y puntra mi unda mi ta bay.” Si, e badge ta laga hende sa cu nos ta dispuesto pa papia tocante nos creencianan. Di mes manera, un anciano mester laga su rumannan den fe compronde cu nan por acerc’e libremente. Con ta algun manera cu e por haci esey?

8. Con ancianonan por demostra cu nan tin interes sincero den otro hende, y ki efecto esaki tin riba e congregacion?

⁸ Wel, aunke hende su custumbernan ta varia di un pais pa otro, generalmente un smile amigabel of un saludo cariñoso ta laga otronan compronde cu bo ta sinceramente interesa den nan. Pero, ken mester tuma e iniciativa? Laga nos wak ki ehempel Hesus a pone. Mateo ta conta cu na un reunion cu Hesus tabatin cu su discipelnan, ta ‘Hesus a yega cerca nan y a papia cu nan.’ (Mat. 28:18) Igualmente, ancianonan ta tuma iniciativa awe pa acerca nan rumannan y papia cu nan. Ki efecto esaki lo por tin riba e congregacion? Un ruman muher pionero di 88 aña di edad a bisa: “Mi ta stima mi ancianonan pasobra ora mi yega Salon di Reino, nan ta ricibi mi cu un smile caluroso y cu palabranan di animacion.” Un otro ruman muher a bisa: “Kisas e por parce algo chikito, pero ora un anciano bisa mi bonbini na reunion cu un sonrisa riba su cara, pa mi esaki ta nifica masha hopi.”

SEA ACERCABEL Y DISPUESTO PA SCUCHA Y PAPIA

9, 10. (a) Ki ehempel excelente Jehova ta pone? (b) Con ancianonan por imita Jehova su ehempel?

⁹ Ta claro cu nos no por ta acercabel si nos no tin tempo pa papia cu otro hende y scucha nan. Jehova ta un excelente ehempel den esaki. Bijbel ta bisa cu Jehova “no ta masha leu for di cada un di nos.” (Echo. 17:27) Y un manera cu ancianonan por imita Jehova su ehempel ta di aparta tempo prome y despues di reunion pa papia cu nan rumannan den fe—grandi y chikito. Un ruman homber pionero a remarca: “Ora un anciano puntra mi ‘con a bay awe’ y e para scucha mi contesta, mi ta sinti cu mi ta ser aprecia.” Un ruman muher cu tin casi 50 aña ta sirbi Jehova a bisa: “Ancianonan cu ta tuma un tiki tempo pa papia cu mi despues di reunion ta laga mi sinti cu nan ta balora mi.”

¹⁰ Ta bisto cu ancianonan tin hopi responsabilidad, pero nan mester pone e meta pa na tur reunion nan presta atencion na e carnenan.

JEHOVA TA IMPARCIAL

11, 12. (a) Kico ta nifica ser imparcial? (b) Con Bijbel ta mustra cu Jehova ta imparcial?

¹¹ Imparcialidad ta un otro bunita cualidad di Jehova. (Echo. 10:34) Kico ta nifica ser imparcial? Wel, esey ta encera trata tur hende na un manera husto, sin demostra faboritismo of prehuicio. Pero pa nos por demostra imparcialidad tin dos factor cu ta hunga un papel importante: nos actitud y nos echonan. Dicon tur dos ta importante? Pasobra ta solamente si un persona ta kere cu tur hende mester ser trata na un manera husto, lo e trata nan asina. Ser imparcial kiermen cu bo no ta faborece un persona riba e otro. Pesey, un persona imparcial ta trata tur hende na un manera husto, sin importa nan apariencia of cuanto placa nan tin.

¹² Jehova ta e mihor ehempel di imparcialidad. Su Palabra ta bisa cu e “no ta haci distincion di persona.” (Lesa Echonan 10:34, 35; Deuteronomio 10:17.) Laga nos wak con el a demostra esaki ora el a resolve un problema cu a surgi den tempo di Moises.

13, 14. (a) Den ki situacion e cinco yiu muhernan di Zelofehad a haya nan? (b) Con Jehova a demostra cu e ta imparcial?

¹³ Net prome cu e Israelitanan a drenta e Tera Priminti, cinco ruman muher soltero a haya nan cu un dilema. Ta trata di e cinco yiu muhernan di Zelofehad, di e tribu di Manases. Kico tabata e problema? Wel, Zelofehad, nan tata, a muri y nan no por a bin na remarca pa ricibi e pida tereno cu a coresponde na dje. Dicon? Pasobra segun Ley, ora un tata muri, ta su yiu hombernan tabatin e derecho di haya su pida tereno. Pero Zelofehad no tabatin yiu homber. (Num. 26:33, 52-55) Awor, esey lo a nifica cu otro miembronan di e famia lo a haya e tereno y su yiu muhernan lo a keda sin herencia?

¹⁴ E cinco ruman muhernan a acerca Moises y a puntr’e: “Pakico nomber di nos tata mester wordo kita for di meymey di su famia pasobra e no tabatin yiu homber?” Y nan a rog’e: “Duna nos un propiedad meymey di e ruman hombernan di nos tata.” Con Moises a reacciona? El a bisa nan cu e no por haci excepcion pa nan? No. Mas bien, el ‘a hiba nan caso dilanti di Jehova.’ (Num. 27:2-5) Ki contesta Moises a haya? Jehova a bis’e: “E yiu muhernan di Zelofehad tin rason den loke nan ta bisa. Siguramente bo mester duna nan un propiedad como herencia meymey di e ruman hombernan di nan tata, y bo mester pasa e herencia di nan tata pa nan.” Pero Jehova a bay mas leu ainda: E excepcion aki a bira ley. El a bisa Moises: “Si un homber muri y no tin yiu homber, e ora ey boso mester pasa su herencia pa su yiu muher.” (Num. 27:6-8; Jos. 17:1-6) For di e tempo ey, tur hende muher Israelita cu a haya nan den e mesun situacion por a ricibi herencia.

15. (a) Con Jehova ta trata su pueblo, incluso esnan cu no tin ningun hende pa yuda nan? (b) Cua otro relato biblico ta mustra cu Jehova ta imparcial?

¹⁵ Esey sigur tabata un decision imparcial! E cinco ruman muhernan ey no tabatin niun hende pa yuda nan, pero Jehova a trata nan na un manera husto y cu respet, mescos cu el a trata tur e otro Israelitanan. (Sal. 68:5) Esaki ta djis un di e hopi relatonan den Bijbel cu ta proba e berdad alentador aki: Jehova ta trata tur su sirbidornan na un manera imparcial.—1 Sam. 16:1-13; Echo. 10:30-35, 44-48.

NOS POR IMITA JEHOVA

16. Con nos por ta imparcial mescos cu Jehova?

¹⁶ Con nos por ta imparcial, mescos cu Jehova? Corda, imparcialidad tin dos aspecto. Nos por trata otro hende na un manera husto solamente si nos ta kere cu tur hende mester ser trata asina. Ta berdad cu nos tur gusta pensa cu nos ta hende imparcial. Pero, manera bo sa, tin biaha no ta facil pa un persona evalua su mes obhetivamente. Pesey, con bo por haya sa si di berdad bo ta un persona imparcial? Hesus a pone un excelente ehempel pa nos. Ora e tabata kier sa kico hende tabata pensa di dje, el a puntra su amigonan di confianza: “Ken e hendenan ta bisa cu e Yiu di hende ta?” (Mat. 16:13, 14) Kisas lo bo por puntra un amigo cu bo sa cu lo ta franco cu bo: ‘Bo ta haya cu mi ta un persona imparcial?’ Si e bisa bo cu bo tin e tendencia di trata cierto hendenan mihor cu otronan debi na nan rasa, educacion, clase social of situacion financiero, bo tin cos pa traha ariba. Kico bo tin cu haci? Haci oracion sincero na Jehova y rog’e pa e yuda bo cambia bo actitud pa bo por ta mas manera e y trata tur hende na un manera imparcial.—Mat. 7:7; Col. 3:10, 11.

17. Con nos por trata otro hende na un manera imparcial?

¹⁷ Nos ta imita Jehova den congregacion ora nos ta trata tur ruman cu respet y bondad. Por ehempel, ora di mustra hospitalidad, ta bon pa nos invita rumannan di diferente cultura, rumannan cu nan casa a muri, esnan pober of huerfano. (Lesa Galationan 2:10; Santiago 1:27.) Ademas, nos ta proclama e bon noticia di e Reino na tur sorto di hende, incluso na hende di otro pais. Nos ta masha contento cu nos tin literatura biblico den mas o menos 600 idioma. Esey ta otro prueba palpabel cu nos ta un pueblo imparcial!

18. Con abo personalmente por demostra cu bo ta aprecia e echo cu Jehova ta acercabel y imparcial?

¹⁸ Si, ora nos medita riba e echo cu Jehova ta un persona acercabel y imparcial y riba e manera cu e ta demostra e cualidadnan aki, nos ta haya mas aprecio pa Jehova. Como resultado, nos lo sinti nos motiva pa imit’e mas y mas den nos trato cu nos rumannan y e personanan cu nos ta predica na dje.