“Hopi Hende Tabatin Rabia Riba Mi”

MI PASADO:

Mi a lanta na Santiago, capital di Chile, den un bario caminda uzo di droga, gang y criminalidad tabata hopi comun. Ora mi tabatin cinco aña, mi tata a ser asesina. Despues di esey, mi mama a bay biba cu un homber hopi cruel cu tabata maltrata nos regularmente. Ainda mi tin e cicatriznan emocional di e añanan ey.

Segun cu mi tabata crece, influencianan negativo a pone mi bira un hoben sumamente violento. Mi a cuminsa scucha musica heavy metal, bebe di mas y de bes en cuando uza droga. Hopi biaha mi tabata haya mi den pelea di caya cu bendedonan di droga, kendenan na varios ocasion a purba di likida mi. Un biaha, un gang rival a contrata un asesino notorio pa mata mi, pero mi a scapa cu solamente un hinca. Na un otro ocasion, un grupo di bendedo di droga a pone un revolver na mi cabes y a purba di colga mi.

Na 1996, mi a enamora di un mucha muher cu yama Carolina, y na 1998 mi a casa cu ne. Despues cu nos prome yiu a nace, mi a cuminsa haya miedo cu debi na mi caracter violento lo mi por a bira mescos cu mi tata di crianza y maltrata mi famia. Pesey mi a busca yudansa na un centro di rehabilitacion. E tratamento medico y terapia cu mi a ricibi no a duna bon resultado. Ainda, cualkier cos chikito tabata pone mi bira furioso; mi no tabatin dominio riba mi mes. Den un intento pa no haci mas daño na mi famia, mi a trata di comete suicidio. Afortunadamente, mi no a logra.

Aunke mi tabata un ateista pa hopi aña, leu aya mi tabata kere cu tin un Dios. Pesey, pa un tempo mi tabata bay un iglesia evangelista. Mientrastanto, mi casa a cuminsa studia Bijbel cu Testigonan di Jehova. Mi tabatin masha rabia riba e Testigonan, y hopi biaha mi tabata papia palabra malo cu nan. Pero, pa mi sorpresa, semper nan tabata responde mi na un manera pacifico.

Un dia, Carolina a bisa mi pa lesa Salmo 83:18 den mi Bijbel. E versiculo ey ta mustra bon cla cu e nomber di Dios ta Jehova. Esey a sorprende mi, pasobra den mi religion mi a siña tocante un dios, pero no tocante Jehova. Anto na principio di aña 2000, mi tambe a cuminsa studia Bijbel cu e Testigonan.

BIJBEL A CAMBIA MI BIDA:

Segun cu mi tabata progresa, mi a siña cu Jehova ta un Dios compasivo y cla pa pordona, anto esey tabata un consuelo pa mi. Por ehempel, na Exodo 34:6 y 7, Bijbel ta describi Jehova como un Dios “yen di compasion y gracia, kende no ta rabia lihe y kende ta abunda den misericordia y berdad; kende ta mantene misericordia pa milnan, kende ta pordona inikidad, transgresion y pica.”

Toch, no tabata facil pa mi aplica loke mi tabata siña. Mi tabata convenci cu nunca lo mi por a controla mi caracter violento. Cada biaha cu mi tabata faya, Carolina tabata anima mi na un manera amoroso. E tabata pone mi corda cu Jehova ta mira e esfuersonan cu mi tabata haci. Su apoyo a duna mi e forsa pa sigui purba di agrada Jehova, aunke hopi bes mi tabata mira mi mes como un caso perdi.

Riba un dia, Alejandro, mi maestro, a pidi mi lesa Galationan 5:22 y 23. E versiculonan ey ta bisa cu e fruta di Dios su spirito ta “amor, goso, paz, pasenshi, amabilidad, bondad, fe, suavidad, dominio propio.” Alejandro a splica mi cu e unico manera cu lo mi por a desaroya e cualidadnan ey ta cu yudansa di e spirito santo di Dios, y no riba mi mes forsa. E berdad ey a cambia mi punto di bista por completo.

Mas despues, mi a asisti na un congreso grandi di Testigonan di Jehova. E union cu tabata reina eynan y e ordo y limpieza cu mi a mira a convence mi cu mi a haya e religion berdadero. (Juan 13:34, 35) Mi a batisa na februari 2001.

E BENEFICIONAN:

Jehova a transforma mi di un persona violento pa un persona pacifico. Mi a sinti cu Jehova a saca mi for di e lodo cu mi tabata aden. Hopi hende tabatin rabia riba mi, pero mi no por tuma nan na malo. Sinembargo, awor mi ta sirbi Jehova pacificamente hunto cu mi casa y mi dos yiu hombernan.

Mi famia y mi amigonan di antes ainda no por kere cuanto mi a cambia. Como resultado, hopi di nan a mustra interes pa siña e berdadnan di Bijbel. Mi tabatin e privilegio tambe di yuda otronan siña conoce Jehova. Mi ta sumamente contento pa mira con siñansa biblico a transforma nan bida tambe!