Obedece e Wardadornan di Jehova

1, 2. Dicon Jehova ta compara su mes cu un wardador di carne?

JEHOVA ta compara su mes cu un wardador di carne. (Eze. 34:11-14) Esey ta yuda nos compronde ki sorto di persona Jehova ta. Un wardador amoroso ta sinti su mes responsabel pa e bida y bienestar di e tou di carne cu ta bou di su cuido. Pues, e ta hiba nan caminda tin yerba y awa (Sal. 23:1, 2); e ta vigila nan di dia y anochi (Luc. 2:8); e ta proteha nan contra bestia salbahe (1 Sam. 17:34, 35); e ta carga e lamchinan recien naci (Isa. 40:11); e ta busca e carnenan perdi y ta percura bon pa esnan herida.—Eze. 34:16.

² Den tempo antiguo, gran parti di e pueblo di Dios tabata wardador di carne y cunukero. Pues, nan a compronde di biaha dicon Jehova a compara su mes cu un wardador amoroso. Nan tabata sa cu carne mester di cuido y atencion pa nan sobrevivi y keda saludabel. Den un sentido spiritual, esey ta e caso cu hende tambe. (Mar. 6:34) Sin un bon cuido y liderato spiritual, es decir, sin Jehova su guia y atencion, hende ta sufri. Nan no sa kico ta bon ni kico ta malo, y nan ta indefenso. Anto mescos cu “carne cu no tin wardador”, nan ta ser plama. (1 Rey. 22:17) Pero Jehova si ta percura pa su pueblo haya tur loke e tin mester.

3. Kico nos lo bay trata den e articulo aki?

³ Nos tambe ta compronde dicon Jehova ta describi su mes como un wardador di carne. Nos ta mira cu e ta percura bon pa su pueblo awe. Laga nos wak con e ta guia su carnenan y satisface nan necesidad. Despues nos lo analisa kico e carnenan mester haci pa beneficia di Jehova su guia y cuido.

E BON WARDADOR TA NOMBRA OTRO WARDADOR PA YUD’E

4. Con Hesus ta percura pa e carnenan di Jehova?

⁴ Jehova a nombra Hesus como Cabes di e congregacion cristian. (Efe. 1:22, 23) Hesus, como “e bon wardador”, ta mescos cu su Tata y e tin e mesun interes, proposito y cualidadnan cu su Tata. Hesus hasta a “entrega su alma pa e carnenan.” (Juan 10:11, 15) Esta un regalo maraviyoso Cristo su sacrificio di rescate ta pa humanidad! (Mat. 20:28) Si, e proposito di Jehova ta “pa tur cu pone fe den [Hesus] no bay perdi, ma haya bida eterno.”—Juan 3:16.

5, 6. (a) Ken Hesus a nombra pa cuida su carnenan, y kico e carnenan mester haci pa nan beneficia di esaki? (b) Kico mester ta e motibo principal pakico nos kier obedece e ancianonan?

⁵ Con e carnenan ta demostra cu Hesucristo ta nan Wardador? Hesus a bisa: “Mi carnenan ta scucha mi stem, y mi conoce nan, y nan ta sigui mi.” (Juan 10:27) E carnenan ta mustra cu nan ta scucha e stem di e Bon Wardador ora nan ta sigui su guia den tur cos. Esaki ta encera cu nan ta obedece e otro wardadornan cu Hesus a nombra pa yud’e pastorea e tou. Hesus a indica cu su apostel- y discipelnan mester a sigui cu e trabou cu el a cuminsa cu ne. Nan mester a siña ‘su lamchinan’ y cuida nan. (Mat. 28:20; lesa Juan 21:15-17.) Segun cu e bon noticia a sigui plama, mas y mas hende a bira discipel di Cristo. Pesey, Hesus a percura pa por tin cristiannan maduro pa pastorea, of cuida, e congregacionnan.—Efe. 4:11, 12.

⁶ Mas despues, ora apostel Pablo tabata papia cu e ancianonan di e congregacion di Efeso, el a bisa nan cu ta spirito santo a nombra nan como superintendente pa nan “pastorea e congregacion di Dios.” (Echo. 20:28) Esey ta conta pa e superintendentenan cristian di awe tambe, ya cu nan ta ser nombra a base di rekisitonan cu ta para den e Palabra di Dios cu a ser inspira pa spirito santo. Ora nos ta obedece e ancianonan, nos ta demostra anto nos respet pa Jehova cu Hesus, e dos gran Wardadornan. (Luc. 10:16) Sin duda, esaki ta e motibo principal pakico nos kier ta sumiso na e ancianonan. Pero tin mas motibo pakico ta sabi pa nos sigui nan guia y instruccion.

7. Con e ancianonan ta yuda bo mantene un bon relacion cu Jehova?

⁷ Ora ancianonan ta duna animacion, conseho y guia na e rumannan, nan ta percura pa haci esey semper a base di e Scritura mes of a base di principionan biblico. Ancianonan no ta duna e guia ey pasobra nan kier dicta con e rumannan mester hiba nan bida. (2 Cor. 1:24) Mas bien, nan kier yuda e rumannan tuma bon decision y promove union y paz den e congregacion. (1 Cor. 14:33, 40) E ancianonan ‘ta vigila nos alma’ den e sentido cu nan kier yuda delaster un persona den e congregacion mantene un bon relacion cu Jehova. Pues, nan ta cla pa ofrece yudansa si nan ripara cu un ruman ta a punto di “dal un paso robes.” (Gal. 6:1, 2; Judas 22) Nos tin bon motibo anto pa “obedece esnan cu ta dirigi” e congregacion.—Lesa Hebreonan 13:17.

8. Con ancianonan ta proteha e tou di Dios?

⁸ Apostel Pablo tambe tabata un wardador amoroso, y el a spierta su rumannan na Colosas: “Tene cuidou pa ningun hende no coy boso den nan gara pa medio di filosofia y engaño vano cu ta basa riba tradicion di hende, segun e cosnan basico di mundo y no segun e siñansanan di Cristo.” (Col. 2:8) E spiertamento aki ta yuda nos mira un otro motibo mas pakico ta importante pa scucha e conseho biblico di e ancianonan. Nan ta proteha e tou door di spierta nan rumannan pa tene cuidou cu personanan cu lo kier purba di desvia nan for di Jehova. Apostel Pedro a spierta cu “profeta falso” y “maestro falso” lo purba di “seduci almanan instabil”, esta, cristiannan debil, pa pone nan haci malo. (2 Ped. 2:1, 14) Ancianonan di nos tempo tambe mester duna e tipo di spiertamentonan ey ora ta necesario. Siendo cu nan ta hombernan cristian maduro, nan tin experencia di bida. Ademas, nan a ser nombra como anciano pasobra nan a demostra cu nan ta compronde e Scritura bon y ta cualifica pa duna siñansa cu ta sano. (1 Tim. 3:2; Tito 1:9) Nan madurez, actitud balansa y sabiduria basa riba Bijbel ta capacita nan pa duna e rumannan guia.

E BON WARDADOR TA ALIMENTA Y PROTEHA E CARNENAN

9. Con Hesus ta dirigi y alimenta e congregacion cristian awe?

⁹ Jehova ta uza su organisacion pa percura un abundancia di alimento spiritual pa henter e hermandad mundial. Nos ta haya hopi conseho biblico via di nos publicacionnan. Ademas, tin biaha e organisacion ta duna guia directamente na e ancianonan di congregacion, sea via carta of via instruccion cu e superintendentenan biahero ta duna nan. Asina e carnenan ta ricibi instruccion bon cla.

10. Ki responsabilidad wardadornan amoroso tin ora cu un ruman dwaal bay for di e tou?

¹⁰ Den un sentido spiritual, ancianonan tin e responsabilidad di proteha y cuida e carnenan. Nan ta preocupa specialmente pa e miembronan di congregacion kende nan fe a bira zwak of cu a comete fayonan grave. (Lesa Santiago 5:14, 15.) Algun di e rumannan aki kisas a dwaal bay for di e tou y a stop di participa den actividadnan cristian. Den un caso asina, kico un wardador amoroso lo haci pa yuda? Wel, lo e haci tur loke ta na su alcance pa busca cada carne perdi y anima nan pa bolbe na e tou, esta, na e congregacion. Hesus a bisa: “Mi Tata cu ta den cielo no ta desea pa ni un di e chikitonan aki bay perdi.”—Mat. 18:12-14.

CON NOS TIN CU MIRA E IMPERFECCIONNAN DI E ANCIANONAN?

11. Dicon algun ruman tin dificultad pa sigui guia di e ancianonan?

¹¹ Jehova cu Hesus ta Wardadornan perfecto. Pero e wardadornan humano cu nan ta uza pa cuida e congregacion si no ta perfecto, y esaki ta pone cu algun ruman tin dificultad pa sigui guia di e ancianonan. Kisas nan ta pensa: ‘E ancianonan ta hende imperfecto mescos cu nos. Dicon mi tin cu scucha nan conseho?’ Ta berdad cu e ancianonan ta imperfecto. Pero nos no mester enfoca riba nan imperfeccion- y fayonan.

12, 13. (a) Den pasado, ki fayo sirbidornan di Jehova cu tabatin puesto di responsabilidad a comete? (b) Dicon Jehova a laga skirbi den su Palabra e fayonan di hombernan cu el a encarga cu responsabilidad?

¹² E Scritura ta papia francamente di e fayonan di hende cu Jehova a uza pa dirigi su pueblo den pasado. Por ehempel, Dios a ungi David como rey y lider di Israel. Pero despues el a cay den tentacion y a comete adulterio y asesinato. (2 Sam. 12:7-9) Pensa tambe riba apostel Pedro. Aunke el a ser confia cu hopi responsabilidad den e congregacion cristian di prome siglo, e tambe a comete fayo grave. (Mat. 16:18, 19; Juan 13:38; 18:27; Gal. 2:11-14) Cu excepcion di Hesus, ningun hende cu a biba despues di Adam cu Eva no tabata perfecto.

¹³ Dicon Jehova a laga e escritornan di Bijbel skirbi tocante e fayonan cu e hombernan cu el a encarga cu responsabilidad a haci? Un di e motibonan ta pa mustra cu e por uza hende imperfecto pa dirigi su pueblo. En realidad, semper el a haci esey. Pues, nos no mester uza imperfeccion di e rumannan cu ta dirigi nos awe como un excuus pa murmura, of keha, contra nan of pa ignora nan autoridad. Jehova ta spera di nos cu nos ta respeta e rumannan ey y obedece nan.—Lesa Exodo 16:2, 8.

14, 15. Kico nos por siña for di e manera cu Jehova a duna instruccion na su pueblo den pasado?

¹⁴ Ta sumamente importante pa nos obedece e ancianonan awe. Dicon? Wel, pensa un rato riba e manera cu Jehova a comunica cu su pueblo den pasado durante temponan critico. Por ehempel, ora e pueblo di Israel a bandona Egipto, Dios a uza Moises cu Aaron pa duna e pueblo instruccion importante. Ademas, pa e Israelitanan por a sobrevivi e di dies plaga, nan mester a obedece cierto instruccion: Nan mester a come un cena special, mata un carne y spart un poco di su sanger riba e kozijnnan na banda y ariba di e porta di nan cas. Ta un stem a papia cu nan for di cielo? No, nan mester a scucha e ancianonan di Israel cu, na nan turno, a ricibi instruccionnan specifico for di Moises. (Exo. 12:1-7, 21-23, 29) Den e caso ey, Moises y e ancianonan tabata esnan cu a transmiti e instruccionnan di Jehova na e pueblo. Awe, Jehova ta uza e ancianonan cristian pa cumpli cu e mesun funcion importante ey.

¹⁵ Sin duda, bo por pensa riba varios otro ocasion den Bijbel den cua Jehova a uza hende of angel pa duna instruccion na su pueblo. Hopi biaha e instruccionnan aki a scapa nan bida. Den tur e casonan ey, Jehova a dicidi di duna otro hende e autoridad pa papia den su nomber y nan, na nan turno, a bisa su pueblo kico nan mester a haci pa nan por a sobrevivi e tempo peligroso ey. Nos tin tur motibo pa spera cu Jehova lo haci algo similar pa su pueblo na Armagedon. Claro cu e ancianonan cu awe tin e responsabilidad di representa Jehova of su organisacion mester tene masha cuidou pa no abusa di e autoridad cu nan a ricibi.

“UN TOU BOU DI UN WARDADOR”

16. Na ki “palabra” nos tin cu presta atencion?

¹⁶ E pueblo di Jehova ta “un tou bou di un wardador”, Hesucristo. (Juan 10:16) Hesus a indica cu lo e ta cu su discipelnan “tur e dianan, te na conclusion di e era aki.” (Mat. 28:20) Como Rey celestial, e tin control riba tur suceso cu lo hiba na destruccion di e mundo di Satanas. Con nos por keda uni y sano y salvo den e organisacion di Dios? Bijbel ta bisa: “Bo horea lo tende un palabra tras di bo ta bisa: ‘Esaki ta e caminda, cana den dje.’” E “palabra” aki ta encera loke Dios su spirito santo ta bisa via Bijbel y loke Jehova cu Hesus ta bisa via e wardadornan cu nan a nombra.—Lesa Isaias 30:21; Revelacion 3:22.

17, 18. (a) Den ki peliger e pueblo di Dios ta, pero di kico nos por ta sigur? (b) Kico nos lo bay analisa den e siguiente articulo?

¹⁷ Bijbel ta bisa cu Satanas “ta cana rond manera un leon cu ta [brul], buscando ken e por habraca.” (1 Ped. 5:8) Mescos cu un bestia salbahe y hambra, asina e ta sluip tras di e tou, wardando un bon chens p’e ataca e carnenan cu ta zwak of cu a dwaal bay for di e tou. Esaki ta duna nos mas motibo ainda pa keda hopi cerca di e congregacion y di Jehova, “e wardador y superintendente di [nos] alma.” (1 Ped. 2:25) Revelacion 7:17 ta papia tocante e hendenan cu lo sobrevivi e tribulacion grandi. E ta bisa cu e Lamchi, Hesus, “lo ta nan wardador, y lo e guia nan na fuentenan di awa di bida. Y Dios lo seca tur lagrima for di nan wowo.” Esta un promesa maraviyoso!

¹⁸ Despues di a considera e papel sumamente importante cu e ancianonan cristian tin como wardador di e congregacion, cada anciano ta haci bon di puntra su mes: Con mi por haci sigur cu mi ta trata e carnenan di Hesus manera mester ta? Den e siguiente articulo nos lo analisa e contesta riba e pregunta ey.