Con Nos Por Yuda Alivia e Necesidadnan di Otro Hende?

DISTURBIONAN violento a lanta den un pais den desaroyo despues di e resultado controversial di un eleccion. François, un anciano di e pais ey a conta: “Miles di Testigo di Jehova a haya nan ta huy bay laga nan cas. Cuminda y remedi a bira scars, y loke a keda tabata masha caro mes. Banconan a cera, y bancomaticonan a keda completamente bashi of a stop di funciona.”

Rapidamente, rumannan di sucursal a cuminsa duna yudansa financiero y manda articulonan di primera necesidad na e Testigonan cu a haya nan ta bandona nan cas y cu awor tabata biba temporalmente den Salonnan di Reino cu tin den e pais. Partidonan rival tabata blokia e careteranan, pero por lo general nan tabata laga vehiculonan di sucursal pasa, ya cu tur partido tabata sa cu Testigo di Jehova ta tene nan mes estrictamente neutral.

François a sigui conta: “Un biaha, riba caminda pa un Salon di Reino, algun francotirado a cuminsa basha bala riba nos van. Ma ningun no a alcansa nos. Ora nos a mira un soldaat ta core bin den nos direccion cu su arma den man, nos a hinca e van den reverse, bira e van y core duro bay sucursal bek. Nos a gradici Jehova masha hopi cu nos a keda na bida. E siguiente dia, e 130 rumannan cu tabata na e Salon di Reino ey a logra yega sano y salvo na un luga mas safe. Algun ruman a bin sucursal, y eynan nos a atende nan necesidad spiritual y material te ora cu e crisis a pasa.”

François a agrega: “Despues, sucursal a haya hopi carta di rumannan for di tur skina di e pais cu a expresa nan gratitud profundo. E echo cu nan a experencia con nan rumannan di otro parti a bin yuda nan a duna nan mas confianza den Jehova.”

Ora desaster natural y otro calamidadnan cu hende a causa tuma luga, nos no ta bisa nos rumannan den necesidad ‘tene boso curpa cayente y bon alimenta.’ (Sant. 2:15, 16) Mas bien, nos ta purba di percura pa nan necesidadnan fisico. Asina tambe a sosode den prome siglo. Despues cu e cristiannan a haya e spiertamento cu un hamber lo a bin, “e discipelnan a dicidi di manda yudansa pa e rumannan cu tabata biba na Judea—cada un a contribui segun su forsa.”—Echo. 11:28-30.

Como sirbidor di Jehova, nos ta cla pa duna yudansa material na personanan den necesidad. Pero hende tin un necesidad spiritual tambe. (Mat. 5:3) Pa haci nan consciente cu nan tin e necesidad ey y cu nan mester dal paso pa satisface e necesidad ey, Hesus a encarga su siguidornan pa haci discipel. (Mat. 28:19, 20) Cada un di nos ta dedica gran parti di nos tempo, energia y recurso pa cumpli cu e encargo ey. Como organisacion, nos ta uza parti di e fondonan cu nos ta ricibi como donacion pa duna yudansa material, pero principalmente nos ta uza nan pa promove interesnan di Reino y plama e bon noticia. Di e manera ey, nos ta demostra nos amor pa Dios y pa nos prohimo.—Mat. 22:37-39.

E personanan cu ta sostene e obra mundial di Testigonan di Jehova por tin sigur cu nan donacion ta ser uza bon y na un manera efectivo. Abo ta den posicion pa yuda alivia bo rumannan cu ta den necesidad? Bo kier sostene e trabou di haci discipel? Wel, den tal caso, “no laga di haci bon na esnan cu merece esaki, si ta den bo poder pa hacie.”—Prov. 3:27.