“Mi Tabata Manera un Morocoy den Su Casca”

DURANTE un campaña cortico di predicacion di nuebe dia cu a cuminsa na augustus y termina na september di aña 1929, mas cu 10.000 publicador a predica rond Merca. Nan a laga un cantidad di 250.000 buki y tratado. Entre e predicadornan di Reino ey tabatin alrededor di mil pionero (e tempo ey, colporteur). E cantidad aki a aumenta rapidamente! Si, di aña 1927 pa 1929, e cantidad di pionero a bira tripel, loke tabata algo “casi increibel” segun Boletin.a

Na final di aña 1929, a surgi un crisis financiero. E dia di mas malo tabata diamars 29 di october 1929 (Black Tuesday). Debi cu e prijsnan riba Bolsa di Balor di New York tabata baha asina lihe, henter e sistema economico di mundo a cay den loke nan a yama e Gran Depresion. Miles di banco a bati bancarota. Boerderijnan a stop di funciona. Fabricanan grandi a cera nan portanan. Miyones di hende a perde trabou. Na 1933, e cantidad di cas cu nan a pone beslag riba dje na Merca a yega te na 1.000 cas pa dia.

Con e predicadornan di tempo completo por a sobrevivi durante e crisis ey? Un manera tabata door di traha nan cas riba wiel. Un persona cu cas riba wiel, of trailer, no mester a paga huur ni belasting. Esaki a permiti hopi pionero sigui den nan sirbishi cu menos gasto posibel.b Durante e temporada di congreso, nan cas mobil tabata fungi como camber di hotel gratis. Na 1934, Boletin a inclui mapanan detaya cu ta mustra con pa traha luganan di biba chikito y comodo. Nan tabata isola contra friu y ekipa cu cosnan practico manera cama cu por a dobla cera y stoof y un sistema di suministro di awa.

Rond mundo, pioneronan ingenioso a cuminsa traha nan cas riba wiel. Victor Blackwell ta corda: “Mescos cu Noe no tabatin experencia den traha boto, ami no tabatin ni saber ni experencia den trahamento di trailer pa biba aden.” Pero toch el a logra traha un trailer.

Avery cu Lovenia Bristow tambe tabatin un cas riba wiel. Avery a bisa: “Mi tabata manera un morocoy den su casca—unda cu mi a bay, mi cas tabata hunto cu mi.” Nan tabata traha pionero hunto cu Harvey cu Anne Conrow, kendenan tabatin un cas mobil di cua e murayanan tabata cubri cu asfaltpapier (un tipo di material di breu). Cada bes cu nan a muda di un luga pa otro, pida di esaki tabata kita cay for di nan cas. Avery ta corda: “Nunca prome ni despues, hende a yega di mira un trailer asina.” Pero segun Avery, e pareha Conrow y nan dos yiu hombernan tabata “e famia di mas feliz cu hende a yega di conoce.” Harvey Conrow mes a skirbi: “Nunca nos no a falta nada y nos a sinti nos completamente safe den Jehova su sirbishi y bou di su cuido amoroso.” Algun tempo despues, tur e cuater miembronan di e famia Conrow a asisti na Scol di Galaad y a haya asignacion pa bay sirbi como misionero na Peru.

Henter e famia Battainos tambe tabata traha pionero. Ora cu Giusto cu Vincenza Battainos a haya sa cu nan tabata bay haya yiu, nan a transforma nan truck, un Ford Model A di 1929, den un cas; pa nan, e cas aki tabata manera un “bunita hotel” compara cu e tentnan cu nan tabata biba aden prome. Hunto cu nan yiu muher chikito, nan a sigui den nan asignacion cu nan tabata stima masha hopi mes: Nan tabata predica na e Italianonan cu tabata biba na Merca.

Hopi hende a scucha e bon noticia. Pero no ta tur ora e hendenan pober of sin trabou por a duna placa pa literatura basa riba Bijbel cu nan tabata ricibi. Na luga di esey, nan tabata duna tur sorto di cos. Dos pionero a menciona 64 diferente cos cu nan a haya cerca hende cu a mustra interes. E lista di cos cu nan a menciona tabata “manera un lista di inventario di un tienda.”

Fred Anderson a yega di predica na un cunukero kende tabata interesa den algun di nos bukinan. El a duna Fred un bril cu tabata di su mama pa e bukinan. Na e siguiente boerderij, Fred a topa un otro homber cu a mustra interes den nos literatura pero cu a bisa cu e no por lesa nan pasobra e no tin bril. Anto Fred a dun’e e bril cu el a caba di haya cerca e homber su bisiña y algun buki. E homber gustosamente a contribui tanto pa e bukinan como pa e bril cu tabata di gran yudansa p’e.

Herbert Abbott tabata core cu un haula di galiña bashi den su auto. Dicon? Pasobra despues cu e haya un tres pa cuater galiña como contribucion pa literatura cu e laga, e tabata bende esakinan na plasa y uza e placa pa yena su tanki di auto. El a skirbi: ‘Tabatin dia cu nos no tabatin ni un depchi, pero nos no a laga esaki stroba nos. Tanten cu nos tabatin gasolin den nos auto, nos tabata sigui predica, confiando den Jehova.’

Si, confianza den Jehova y determinacion fuerte a yuda nos rumannan persevera durante e añanan dificil ey. Durante un yobida fuerte, Maxwell cu Emmy Lewis a logra sali for di nan trailer net prome cu un palo grandi a cay riba esaki y partie na dos. Maxwell a bisa: ‘Nunca nos no a laga incidentenan asin’aki stroba nos ni nunca e idea di entrega no a pasa den nos mente. Tabatin hopi trabou nos dilanti y nos tabata determina pa cumpli cu nan.’ Cu curashi y cu yudansa di nan bon amigonan, Maxwell cu Emmy a reconstrui nan cas riba wiel.

Awe tambe, durante e tempo dificil aki cu nos ta biba aden, miyones di Testigo di Jehova celosamente ta desplega e mesun spirito di sacrificio propio. Dicon? Pasobra mescos cu e pioneronan ey di pasado, nos ta determina pa sigui predica te ora Jehova bisa cu e trabou ta cla.