E Tabata “Sa e Caminda”

GUY HOLLIS PIERCE, un miembro di e Cuerpo Gobernante di testigonan di Jehova, a termina su sirbishi aki riba Tera, diamars dia 18 di maart 2014. E tabatin 79 aña di edad. Y como cu e tabata un di e rumannan di Cristo, el a ser resucita pa biba den cielo.​—Heb. 2:10-12; 1 Ped. 3:18.

Guy Pierce a nace dia 6 di november 1934, na Auburn, California, Merca, y a batisa na aña 1955. Na 1977, el a casa cu Penny y hunto nan a lanta varios yiu. Pesey, e por tabata manera un tata pa hopi ruman. Na 1982, e cu su esposa stima, Penny, a bira pionero. Y na 1986 el a cuminsa sirbi como superintendente di circuito na Merca, y el a haci e trabou ey pa 11 aña largo.

Na 1997, Guy cu Penny Pierce a cuminsa sirbi como miembro di e famia di Betel na Merca. Ruman Pierce a traha den e Departamento di Sirbishi, y na 1998 el a cuminsa sirbi como ayudante den e Comite di Personal di Cuerpo Gobernante. Y dia 2 di october 1999, durante e reunion anual di Watch Tower Bible and Tract Society of Pennsylvania, nan a anuncia cu Ruman Pierce a ser nombra como miembro di Cuerpo Gobernante. Durante e ultimo añanan, el a sirbi den e comitenan di Personal, Redaccion, Publicacion y di Coordinador.

Semper Ruman Pierce tabatin un smile riba su cara y un bon sentido di humor. Debi na esey, hende di diferente rasa y cultura tabata sinti nan comodo cu ne. Sinembargo, e cualidadnan cu realmente a atrae hende na dje tabata su amor, su humildad, su respet pa Dios su ley- y principionan y su fe fuerte den Jehova. Pa Guy Pierce, tabatin mas chens pa solo keda sin sali cu e promesanan di Jehova keda sin cumpli; y e tabata kier pa tur hende na mundo sa esey.

Ruman Pierce tabata traha duro pa Jehova; e tabata lanta trempan y hopi bes e tabata sigui traha te anochi laat. El a biaha rond mundo pa anima su rumannan cristian; nunca e tabata mucho cansa pa dedica tempo na e miembronan di famia di Betel y na otro hende cu tabata kier disfruta di su compania of cu tabatin mester di su conseho of yudansa. Aunke hopi aña a pasa, ainda rumannan ta corda su hospitalidad, amistad y consehonan biblico cu nan a disfruta di dje.

Nos ruman y amigo stima a laga atras su casa, su seis yiunan, su nieto- y bisanietonan y un gran cantidad di yiu spiritual. Mark Sanderson, un otro miembro di Cuerpo Gobernante, a duna e discurso di entiero na Betel di Brooklyn diasabra dia 22 di maart 2014. El a papia entre otro di Ruman Pierce su speransa celestial y a lesa loke Hesus a bisa Su discipelnan: “Den cas di mi Tata tin masha hopi luga ... Ora mi bay y prepara un luga pa boso, lo mi bin bek y ricibi boso cerca mi, pa caminda mi ta, boso tambe por ta. Y caminda mi ta bay, boso sa e caminda.”​—Juan 14:2-4.

Si, nos lo sinti Ruman Pierce su falta masha hopi mes. Pero, nos ta contento cu e tabata “sa e caminda” cu ta hiba na su “luga” di biba permanente.