TOPICO PRINCIPAL | TIN BIDA DESPUES DI MORTO?

Kico Ta Sosode ora un Hende Muri?

Tanto hende grandi como mucha ta para rond di un caha di morto na un santana

“Mi tabata pensa cu tin tres caminda cu un hende por bay ora e muri: cielo, fierno of purgatorio. Mi tabata sa cu mi no ta suficiente bon hende pa bay cielo pero tampoco mi no ta dje mal hende ey pa bay fierno. Mi no tabata sigur kico exactamente purgatorio ta pasobra mi no a lesa nada tocante esey den Bijbel. E unico cos cu mi tabata sa ta loke hende ta bisa di dje.”—Lionel.

“Nan a siña mi cu tur hende ta bay cielo ora nan muri, pero ami no tabata convenci di esey. Ami tabata pensa cu morto ta fin di tur cos y cu no tin ningun speransa pa esnan cu a muri.”—Fernando.

Bo a yega di puntra bo mes: Kico ta pasa realmente ora un hende muri? Nos sernan keri cu a muri ta sufriendo? Nos lo mira nan algun dia? Con nos por ta sigur? Laga nos wak kico Bijbel ta siña realmente tocante: (1) e estado di e mortonan y (2) e speransa cu Bijbel ta duna.

Den ki estado e mortonan ta?

WAK KICO BIJBEL TA BISA: “E bibonan sa cu nan lo muri, ma e mortonan no sa nada, ni nan no tin recompensa mas, pasobra ningun hende no ta corda mas riba nan. Tur loke bo man haya pa haci, hacie cu tur bo forsa; pasobra no tin ni actividad ni planificacion ni sabiduria den Seol,a caminda bo ta bay.”—Eclesiastes 9:5, 10.

Cu poco palabra, Graf ta unda hende ta bay ora nan muri; esaki ta un luga simbolico of estado den cua un hende no por haci nada mas. Nan no por corda, sinti, tende ni mira. Kico Job tabata pensa cu e Graf ta? Den un dia el a perde tur su cosnan material, tur su yiunan y despues el a haya blufein na henter su curpa, locual tabata hopi doloroso. El a suplica Dios: “O cu bo lo a sconde mi den Seol [“Fierno”, Catholic Douay Version].” (Job 1:13-19; 2:7; 14:13) Bo ta mira claramente cu Job no a pensa cu e Graf ta un fierno di candela caminda e lo sufri mas ainda. Mas bien, el a pensa cu lo e haya alivio eyden.

Un otro manera cu nos por haya sa e estado di e mortonan ta door di lesa tocante e ocho resureccionnan cu nos ta haya den Bijbel.—Wak e cuadro “Ocho Resureccion Cu A Tuma Luga den Tempo Biblico.”

Ora e personanan ey a resucita, ningun di nan no a bisa cu nan a bay cielo ni un luga di tormento. Si esey tabata e caso, bo no ta kere cu nan lo a conta hende loke nan a experencia? Y bo no ta kere cu e relatonan ey lo ta skirbi den Bijbel pa tur hende lesa? Pero e echo cu Bijbel no ta menciona nada di esey ta mustra cu e ocho personanan ey no tabatin nada di conta ora nan a resucita. Dicon no? Pasobra nan tabata inconsciente, comosifuera morto na soño. Si, Bijbel tin biaha ta compara morto cu soño pa yuda nos compronde den ki estado e mortonan ta. Por ehempel, Bijbel ta bisa cu tanto David como Esteban, kendenan tabata sirbidornan fiel di Dios, “a bay sosega.”—Echonan 7:60; 13:36.

Ki speransa tin anto pa e mortonan? Nan por lanta for di morto?

a E palabra Hebreo Seol ta nifica Graf. Algun version di Bijbel ta uza e palabra “fierno”, pero e idea cu fierno ta un luga di tormento no ta biblico.

OCHO RESURECCION CU A TUMA LUGA DEN TEMPO BIBLICOb

Yiu homber di un viuda Profeta Elias a resucita e yiu homber di un viuda cu tabata biba na Sarepta, den e parti noord di Israel.—1 Reynan 17:17-24.

Un mucha homber Sunamita E sucesor di Elias, esta profeta Eliseo, a resucita un mucha homber den e stad di Sunem. Y asina e mayornan a haya nan yiu bek.—2 Reynan 4:32-37.

Un homber cu nan a tira den e graf di Eliseo Nan a tira curpa di un homber, cu a caba di muri, den e graf di Eliseo. Ora e curpa di e homber a mishi cu e profeta su wesonan, e homber a resucita.—2 Reynan 13:20, 21.

E yiu homber di e viuda di Nain Ora un grupo di hende tabata riba caminda pa bay dera e yiu homber di un viuda pafo di Nain, Hesus a para nan. El a resucita e yoncuman y a entreg’e bek na su mama.—Lucas 7:11-15.

E yiu muher di Jairo Un presidente di sinagoga cu yama Jairo a suplica Hesus pa yuda su yiu muher cu tabata muriendo. Hesus a resucita e yiu muher un poco despues cu el a muri.—Lucas 8:41, 42, 49-56.

Lazaro, Hesus su bon amigo Lazaro tabatin cuater dia morto ora cu Hesus a resucit’e dilanti di un multitud.—Juan 11:38-44.

Dorcas Apostel Pedro a resucita e señora tan stima aki. Dorcas tabata conoci pa e echo cu e tabata gusta haci bon obra.—Echonan 9:36-42.

Eutico E hoben Eutico a muri ora el a cay for di e di tres piso; apostel Pablo a lant’e for di morto.—Echonan 20:7-12.

b Manera nos lo mira den e siguiente articulo, e diferencia entre e resureccion di Hesucristo y e ocho otro resureccionnan ta basta grandi. Nos lo mira cu esun di Hesus ta esun di mas importante.