BO TABATA SA?
Ta berdad cu na Pentecoste di aña 33 e Hudiunan cu a bay Jerusalem a bin “di tur nacion di mundo”?
Yen di hende riba caya na Jerusalem na Pentecoste di aña 33
E relato biblico na Echonan 2:5 te cu 11 ta papia di e multitud di hende cu a bay Jerusalem na Pentecoste di aña 33. Y Filo, un escritor Hudiu di e tempo ey, tambe a papia tocante esey.
Filo a skirbi tocante e hendenan cu tabata biaha bay Jerusalem: “Gran cantidad di hende tabata bin for di hopi stad na parti oost, west, noord y zuid pa bay e fiestanan; tin tabata cana na pia y otronan tabata yega via lama.” Tambe el a cita for di un carta cu Agripa I, nieto di Herodes e Grandi, a manda pa e Emperador Romano Caligula. Den e carta ey, Agripa a skirbi tocante Jerusalem: “E Stad Santo ... no ta solamente e capital di Judea, sino di mayoria di otro pais tambe, ya cu den transcurso di tempo hopi Hudiu a bay biba na paisnan bisiña pa forma colonia.”
Agripa a traha un lista di algun area caminda colonianan Hudiu a ser estableci, hasta na luganan leu manera Mesopotamia, Noord Africa, Asia Menor, Grecia y islanan Mediteraneo. E experto Joachim Jeremias a bisa cu “maske e lista aki no ta papia specificamente di e biahenan pa Jerusalem, ta esey Agripa lo mester tabatin na mente ya cu tur Hudiu tabata obliga pa biaha bay eynan.”—Deuteronomio 16:16.
Na unda e miles di hendenan cu a bay Jerusalem pa celebra e fiestanan Hudiu tabata keda?
Ruina di un luga di baña cu a ser haya na Jerusalem
Tur aña, e Hudiunan tabata celebra tres fiesta na Jerusalem: e Pasco Hudiu, Pentecoste y e Fiesta di Tabernakel. Den e prome siglo, un gran cantidad di hende a bay Jerusalem pa celebra e fiestanan ey. Nan tabata bin for di tur parti di Israel y tambe for di otro pais caminda tabatin Hudiu ta biba. (Lucas 2:41, 42; Echonan 2:1, 5-11) Tur e hendenan aki mester a busca un luga di keda.
Algun di nan tabata pasa anochi cerca amigo y otronan tabata keda na un posada of na un cas di huesped. Hopi tabata keda den tent parti paden of pafo di e murayanan di e stad. Durante Hesus su ultimo bishita na Jerusalem, el a keda den e stad di Betania cu tabata den cercania.—Mateo 21:17.
Diferente edificio cu tabatin luganan di baña a ser descubri banda di e tempel. Aparentemente e edificionan aki tabata casnan di huesped caminda e Hudiunan por a keda y baña prome cu nan a drenta tempel. Un inscripcion cu a ser haya den un di e edificionan aki ta indica cu Teodoto, un sacerdote y lider di e sinagoga local, “a traha e sinagoga pa lesamento di Tora y ... a traha posada, incluso camber y luga di baña pa e biaheronan cu tabatin mester di un luga di keda.”