Pedro Tabata e Prome Papa?

PA MIYONES di catolico rond mundo, e decreto di 1870 di e prome Concilio di Vaticano ta un dogma di iglesia, esta, un doctrina cu no por cambia y cu hende mester obedece. Pero ta bon pa nos haci nos mes e preguntanan aki: Esaki ta un siñansa basa riba Bijbel? Papa Francisco realmente ta sucesor di apostel Pedro? Pedro tabata e prome papa?

“RIBA E BARANCA AKI LO MI TRAHA MI IGLESIA”

E decreto di 1870 di e Concilio di Vaticano tabata basa riba su interpretacion di Mateo 16:16 pa 19 y Juan 21:15 pa 17. E combersacionnan entre Hesus y Pedro den e textonan aki y tambe otro textonan di Bijbel ta laga nos compronde cu apostel Pedro a hunga un papel importante na principio di historia di cristianismo. En realidad, e prome biaha cu nan a topa cu otro, Hesus a profetisa cu Pedro lo tabata fuerte y firme manera baranca. (Juan 1:42) Pero esey kiermen cu Cristo a duna Pedro maximo autoridad?

Na Mateo 16:17 y 18, Hesus a bisa Pedro: “Mi ta bisa bo cu abo ta Pedro [cu ta nifica “baranka”, BPK], y riba e baranca aki lo mi traha mi iglesia.”a Acaso Hesus tabata kiermen cu e lo a lanta su “iglesia”, of congregacion, riba Pedro, un ser humano? Pedro lo a bira cabes di tur siguidor di Hesus? Kico e otro apostelnan presente a compronde for di e palabranan di Hesus? Den e Evangelionan nos por lesa cu na varios ocasion e apostelnan tabata discuti tocante ken tabata esun di mas grandi. (Mateo 20:20-27; Marco 9:33-35; Lucas 22:24-26) Si Hesus a duna Pedro maximo autoridad of si e tabata superior na e otro apostelnan, lo tabatin motibo pa nan discuti ken tabata esun di mas grandi?

Con Pedro mes a compronde e palabranan di Hesus? Como cu Pedro a lanta como Israelita, e mester tabata conoce diferente profecia di e Scritura Hebreo cu ta papia di un “piedra” of un “piedra-di-skina.” (Isaias 8:13, 14; 28:16; Zacarias 3:9) Ora Pedro a cita un di e profecianan ey den un carta na su compañeronan cristian, el a splica cu e “piedra-di-skina” profetisa den e Scritura tabata Hesucristo, e Mesias. Pedro a uza e termino Griego “petra” (e mesun palabra cu Hesus a uza na Mateo 16:18) pa referi solamente na Hesus.—1 Pedro 2:4-8.

Apostel Pablo tabata un otro fiel siguidor di Hesus. Acaso Pablo a kere cu Hesus a duna Pedro maximo autoridad? Pablo a reconoce e papel cu Pedro a hunga den e congregacion cristian di prome siglo y a skirbi cu Pedro tabata entre esnan cu a “wordo considera di ta pilarnan.” Pues pa Pablo, tabatin mas cu un “pilar.” (Galationan 2:9) Ademas, si Hesus a nombra Pedro como cabes di e congregacion, con por ta cu su rumannan cristian a djis consider’e como un pilar?

Ora Pablo a skirbi tocante e echo cu Pedro a trata cierto hende cu faboritismo, Pablo a bisa na un manera respetuoso y franco: “Mi a opon’e abiertamente, pasobra e tabata robes.” (Galationan 2:11-14) Pues, Pablo no tabatin na mente cu Cristo a lanta su iglesia, of congregacion, riba Pedro ni riba niun otro homber imperfecto. Al contrario, pa Pablo, Hesucristo tabata e fundeshi di e congregacion, y e tabata convenci cu “e baranca tabata Cristo.”—1 Corintionan 3:9-11; 10:4.

“ABO TA PEDRO ...”

Pues, con nos mester compronde e palabranan: “Abo ta Pedro, y riba e baranca aki lo mi traha mi iglesia”? Pa nos por compronde e texto aki bon, nos tin cu lesa su contexto. Di kico Hesus y Pedro tabata papiando? Hesus a caba di puntra su discipelnan: “Ken boso ta bisa cu ami ta?” Sin pensa dos biaha, Pedro a contest’e: “Abo ta e Cristo, Yiu di e Dios bibo.” Hesus a elogia Pedro pa esey y Hesus a bis’e cu e lo traha su “iglesia”, of congregacion, riba un “baranca” mucho mas solido. Y Pedro a mustra fe den Hesus, kende ta e baranca ey.—Mateo 16:15-18.

Pesey, hopi “pader di iglesia” a yega na e mesun conclusion. Nan tambe a skirbi cu e baranca cu Mateo 16:18 ta papia di dje ta Cristo. Por ehempel, den siglo 5, Agustin, kende tabata un pader di iglesia, a skirbi: “Señor a bisa: ‘Riba e baranca aki lo mi traha mi iglesia’, pasobra Pedro a bis’e: ‘Abo ta e Cristo, Yiu di e Dios bibo.’ Ta pesey, ta riba e baranca aki, cu bo a reconoce, lo mi traha mi iglesia.” Agustin a bisa varios biaha cu “e baranca (petra) tabata Cristo.”

Si mester a husga Agustin y otro hende segun e doctrina catolico di nos tempo, nan lo a considera nan como un set di rebelde. Segun e teologo Suiso Ulrich Luz, expertonan riba tereno di Bijbel awe tin e mesun opinion cu Agustin. Pero segun e decreto di 1870 di e Concilio di Vaticano nan lo a ser considera apostata.

PAPA TA E SUCESOR DI PEDRO?

Apostel Pedro no tabata conoce e titulo “papa” mes. Te den siglo 9, hopi obispo cu no tabata Romano a duna nan mes e titulo ey. Pero ta te na fin di siglo 11 a bin uza e titulo ey como un titulo oficial. Ademas, ningun cristian di prome siglo tabata pensa cu un sucesor a haya e maximo autoridad cu supuestamente Pedro lo a haya. Pesey e experto Aleman Martin Hengel a yega na e conclusion cu “ni historia ni teologia no ta duna prueba con papa a logra haya ‘maximo autoridad.’”

Pues, Pedro tabata e prome papa? E tabatin sucesor? E dogma catolico cu papa tin maximo autoridad ta basa riba Bijbel? E unico contesta corecto pa tur e preguntanan aki ta no. Sin duda, Hesus a funda su iglesia, esta su congregacion berdadero. Y e mes ta e fundeshi. (Efesionan 2:20) Pesey, cada un di nos mester haci nos mes e pregunta importante aki: Mi a haya e iglesia berdadero?