TOPICO PRINCIPAL | DICON BO MESTER TA HONESTO?

Falta di Honestidad—Ki Efecto E Tin Riba Bo?

“Hopi biaha un mentira chikito por scapa bo for di un situacion dificil.”—Samantha, Sur Africa.

Bo ta di acuerdo cu esey? Mescos cu Samantha, nos tur a yega di haya nos mes den un situacion dificil. Pero, e manera cu nos ta reacciona den un situacion asina ta mustra ki tipo di hende nos ta. Por ehempel, si tur loke nos ta interesa den dje ta pa scapa cara, nos por pensa cu falta di honestidad ta un manera hustifica pa logra loke nos kier. Pero, ora e berdad sali na cla, nos lo tin cu enfrenta e consecuencianan. Laga nos considera algun di nan.

DESHONESTIDAD TA KIBRA CONFIANZA

Un relacion of amistad entre dos persona ta basa riba confianza. Ora nan ta confia otro, nan ta sinti nan mes safe. Pero, e confianza ey no ta bin di un dia pa otro. E ta crece ora nan ta pasa tempo hunto, ta papia habri cu otro y ta trata otro sin egoismo. Pero un solo mentira of cualkier otro acto deshonesto por kibra e confianza ey. Anto ora e confianza ey kibra, ta hopi dificil pa hay’e atrobe.

Un persona cu bo a kere ta bo bon amigo a yega di engaña bo? Si ta asina, con bo a sinti bo? Casi sigur bo a sinti bo hurt of hasta traiciona. Esey ta di compronde. Pues sin duda, falta di honrades por destrui e relacionnan di mas cera.

DESHONESTIDAD TA CONTAGIOSO

Un estudio cu Robert Innes, un profesor di economia na e Universidad di California, a haci a indica cu “deshonestidad ta contagioso.” Bo por compar’e cu un virus. Mas bo anda cu un persona cu ta deshonesto, mas chens bo tin di pega cu deshonestidad.

Con anto bo por evita di bira deshonesto? Bijbel por yuda bo. Pesey, laga nos considera algun principio di Bijbel.

Formanan di Deshonestidad

Gañamento

KICO E TA? Bisa algo incorecto na un persona cu tin derecho di sa e berdad. E por ta tambe, duna un idea robes of troce e berdad pa engaña un persona, laga informacion importante afo pa bruha un hende y exagera e berdad pa laga parce algo cu no ta.

LOKE BIJBEL TA BISA: “E persona tramposo ta un cos detestabel pa Jehova, pero Su intimidad ta cu esnan recto.” (Proverbionan 3:32, NW) “Awor cu boso a pone gañamento un banda, boso cada un papia berdad cu su prohimo.”—Efesionan 4:25.

Calumnia

KICO E TA? Lanta acusacion falso cu ta difama y daña reputacion di otro hende.

LOKE BIJBEL TA BISA: “Un hende perverso ta sembra pleito, y un hacido di redo ta separa amigonan intimo.” (Proverbionan 16:28) “Pa falta di palo, candela ta paga, y caminda no tin hacido di redo, pleito ta stop.”—Proverbionan 26:20.

Fraude

KICO E TA? Uza pretexto pa bay cu placa of pertenencia di otro hende.

LOKE BIJBEL TA BISA: “No oprimi [of, estafa, NW] un sirbidor contrata cu ta pober y den necesidad.” (Deuteronomio 24:14, 15) “Esun cu oprimi [of, estafa, NW] e pober ta insulta Esun cu a trah’e, ma esun cu tene misericordia di esun den necesidad ta honr’e.”—Proverbionan 14:31.

Hortamento

KICO E TA? Coy algo cu ta pertenece na otro hende sin su permiso.

LOKE BIJBEL TA BISA: “Laga esun cu ta horta, no horta mas; mas bien, lag’e traha duro, haciendo trabou honrado cu su mannan, pa e por tin algo di comparti cu esun cu ta den necesidad.” (Efesionan 4:28) “No gaña boso mes ... Ni ladron, ni hende golos, ni burache, ni hende cu ta cana zundra, ni hende cu ta chantahia otronan lo no ricibi e Reino di Dios.”—1 Corintionan 6:9, 10.