Nan A Ofrece Nan Mes di Buena Gana pa Sirbi na Paisnan di Ocean Pacifico

RENEÉ, un ruman muher di Australia di rond di 35 aña di edad, a lanta den un famia testigo di Jehova hopi activo den e sirbishi di Dios. El a conta: “Nos a muda varios biaha pa bay biba caminda tabatin mester di mas predicador di Reino. Mi mayornan semper a percura pa nos pasa dushi tempo hunto, y nos tabatin un bida interesante y emocionante. Ora mi mes a bira mama, mi tabata kier pa mi yiunan tambe tin un bida dushi asina.”

Shane, e casa di Reneé, tin casi 40 aña, y e tambe tabatin e mesun meta spiritual. El a bisa: “Despues cu nos di dos yiu a nace, nos a lesa den un Toren di Vigilancia tocante un famia testigo di Jehova cu a bay predica cu nan yate na e islanan di Tonga, den zuidwest di Ocean Pacifico.a E articulo ey a motiva nos pa skirbi tanto e sucursal di testigonan di Jehova na Australia como esun na Nueva Zelandia pa puntra nan na unda tabatin mester di mas ruman pa predica.b Wel, nan a pidi nos pa bay Tonga, net e luga cu nos a lesa di dje den e revista.”

Shane cu Reneé, hunto cu nan dos yiunan, Jacob y Skye, a biba mas o menos un aña na Tonga. Ora cu a surgi un serie di disturbio politico eynan, nan a haya nan obliga di bay Australia bek. Pero toch nan a keda cu e meta di haci mas den e sirbishi di Jehova. Na 2011, nan a bay biba na Norfolk Island, un isla chikito den Ocean Pacifico cu ta keda un 1.500 kilometer oost di Australia. Con a bay cu nan eynan? Jacob, cu awor tin 14 aña, a bisa: “Jehova no solamente a percura pa nos, sino tambe el a laga nos pasa masha dushi mes den sirbishi.”

UN PROYECTO DI FAMIA

Mescos cu e famia ey, tin hopi mas famia cu a ofrece nan mes pa bay sirbi caminda tin mas necesidad di predicador. Kico a motiva nan pa haci esey?

Burnett cu Simone ta un pareha di rond di 35 aña di edad. Nan a muda pa Burketown, un pueblo aisla na Queensland, Australia, hunto cu nan dos yiu hombernan, Eston (12 aña) y Caleb (9 aña). Burnett a splica dicon: “Testigonan di Jehova tabata bay predica eynan cada tres pa cuater aña. Tabatin hopi hende interesa den e bon noticia, y nos kier a duna nan e chens di tin un estudio di Bijbel riba un base regular.”

Mark cu Karen, kendenan awor tin 50 y pico aña, a sirbi den varios congregacion cerca di Sydney, Australia, prome cu nan a muda pa Nhulunbuy, un comunidad minero aisla den e Teritorio den Noord. Nan a bay eynan hunto cu nan tres yiunan, Jessica, Jim y Jack. Mark a conta: “Mi ta stima hende, pesey mi kier a bay un luga caminda tin hopi trabou pa haci den congregacion y den sirbishi.” Pero Karen tabata duda pa bay. El a bisa: “Pero despues cu Mark y otro rumannan a anima mi, m’a dicidi di purba toch. Awor mi ta contento cu mi a haci esey.”

Na 2011, Benjamin cu Carolyn hunto cu nan dos yiu muhernan chikito, Jade y Bria, a muda di Queensland, Australia, bek pa Oost Timor. Benjamin a conta cu e cu su casa a sirbi anteriormente como pionero special na Oost Timor. Y el a bisa: “E trabou di predica tabata fascinante, y e rumannan tabata apoya nos bon. A duel nos hopi ora nos mester a bay for di eynan, pero nos tabata determina pa bolbe bek. Despues, ora cu nos a haya yiu, nos mester a warda un poco cu nos plannan, pero nos no a cambia nan.” Carolyn a agrega: “Nos tabata kier pa nos yiunan lanta hunto cu rumannan cu ta misionero, betelita y pionero special y pa nan sirbishi na Jehova ta un experencia sumamente placentero.”

PREPARA BON PROME CU MUDA

Hesus a bisa su siguidornan: “Cua di boso cu kier traha un toren no ta sinta calcula e gasto prome pa wak si e tin suficiente pa cab’e?” (Luc. 14:28) Asina tambe, ora un famia tin pensa di muda pa un otro luga, ta masha importante pa nan plania bon. Kico asina e preparacion ta encera?

DEN SENTIDO SPIRITUAL: Benjamin a bisa: “Nos kier a bay pa sirbi e rumannan, no pa ta un carga pa nan. Pesey, prome cu nos a muda, nos a percura pa edifica nos mes den sentido spiritual. Tambe nos a dedica mas tempo na sirbishi y na otro actividadnan di congregacion.”

Jacob, menciona anteriormente, a conta: “Prome cu nos a bay biba na Norfolk Island, nos a lesa hopi storia di bida den E Toren di Vigilancia y ¡Despertad! tocante famianan cu a bay sirbi caminda tabatin mester di mas predicador. Nos a papia tocante e dificultadnan cu nan a haya nan cu ne y con Jehova a yuda nan.” Jacob su ruman muher Skye, di 11 aña, a agrega: “Ami a haci hopi oracion, tanto mi so como hunto cu Mami cu Papi.”

DEN SENTIDO EMOCIONAL: Reneé a conta: “Nos tabata biba den un area cu mi tabata gusta hopi, pega cu mi famia y amigonan. Lo tabata facil pa mi keda biba eynan. Pero en bes di concentra riba loke mi tabata bay perde, mi a pensa riba e beneficionan cu e mudamento lo tabatin pa mi famia.”

DEN SENTIDO CULTURAL: Hopi famia ta cuminsa busca informacion tocante e luga caminda nan ta bay biba pa prepara nan mes. Mark a bisa cu nan a lesa tur loke nan por a haya tocante Nhulunbuy. Ademas, e rumannan di Nhulunbuy a manda corant di e stad pa nan, ya asina nan por a familiarisa nan mes cu e hendenan local y cu nan cultura.

Shane, kende a bay biba na Norfolk Island, a agrega: “Mas cu tur cos, mi a purba di demostra cualidadnan cristian. Mi tabata sa cu si mi ta sincero, amabel, honesto y trahador, lo mi por a pas den cualkier cultura na mundo.”

E DIFICULTADNAN

Rumannan cu tabatin exito ora nan a bay predica na otro luga ta enfatisa e importancia di ta flexibel y positivo ora topa cu dificultadnan inespera. Laga nos wak algun ehempel:

Reneé a bisa: “M’a siña cu tin mas manera di haci cierto cos. Por ehempel, ora lama ta bruto na Norfolk Island, e barconan no por drenta waf y comestibel ta bira scars y mas caro. Pues, mi mester a siña cushina cu loke tin den cas.” Shane, casa di Reneé, a agrega: “Tambe nos mester a ahusta nos manera di gasta placa, pa asina nos keda den nos budget di siman.”

Nan yiu, Jacob, a menciona un otro dificultad. El a bisa: “Den nos congregacion nobo tabatin solamente shete ruman mas; tur tabata hende grandi. Pues, mi no tabatin niun amigo di mi edad. Pero despues cu mi a traha cu e rumannan den sirbishi, nos a bira bon amigo di otro.”

Algo similar a pasa cu Jim, kende awor tin 21 aña. El a bisa: “E congregacion di mas cerca di Nhulunbuy ta keda 725 kilometer leu, pues nos ta probecha lo maximo ora nos tin asamblea of congreso. Nos ta yega trempan pa nos por disfruta di e compania di e rumannan. E ocasionnan ey ta e momentonan di mas emocionante di aña.”

“CONTENTO CU NOS A BIN AKINAN”

Rond mundo tin masha hopi ruman cu a bay yuda predica na otro luga, y nan a mira pa nan mes cu “ta e bendicion di [Jehova] ta haci rico”, manera Bijbel ta bisa.—Prov. 10:22.

Mark a bisa: “E bendicion di mas grandi tabata e efecto cu nos mudamento tabatin riba nos yiunan. Nos dos yiunan mas grandi tin pleno confianza cu Jehova ta cuida esnan cu pone e Reino na prome luga. E confianza ey ta algo cu placa no por cumpra.”

Shane a comenta: “Mi ta hopi mas pega cu mi casa y cu mi yiunan. Ora mi tende nan conta kico Jehova a haci pa nan, mi ta sinti un gran satisfaccion.” Su yiu Jacob a agrega: “Mi a pasa asina dushi! Mi ta hopi contento cu nos a bin akinan.”