Un Regalo Unico

E SLIJPER cu forma di boto den man di Jordan no tabata parce algo dje special ey. Sinembargo, e slijper aki tabata un di e cosnan di mas valioso cu e tabatin. Jordan a bisa: “Ta Russell, un amigo di cas di edad avansa, a duna mi e slijper aki tempo mi tabata chikito.” Despues di Russell su morto, Jordan a haya sa cu Russell tabata un gran yudansa pa Jordan su welo y mayornan den momentonan di dificultad. Jordan a bisa: “Awor cu mi sa mas tocante Russell, e regalo chikito aki tin mas balor cu nunca pa mi.”

E experencia di Jordan ta mustra cu pa algun hende un regalo kisas tin poco of ningun balor. Pero pa esun cu a hay’e y cu tin un curason agradecido, e por ta algo precioso, of hasta impagabel. Bijbel ta describi un regalo di gran balor cu e siguiente palabranan conoci aki: “Dios a stima mundo asina tanto cu el a duna su Yiu unigenito, pa tur cu pone fe den dje no bay perdi, ma haya bida eterno.”—Juan 3:16.

Figura bo, e regalo aki por duna un hende bida eterno! Ta existi un regalo mas valioso cu esey? Aunke algun hende kisas no ta mira e balor di e regalo aki, cristiannan berdadero si ta mir’e como algo “precioso”, of “costoso.” (Salmo 49:8; 1 Pedro 1:18, 19) Pero, dicon Dios a ofrece e bida di su Yiu como un regalo pa humanidad?

Apostel Pablo ta splica esaki cu e siguiente palabranan: “Pa medio di un hende pica a drenta mundo, y morto pa medio di pica, y asina morto a pasa pa tur hende.” (Romanonan 5:12) E prome homber, Adam, a peca ora cu conscientemente el a desobedece Dios, y pesey el a haya e castigo di morto. Pa medio di Adam, morto a pasa pa tur su descendientenan, esta, pa henter humanidad.

Bijbel ta bisa: “E salario cu pica ta paga ta morto, ma e regalo cu Dios ta duna ta bida eterno pa medio di Cristo Hesus, nos Señor.” (Romanonan 6:23) Pa libra hende for di e condena di morto, Dios a manda su Yiu, Hesucristo, na Tera pa e sacrifica su bida perfecto pa humanidad. Anto a base di e sacrificio ey, conoci como “e rescate”, tur hende cu pone fe den Hesus lo haya bida eterno.—Romanonan 3:24.

Relaciona cu tur e bendicionnan cu Dios ta duna su sirbidornan mediante Hesucristo, Pablo a declara: “Nos ta gradici Dios pa su regalo cu nos no por describi cu palabra.” (2 Corintionan 9:15) Si, e rescate ta un regalo asina extraordinario cu nos no tin palabra pa describie. Pero di tur e regalonan cu Dios a duna humanidad generosamente, dicon e rescate ta asina sobresaliente? Kico ta hacie diferente for di cualkier otro regalo di Dios?a Y kico esaki mester motiva nos pa haci? E siguiente dos articulonan lo contesta e preguntanan aki.