Bou di e gobierno di Dios, henter creacion tabata uni y na paz cu otro

Dicon Nos Tin Mester di e Reino di Dios?

Na comienso di historia humano, nos Creador, kende su nomber ta Jehova, tabata e unico Gobernante. Tur loke cu el a haci pa hende ta pasobra e ta stima nan. El a traha un bunita hofi den Eden pa nan biba den dje. Y el a zorg tambe pa nan por tin un gran cantidad di cuminda. Ademas, el a duna hende trabou agradabel pa haci. (Genesis 1:28, 29; 2:8, 15) Si hende no a rebeldia contra e gobierno amoroso di Dios, henter creacion lo a keda uni y na paz cu otro.

Adam tin e fruta prohibi cu Eva a dun’e den su man. — E prome hendenan a rechasa Dios como nan Gobernante

Bijbel ta conta con un angel rebelde, cu despues a ser yama Satanas e Diabel, a cuestiona Dios su derecho di goberna. El a insinua cu hende lo ta mas feliz sin Dios su guia y gobernacion. Lamentablemente, nos prome mayornan, Adam cu Eva, a sigui Satanas su mal ehempel y a rebeldia contra Dios.—Genesis 3:1-6; Revelacion 12:9.

Y door cu Adam cu Eva a rechasa Dios como nan Gobernante, nan a perde e oportunidad di biba pa semper y di tin salud perfecto. (Genesis 3:17-19) Ademas, nan decision a afecta e yiunan cu nan a haya despues. Bijbel ta bisa cu door cu Adam a peca “pica a drenta mundo, y morto pa medio di pica.” (Romanonan 5:12) Pica a hiba na un otro consecuencia teribel: “Hende a eherce autoridad riba ... otro hende pa su daño.” (Eclesiastes 8:9) Cu otro palabra, ora hende goberna otro hende, semper lo tin problema.

CON GOBERNACION DI HENDE A CUMINSA

Nimrod para na un manera arogante. Den background, hende ta construyendo un edificio. — Nimrod a rebeldia contra Jehova

E prome gobernante humano cu Bijbel ta menciona ta Nimrod. El a rebeldia y a mustra cu e no tabata kier pa Jehova goberna riba hende. Desde e tempo ey padilanti, hombernan poderoso a uza nan poder pa causa daño na otro hende. Un 3.000 aña pasa, e Rey sabi Salomon a skirbi: “Mi a wak e lagrimanan di esnan oprimi, y cu nan no tabatin ni un hende pa consola nan; y pa banda di nan opresornan tabatin poder.”—Eclesiastes 4:1.

E situacion no a cambia. Na 2009, un publicacion di Nacionnan Uni a bisa cu mas y mas mal gobernacion ta ser mira como “un di e causanan principal cu cos malo ta sosode na mundo awe.”

CAMBIO TA NA CAMINDA

Mundo tin mester di mihor gobernantenan y un mihor forma di gobernacion. Y esey ta exactamente loke nos Creador a priminti.

Collage: E resultado di gobernacion humano. 1. Un hende muher di Asia ta sinta den un caya sushi y tin un baby cu ta yora den su brasa teni. 2. Un hende di edad cu ta malo riba cama den hospital. 3. Soldaatnan ta tira cu nan armanan den campo di bataya. 4. Hende cu ta protesta ta grita y tin spandoek wanta den nan man. 5. Un hende muher y su yiu muher ta para pafo di nan cas, y a haya bentana di nan porta di cas kibra. 6. Un ciudad yen di huma tin schoorsteen di fabrica y waya di coriente. — Hasta e mihor gobiernonan di hende no a logra soluciona e problemanan grandi di humanidad

Dios a establece un Reino, of un gobierno, cu lo reemplasa tur gobierno di hende, y “e mes lo dura pa semper.” (Daniel 2:44) Esaki ta e Reino cu miyones di hende ta pidi p’e den oracion. (Mateo 6:9, 10) Pero Dios mes lo no goberna; el a nombra un persona cu a yega di biba riba Tera pa bira Gobernante. Ken Dios a scoge? Ban wak.