Scoge pa Apoya e Reino di Dios Awor!
Imagina cu un horcan cu por causa hopi daño ta biniendo den direccion di nos isla. Gobierno ta duna un spiertamento urgente: “EVACUA! BUSCA UN LUGA SAFE AWOR!” Kico lo ta bon pa haci? Siguramente lo ta bon pa bay un caminda cu ta safe, no ta berdad?
Den un sentido, nos tur lo experencia un “tormenta” grandi, locual Hesus a yama un “tribulacion grandi.” (Mateo 24:21) Y aunke nos no por scapa di e tormenta aki, loke si nos por haci ta busca refugio. Con?
Den Hesus su Sermon Riba Sero, el a conseha: “Sigui busca anto prome e Reino y e husticia di Dios.” (Mateo 6:33) Con nos por haci esey?
Busca prome e Reino di Dios. Esey kiermen cu nos mester mira e Reino di Dios como e cos di mas importante den nos bida. (Mateo 6:25, 32, 33) Dicon nos mester tin e punto di bista ey? Pasobra hende simplemente no por resolve e problemanan di humanidad. Ta e Reino di Dios so por logra e tarea dificil ey.
Busca e husticia di Dios. Purba di haci esfuerso pa sigui Dios su leynan y principionan. Dicon? Pasobra si nos dicidi pa nos mes kico ta bon y kico ta malo, e resultado lo ta desastroso. (Proverbionan 16:25) Pero si nos biba segun Dios su normanan, nos lo haci Dios feliz y nos mes tambe lo ta mas feliz.—Isaias 48:17, 18.
Sigui busca prome e Reino y e husticia di Dios. Hesus a adverti cu algun hende lo ser distrai, pensando cu si nan haya hopi placa, nan lo tin siguridad. Otronan kisas ta dedica asina hopi tempo na resolve nan problemanan cu nan no tin tempo pa busca e Reino di Dios.—Mateo 6:19-21, 25-32.
Sinembargo, Hesus a priminti cu hende cu ta apoya e Reino di Dios lo haya loke nan tin mester awor y ricibi bendicionnan pa semper den futuro.—Mateo 6:33.
Aunke Hesus su discipelnan den prome siglo a busca e Reino y e husticia di Dios prome, nan no a wak e fin di tur dolor y sufrimento den nan tempo. Pero loke si nan a haya ta proteccion. Con?
Nan a biba segun Dios su normanan husto, y pesey nan no tabatin e problemanan cu e hendenan cu no a obedece Dios tabatin. Nan fe fuerte cu e Reino lo bin a yuda nan enfrenta hasta problema hopi dificil. Y Dios a duna nan “e poder cu ta surpasa esun di hende” pa deal cu e problemanan ey.—2 Corintionan 4:7-9.
ABO LO BUSCA E REINO DI DIOS PROME?
E cristiannan di prome siglo a sigui Hesus su mandato pa busca e Reino di Dios prome y nan a predica e bon noticia di Reino den e area caminda nan tabata biba. (Colosensenan 1:23) Tin hende cu ta predica e bon noticia den nos tempo?
Si! Testigonan di Jehova sa cu pronto e Reino di Dios lo pone un fin na e mal sistema aki. Pesey nan ta haci tur loke nan por pa cumpli cu e palabranan di Hesus: “E bon noticia aki di e Reino lo ser predica den henter e Tera habita, como testimonio pa tur nacion, anto e fin lo yega.”—Mateo 24:14.
Kico abo lo haci ora bo tende e bon noticia di Reino? Nos ta encurasha bo pa imita e habitantenan di prome siglo di Berea, un stad na Macedonia. Ora nan a tende e bon noticia di e Reino for di Apostel Pablo, “nan tabata masha ansioso pa acepta” e mensahe. Despues, nan “tabata analisa e Scritura [cuidadosamente]” pa haci sigur cu e mensahe cu Apostel Pablo a duna nan tabata realmente den Bijbel y nan a pone na practica loke nan a siña.—Echonan 17:11, 12.
Abo por haci mescos. Si bo busca e Reino y e husticia di Dios prome, bo lo haya proteccion for di awor y disfruta di paz y siguridad pa semper den futuro.