CON NOS POR YUDA VENCE ODIO?

1 | Sea Imparcial

Loke Bijbel Ta Bisa:

“Dios no ta haci distincion di persona, sino cu e ta acepta tur hende di tur nacion cu ta tem’e y cu ta haci loke ta corecto.”—ECHONAN 10:34, 35.

Kico Esey Ta Nifica?

Jehovaa Dios no ta husga nos a base di nos nacionalidad, color di cuero of cultura. Mas bien, e ta enfoca riba loke realmente ta importante—e persona cu nos ta di paden. Si, “hende ta mira loke un persona ta di pafo, pero Jehova ta wak curason.”—1 Samuel 16:7.

Loke Bo Por Haci:

Aunke nos no por lesa curason di hende, nos por purba di imita Dios su punto di bista imparcial di hende. Purba di mira cada persona individualmente en bes di mira nan como un grupo specifico. Si bo ta ripara cu otro hende, kisas hende di un otro nacionalidad, ta lanta sintimento negativo den bo, haci oracion na Dios y pidie pa yuda bo saca e tipo di sintimentonan ey for di bo curason. (Salmo 139:23, 24) Si bo pidi Jehova di curason pa yuda bo ta imparcial, bo por tin sigur cu lo e scucha bo oracion y yuda bo.—1 Pedro 3:12.

a Bijbel ta bisa cu Dios su nomber ta Jehova.—Revelacion 4:11.

“Nunca prome mi a yega di sinta banda di un persona color cla y sinti mi na paz ... Awor mi a bira parti di un berdadero hermandad internacional.”—TITUS

Experencia—TITUS

A Vence Odio

Titus tabata miembro di un gang violento cu tabatin hopi rabia riba e leynan cu tabata separa hende color cla for di hende color scur. El a bisa: “Nos tabata bay na luganan den stad caminda hende color scur no tabatin mag di bay, manera hotel y bar, djis pa busca pelea.” Titus a reconoce cu e tabatin hopi odio den su curason; pesey e tabata masha violento. El a sigui bisa: “Si mi tabatin un desacuerdo cu un hende, sea ta homber of muher, di biaha mi kier a bringa.”

Titus a cuminsa haci cambio ora el a cuminsa studia Bijbel cu testigonan di Jehova. Ora e tabata lesa Bijbel, el a cuminsa pensa y sinti diferente. Loke mas a conmov’e ta e promesa cu lo tuma luga aki riba Tera den futuro: “Lo no tin morto mas; ni tristeza ni sclamacion ni dolor lo no tin mas.”—Revelacion 21:3, 4.

Na prome instante, Titus a lucha pa saca e odio cu tabatin den su curason. El a bisa: “Tabata masha dificil pa mi cambia mi manera di pensa y actua.” Pero, loke a yuda hopi ta e texto na Echonan 10:34 y 35 cu ta bisa cu Dios no ta haci distincion di persona.

Kico tabata e resultado? Titus a splica: “Ora mi a mira e amor cu testigonan di Jehova tabatin un pa otro, sin importa nan nacionalidad of color di cuero, esey a convence mi cu nan ta e religion berdadero. Hasta prome cu mi a batisa como Testigo, un miembro di e congregacion color cla a invita mi na su cas pa come. Casi mi no por a kere. Nunca prome mi a yega di sinta banda di un persona color cla y sinti mi na paz, pero awor mi tabata come den su cas. Awor mi a bira parti di un berdadero hermandad internacional.”