Kico Ta e Señal di “e Ultimo Dianan”, of di “e Tempo Stipula di e Fin”?
E contesta cu Bijbel ta duna
Bijbel ta describi algun suceso y situacion cu lo yuda nos haya sa cu nos ta bibando den e “conclusion di e era [actual]”, loke algun traduccion di Bijbel ta referi na dje como “fin di mundu.” (Mateo 24:3; E Testament Nobo) Bijbel ta yama e tempo aki “e ultimo dianan”, “e tempo den cua e fin lo yega”, of “e tempo stipula di e fin.”—2 Timoteo 3:1; Daniel 8:19, Beibel Santu.
Cua ta algun profecia di Bijbel cu lo tuma luga den “e ultimo dianan”?
Bijbel ta papia di varios suceso cu lo tuma luga na e mesun tempo y cu lo ta “e señal” di e ultimo dianan. (Lucas 21:7) Wak algun ehempel:
Guera rond mundo. Hesus a profetisa: “Nacion lo lanta contra nacion y reino contra reino.” (Mateo 24:7) Revelacion 6:4 tambe a profetisa tocante un coredor di cabay simbolico cu ta representa guera y cu lo “kita paz for di riba Tera.”
Scarsedad di cuminda. Hesus a profetisa: “Lo tin scarsedad di cuminda.” (Mateo 24:7) E buki di Revelacion ta papia di un otro coredor di cabay simbolico cu lo causa hamber na diferente parti di mundo.—Revelacion 6:5, 6.
Temblor grandi. Hesus a bisa cu lo tin “temblor den un luga tras di otro.” (Mateo 24:7; Lucas 21:11) E temblornan grandi aki cu ta sosode rond mundo lo causa mas sufrimento y morto cu nunca.
Pestilencia. Segun Hesus, lo tin pestilencia of epidemia di maleza teribel.—Lucas 21:11, Beibel Santu.
Crimen. Aunke hende ta cometiendo crimen pa varios siglo caba, Hesus a bisa cu den e ultimo dianan lo tin “aumento di maldad.”—Mateo 24:12.
Hende ta daña planeta Tera. Revelacion 11:18 a profetisa cu hende lo ta “[cabando] cu e Tera.” Nan lo haci esey no solamente cu nan actonan violento y corupto pero tambe mediante e daño cu nan ta causa na e medioambiente.
Dia pa dia actitud di hende ta bira pio. Na 2 Timoteo 3:1-4, Bijbel a profetisa cu hende en general lo ta “malagradecido, desleal, ... nan lo no ta dispuesto pa cera ningun acuerdo; nan lo ta calumniador, sin dominio propio, feroz, sin amor pa loke ta bon, traidor, cabesura [y] hincha di orguyo.” Comportacion di hende lo bira asina malo cu Bijbel ta describi e tempo ey como “temponan critico, dificil pa trata cu ne.”
Famia ta kibra. Na 2 Timoteo 3:2 y 3, Bijbel a profetisa cu hopi hende lo ta “sin cariño” pa nan famia y cu yiunan lo ta “desobediente na mayornan.”
Amor pa Dios lo fria. Hesus a profetisa: “Amor di mayoria di hende lo fria.” (Mateo 24:12) Cu e palabranan ey, Hesus tabata kiermen cu mayoria di hende lo stop di stima Dios. Ademas, 2 Timoteo 3:4 ta bisa cu den e ultimo dianan e hendenan ey lo “stima placer en bes di stima Dios.”
Hipocresia religioso. Na 2 Timoteo 3:5, Bijbel a profetisa tocante hende cu lo bisa cu nan ta sirbi Dios, pero cu no ta biba di acuerdo cu Dios su normanan.
Lo tin mihor comprondemento di profecia di Bijbel. E buki di Daniel a profetisa cu durante “tempo di fin”, hopi hende lo haya mihor comprondemento di e berdadnan di Bijbel, incluso comprondemento exacto tocante profecia di Bijbel cu tin di haber cu tempo di fin.—Daniel 12:4.
E mensahe di Bijbel lo ser predica rond mundo. Hesus a profetisa: “E bon noticia aki di e Reino lo ser predica den henter e Tera habita.”—Mateo 24:14.
Hende lo ta indiferente y lo haci bofon. Hesus a profetisa cu hende en general lo no haci caso di e tantisimo pruebanan cu fin ta acercando. (Mateo 24:37-39) Ademas, 2 Pedro 3:3 y 4 a profetisa cu algun hende lo hari y bisa cu e pruebanan ta coy kens y cu nan no ta proba cu e fin ta cerca.
Tur e profecianan aki ta cumpliendo. Hesus a bisa cu den e ultimo dianan tur e profecianan aki lo cumpli na e mesun tempo, y no djis algun di nan of mayoria di nan.—Mateo 24:33.
Nos ta bibando den “e ultimo dianan”?
E contesta ta si. Loke ta pasando den mundo y calculacion di tempo basa riba Bijbel ta mustra cu e ultimo dianan a cuminsa na aña 1914, e aña cu Prome Guera Mundial a cuminsa. Pa comproba cu loke ta pasando den mundo ta duna prueba cu nos ta bibando den e ultimo dianan, wak e siguiente video:
Na 1914, e Reino di Dios a cuminsa goberna den cielo, y un di e prome cosnan cu e Reino ey a haci ta saca Satanas e Diabel y su demoñonan for di cielo. Desde e tempo ey, Satanas y e demoñonan tin influencia riba Tera so. (Revelacion 12:7-12) Satanas su influencia riba humanidad ta bisto na e mal actitud di hende y e cosnan malo cu nan ta haci. Pesey, e ultimo dianan ta “temponan critico, dificil pa trata cu ne.”—2 Timoteo 3:1.
Hopi hende ta preocupa durante e temponan critico aki. Nan ta worry cu hende no sa mas con pa biba cu otro. Algun hende tin hasta miedo cu hende mes lo caba cu otro.
Pero na mes momento, tin hende cu, aunke nan ta preocupa pa situacion di mundo, ta wak futuro cu speransa. Nan tin confianza cu pronto e Reino di Dios lo tuma accion pa caba cu tur e problemanan cu tin na mundo. (Daniel 2:44; Revelacion 21:3, 4) Cu pasenshi, nan ta warda pa Dios cumpli cu su promesanan, y nan ta haya consuelo den e siguiente palabranan di Hesus: “Esun cu persevera te na fin ta esun cu lo ser salba.”—Mateo 24:13; Mikeas 7:7.