12 el Suobel

Ngerang A Duubech Er A Kodall?

A kodall a ikrel a klengar. A kodall a ua kmal dmolech el cheliuaiu. (Johanes 11:11-14) A rulekoad a diak el sebechir el orrenges, ma lechub e lomes, ma lechub e longedecheduch, ma lechub e lomdasu er a ngii di lengerang. (Olisechakl 9:5, 10) A klsuul el klechelid a olisechakl el kmo a rulekoad a mo er a belurir a rulekoad el mo obengterir a rebeldekir. Engdi Biblia a diak lolisechakl er tiang.

Tirke el mla mad a diak lsebechir el ngosukid, e diak lsebechir el melemall er kid. A rechad a blechoel el meruul a uldars ma tengetengir el loumerang el kmo ngmo oldeu a rengrir a rulekoad. Engdi tia omtok er a uldesuel a Dios e le ngmlengai er a ta er aike el blulekngel a Satan. Ngdirrek el diak lsebechel el odeuir a rengrir a rulekoad, e le ngdiak a klengar er tir. Ngdiak el kired el mo medakt ma lechub e bo dongull er a rulekoad. Ngkired el mengull er a di ta el Dios.—Matteus 4:10.

A rulekoad a lmuut el mo ngar. A Jehovah a mo olekiis er a rulekoad el mo kiei er sel paradis el chutem. Isel taem a mo er ngii er a ngar er a medad. (Johanes 5:28, 29; Rellir ar Apostel 24:15) A Dios a sebechel el olekiis er tirke el mla mad el ua kau el sebechem el olekiis er a chad el mechiuaiu.—Markus 5:22, 23, 41, 42.

Sel uldasu el kmo ngdiak demad a blulak el lomerk er ngii a Satan el Diabelong. A Satan ma remengelengalek el reng er ngii a rulleterir a rechad el mo omdasu el kmo a reng er a rulekoad a dirk ngar e uchul a secher ma kuk bebil er a mondai. A bebil er a taem e a Satan a mengeuid er a rechad, el oeak a berrous ma ues. A Jehovah a omtok er tirke el melasem el mengedecheduch er a rulekoad.—Duteronomi 18:10-12.