A Klumech el Mora Ruungalek el Kristiano:

Kau a kmal soam el ngosuterir a rengelekem el mo betik a rengrir er a Jehovah e tuib a rengrir el mo mesiou er Ngii. Me ngera sebechem el remuul el ngosuterir el mo nguu a techolb? E oingerang e te mo kltmokl el kirel tia el klou a ultutelel el dauch?

A Jesus a ullisechakl er a rultirakl er ngii el kmo: “Morael el mor a bek el bedengir a re chad er ker me ker e moruul er tir el mo obengkek, e molecholb er tir.” (Mt. 28:19) Me a doltirakl er tiang, e a chad el mo metecholb a kirel el mo obengkel a Jesus me a lechub e ngmo disaiplo er ngii. Tia belkul a kmo ngdiak di bo lodengei e loumerang a osisecheklel a Kristus, e ngdirrek el kirel kerekikl el oltirakl. E tia dirrek el sebechir a remekekerei el meruul er ngii.

Mochotii a ungil el kerebai, e mosisecheklterir er a tekingel a Jehovah. (Dut. 6:6-9) Tia uldimukl er sel mousbech er a Ngerang Mera el Lolisechakl a Biblia? me a Molemolem el Ngar er a Bltikerreng er a Dios el babier, el olisechakl er tir a klemerang er a Biblia, e olengeseu er tir el mo meduch el mesaod a omellach er a Biblia e mo kiei loltirakl. Mngesuterir el mo sebechir el di tir el mesaod er a klaumerang er tir. (1 Pe. 3:15) A klemedengei me a omelisiich el lengai er kemiu, omesubir el di tir el tang, omengull el telungalek, miting, me a ungil klausechelei er tir a mo ngosuterir el olengeriakl el mo nguu a techolb, e melemolem el blak a rengrir. Molisiich er tir el mo meruul a turrekong er tir er a klereng.

A Osisechakl 20:11 a kmo: “Ng mo lmuut er a kekerel ngalek me kede mo medengelii el oeak omerellel el kmo ng ungil e melemalt.” Me ngera bebil er a tekoi lochotii el kmo, a ngalek a mla mo disaiplo er a Jesus Kristus, e mla mo sebechel nguu a techolb?

A ngalek el olengeriakl el bedul a techolb a kirel lolengesenges er a rechad er a blil. (Rel. 5:29; Kol. 3:20) A Biblia mesaod er a Jesus er a le 12 a rekil el kmo: Ng “ulerrenges a tekingir [a rechad er a blil].” (Lk. 2:51) Me nguaisei, engdi lak momdasu el kmo a ngelekem a diak el kirel el rullii a cheleuid. A ngalek el soal el mo metecholb a kirel melasem el oltirakl er a kerebil a Jesus, e olengesenges er a rechad er a blil.

Ngdirrek el mocholt er a omerellel el kmo, ngsemeriar el mesuub a klemerang er a Biblia. (Lk. 2:46) A ngelekem, ngsemeriar el mora miting e onger? (Psa. 122:1) Ngsemeriar el menguiu er a Biblia e mesuub el di ngii el tang?​—Mt. 4:4.

A ngalek el olengeriakl el bedul a techolb a melasem el nguu a Renged el mo kot er a klengar er ngii. (Mt. 6:33) Ngmedengelii a ngerechelel el ouchais er a rechad er a klaumerang er ngii. Ngteloi a kakerous el teletelel a berkel a klumech, e diak lemerur louchais er a resensei me a rengalek er a skuul el kmo, ngta er a Sioning er a Jehovah. Ngkerekikl a part er ngii el kirel a miting er A Klengar er Kid a Rekristiano me a Omesiunged.

Ngmelasem el melemolem el klikiid a omerellel me ngmengeroid er ngii er a mekngit el klausechelei. (Osi. 13:20; 1 Ko. 15:33) E tia mocholt lokiu a chelitakl el lorrenges, mubi me a show el lomes, video game el lousekool, me a usbechel er a Internet.

Te betok a mla kongei a ulengesurir a rechad er a blirir, e mla kongei er a klemerang, e mla metecholb er a taem er a klengeasek er tir. Me a Jehovah bo lomekngeltengat er kau sel molengeseu er a rengelekem el mo nguu tia el klou a ultutelel el dauch er a deleuill er tir me Ngii.

A Klumech el Mora Dirkak el Metecholb el Publisher:

Koba kmal ileakl el techall el mesiou el ta er a publisher. Me aki kmal chemat er kau e le ke mla olengeriakl er a omesiungem. Ke mla mo medengelii a Dios lokiu a omesubem er a Tekingel, ke dirrek el olecholt er a klaumerang er kau er a telbilel.​—Jn. 17:3; Heb. 11:6.

Ke locha mle chedal a ta er a klechelid er a uchei er a obo mosuub lobengterir a Resioning er a Jehovah me a lechub e ngkuk dimlak a klechelid er kau. Ke locha dirrek el mirruul a tekoi el omtok a omellach er a Biblia. Engdi chelechang e ke mla ochotii a klaumerang er kau e le ke mla obult el belkul a kmo, ngouuchel a rengum er a mekngit el tekoi el murruul. Ke dirrek el mla mo cheroid er ngii el belkul a kmo, ke oltngakl a mekngit e mla tibir er a rengum el mo meruul a tekoi el melemalt er a osengel a Dios.​—Rel. 3:19.

Me a lechub e ke ua Timothy el mlo medengei a chedaol llechukl er “cho mkekerei,” me ke mlukerreu me ngdimlak bo mchelsechusem er a mekngit el omeruul me a oberaod el klengit. (2 Ti. 3:15) Ke mla suubii a rolel e ngsebechem loltngakl a orimel, me a lmuut el bebil er a ongetikaik el mekngit er a osengel a Jehovah. E mla ochotii a klaumerang er kau el okiu sel molisiich er a mera el omengull, e mouchais er a klaumerang er kau el mora rebebil. Ke dirrek el mla mosisechakl el mo meduch el omerk er a klumech. Me chelechang, e ke mla tibir el mo mesiou er a Jehovah el ta er a dirkak el metecholb el publisher.

Me a omsilubii a klemerang er a dirk mkekerei me a lechub e ngmlo uriul, me kau er chelechang a melasem el meruul a eru el meklou a ultutelel el bakes er a omesiungem, el telbilel a reng me a techolb. Ke rullii a telbilel a rengum el mora Jehovah lokiu sel moluluuch el ouchais er ngii el kmo ke mo mesiou er ngii el mo cherechar. (Mt. 16:24) Me a techolb a mo ochotii a telbilel a reng el mrirellii. (Mt. 28:19, 20) Me ngoeak a telbilel a reng me a techolb, e ke mo ta er a mesiungel a Jehovah el Dios. E tiang a kmal ileakl el techall!

Engdi ngdi uaike el bla msuub er a Biblia, kulterekokl el mo chelebangel a kakerous el omelsemai. Lak mobes el kmo, a telkib el taem er a uriul er a lemetecholb a Jesus e a “Chedaol Reng a milekrolii . . . el mor a ked el bo longarm er ngii a Diabelong.” (Mt. 4:1) Me a uriul er a cho metecholb el mo ta er a disaiplo er a Kristus, e ke mo chelebangel a omelsemai. (Jn. 15:20) E aikang a mei el ngar er a kakerous el rolel. A telungalek er kau a sebechir el mo omtok er kau. (Mt. 10:36) A rengalek er a skuul, rechad er a urerem, me tirke el mle sechelim er a uchei a locha mo melenguul er kau. Engdi lak mobes a tekingel a Jesus el ngar er a Markus 10:29, 30 el kmo: “Ng ua isei, mak subedemiu el kmo ngikel mo ikrii a blil ma lechub a re bebil er ngii el sechal ma redil ma lechub a demal ma lechub a delal ma lechub a re ngelekel ma lechub a chetemel el kirek ma kirel a Ebangkelio, a mo ngmai a lmuut el betok er chelechang, ng mo ngmai a derdart el blai ma re bebil er ngii el sechal ma redil ma re delal ma re ngelekel ma chetemel, e dirrek el mo chuarm er odechelakl; e sel mel beluulchad e ng mo nguu a diak a ulebengelel klengar.” Me bo leblak a rengum el olekeed er kau er a Jehovah e mkiei el oltirakl a melemalt el llechul.

Me sel bocha molatk el mo metecholb, e mouchais er a tebechelel a chelechad er a remechuodel. A ker el ngar tia el babier a bo lousbech a remechuodel el mengedecheduch er kau el mo meketeklii el kmo, ngmla mo sebechem el mo metecholb. Me ngsebechem lomuchel el di kau el omes aika el ker er sel temem el mesuub el di kau el tang.

Me sel mongetmokl er kau el kirel aike el ker, e monguiu e molebedebek aike el rokui el bades. Ngsebechem el lemuches a notes er tia el babier me a lechub e ngkuk ta er a babier. E sebechem el ousbech aika el notes, me tia el babier er sel taem el mongedecheduch er a remechuodel. E a lsekum e ngmeringel er kau a mtebengii a ker, e ngsebechem el olengit a ngeso er ngike el mesuub er a Biblia lobengkem, me a lechub e ngta er a remechuodel.

Me sel mchadecheduch kau me a remechuodel e lak momdasu el kmo, ngkirel mo kemanget e dmolech a nger er kau. A beot e bleketakl el nger el di ousbech a tekingem a kmal ungil. Me a betok er aika el ker sel monger, e ngungil a mousbech er a tang me a lechub e ngeru el Bades el ochotii el kmo, a nger er kau a mengai a uchetemel er a Biblia.

A lsekum e ngdiak a kmal klemedengei er kau er a beot el osisecheklel a Biblia, e a remechuodel a mo kutmeklii a rolel e ke mongeseu, me ngmo sebechem el mesaod a tekoi el oltirakl er a melemalt el klemedengei er kau er a Bades e mo sebechem el mo metecholb er a uriul.

[Ulekrael el mora remechuodel er a ongdibel: A ulekrael el kirel a dongedecheduch er a chad el mo metecholb a ngar er a 54-60 el llel tia el babier.]