Ngdelbochel el Uldasu me a Lechub e Ngmera el Tekoi​—A Klemerang el Kirel a Jesus

NGERA ULDESUEM? AIKA EL BLDUKL ER IOU EL TEKOI NGMERA EL TEKOI ME A LECHUB E NGDELBOCHEL EL ULDASU?

A Jesus a milechell er a December 25.

A retedei el chellimosk a mlo oldingel er a Jesus er a taem er a cherellel.

A Jesus a dimlak a rebebil er ngii.

A Jesus a Dios el mle duum el olab a bedengir a rechad.

A Jesus a dimlak el di lungil el chad el merekong.

TE BETOK a mo onger el kmo aika el tekoi el beldukl er bab a rokui el mera el tekoi. Me a rekuk bebil a locha mo dmu el kmo ngmeringel​—me a lechub e ngdiak el sebeched​—el mo ulterekokl el medengei. Me alta te melatk el kmo ngii di moumerang er a Jesus, me seikid e a nger er aikang a diak el sal klou a ultutelel.

Engdi a Biblia a melisiich er a ngodech el uldasu. Ngmelisiich er kid el mo er ngii a ‘klemedengei er kid el medengelii a Rubak er kid el Jesus Kristus.’ (2 Petrus 1:8) Ngmo er ngii a klemedengei er kid el loeak sel dorriter a Evangkelio. E le ngmeketeklii a klemerang el kirel a Jesus, me ngngosukid el imakl a delbochel el uldasu me a mera el tekoi. Me ka me bo domes a lolekoi a Evangkelio el kirel aika el dulemasech er bab el klaumerang er a rechad.

KLAUMERANG: A Jesus a milechell er a December 25.

DELECHERUL: DELBOCHEL EL ULDASU.

Ngdiak a bleketakl el tekoi el medung er a Biblia el kirel a buil me a sils er a cherellel a Jesus. Me a leuaisei e tia el sils er a December 25 ngmla er ker el mei? A doltirakl er a The Encyclopædia Britannica, e a rebebil el leko te Kristiano a “uluureng er tial sils me bo losisiu ngii me a ungil klebesei er a chelid er a Rom el mle olengchelel . . . sel taem er a blsechel a kelekolt, el lluut a llomes el merael el mo kemanget me a sils lengasech el mo er a bab er a eanged.” Ngar er a osisiu el babier e ngmelekoi el kmo ngbetok el siukang er a Kurismas a mlengai er a “omengetmeklel a ungil el klebesei el kirel a chelid er a sers me a omengull er a sils er a blsechel a kelekolt.”

A Jesus nglocha kongei er a ungil klebesei el kirel a cherellel er a December 25? Ka bo molebedebek: Ngdiak a medengelii a sils el mlechell er ngii a Jesus. Ngdiak a ngii di el Bades el melisiich er kid el mo mengedaol er a sils er a cherellel, me a dirrek el diak a olechotel a kmo a rekot el Kristiano a mirruul er ngii. A Biblia a bai di meskid a ulterekokl el sils el lemlad er ngii a Jesus, me a tekingel el melisiich er a rulebengkel el mo mengedaol er tia el sils.a (Lukas 22:19) Ngbleketakl el kmo, a Jesus a dimlak el soal el melisiich er a cherellel, e ngbai millisiich er a kerresel a kodellel el ua tenget.​—Matteus 20:28.

KLAUMERANG: A retedei el chellimosk (me a lechub e te king a doltirakl a bebil er a siukang) a mlo oldingel er a Jesus er a taem er a cherellel.

DELECHERUL: DELBOCHEL EL ULDASU.

Ke locha mla mes a bebil er a siasing me a lechub e ngsunga el olecholt er a ngalek el Jesus el mechiuaiu er a chongolel a charm, e iliuekl er a retedei el chellimosk el olab a blebelir. Engdi tia el tekoi a di delbochel el uldasu el diak el mera el tekoi.

Ngklemerang el mla er ngii a rechad el mla er a Ongos el mlo oldingel er a buik el Jesus. Engdi tirkang a mera er ngii a tirke el ulemes a btuch. (Matteus 2:1) Me te miltik er a Jesus el mle ulekedurs er a ongolel a charm? Ngdiak, te mlo oldingel er ngii er a blai. Tia belkul a kmo te milsa Jesus er a tela el buil er a uriul er a cherellel.​—Matteus 2:9-11.

E a ildisir tirka el chad el mlo oldingel, te 2? 3? 30? A Biblia a diak louchais. Me alta e a ochur el lousbech er ngii er tia el siukang a mlengai er aike el kldei el bedengel a blebelir.b (Matteus 2:11) Te ngar er ngii a rebebil el dirrek el melekoi el kmo a derta er tirka el chellimosk a ulemtechei a kakerous el bliongel er a klechad. Engdi tia el uldasu a diak el sebeched el metik er ngii er a Bades. Ngbai di ua lolekoi a ta er a babier el mesaod a tekoi er a Evangkelio el kmo, chouaisei el delbochel el uldasu a mlukdubech er a “chad er a reksi er a ongeai el dart el rak el kmal mle mesisiich a uldesuel el lomeob a tekoi.”

KLAUMERANG: A Jesus a dimlak a rebebil er ngii.

DELECHERUL: DELBOCHEL EL ULDASU.

A Evangkelio a bleketakl el lolecholt el kmo a Jesus a mla er ngii a ruchellel me a ruchedal. A Evangkelio er a Lukas a melekoi el kirel a Jesus el kmo ngmle “ketengel” a Maria el olecholt el kmo ngulemechell er a rebebil er a rengalek er a uriul.c (Lukas 2:7) Ngar er a Evangkelio er a Markus, e a rebebil er a rechad er a Nazareth a ulemekesiu er a Jesus me a rebebil er ngii, le ngdimlak lomes el kmo ngmle tokubets el chad. Me tuleker el kmo: “Ngika ngkora ngikel . . . obekul a Jakobus, ma Joses, ma Judas, ma Simon, mar uchedal tirikakid el de dak el ngar tiang?”​—Markus 6:3; Matteus 12:46; Johanes 7:5.

Me alta e ngbleketakl a tekoi el lolekoi a Evangkelio, e ngdi te dirk betok el sensei er a Biblia a melemolem el melekoi el kmo a Jesus a di mle ngii el tang el dimlak a rebebil er ngii. A rebebil a melekoi el kmo tirke el ochellel me a ruchedal el lolekoi er tir a bades a mera er ngii a tir me a Jesus a di mle ngelekir a ruchad.d Ngar er ngii a rebebil el kuk melekoi el kmo tirkang a di mle ngelekel a bechil a Maria. Engdi ka bo molebedebek: A lsekum a Jesus a di mle chimo el ngelekel a Maria, e a omomdasu e tirke el chad er a Nazareth te millekoi aike el tekoi el ledilung? Ngbai diak, e ngdi tirka el chad a locha mla er ngii a rebebil er tir el mera el lulemes er a Maria er a ledioll. Me te mle ungil medengei el kmo a Jesus a di mle ta er tirke el betok el ngalek el lulemechell er tir a Maria.

KLAUMERANG: A Jesus a Dios el mle duum el olab a bedengir a rechad.

DELECHERUL: DELBOCHEL EL ULDASU.

Sel uldasu el kmo a Dios a mlei er a chutem e kiliei el ua chad el Jesus, el ngii a cherrengul a osisechakl er a Trinidad, a kmal meketeketang el ngar er ngii el osisechakl​—engdi ngdimlak el ngar er ngii er a taem el dirk el ngar tia el chutem a Jesus. A The Encyclopædia Britannica a bai melekoi el kmo: “Ngka el tekoi el Trinidad me a ka el osisecheklel a debetik er ngii er a Beches el Testament . . . Tia el osisechakl a mlekekokil el obeob er a klemengetel a tela el dart el rak el uleak a betok el klaititekangel me a klautok.”

A klechelid a mera er ngii a kmal oltuub er a Jesus sel lolisechakl el kmo ngDios el ullab a bedengir a rechad.e El mekerang? Ka bo molatk er tia el okesiu. A rebebil er a rechad er a ureor a mla er ngii a tekoi el blo lolturk er a merredelir el kirel, engdi ngii a dilu er tir el kmo ngdiak a klisichel el mo onger er tir. A lsekum tia el tekoi el ledillii a mle klemerang, e ngii el merreder a uleak a llomeserreng e ulechotii el kmo ngngar er ngii a telkelel a sebechel tekoi. Engdi a lemlak el klemerang​—el belkul a kmo ngmle sebechel longer er a ongterir engdi ngdimlak el soal meruul er ngii​—e ngmle cheblad el chad.

Me chelechang, e ngmilekerang a Jesus er a taem el terung er a rechapostol er ngii leblel sorir el osiik a ngarbab el deruchall er bita er ngii? Ngdilu er tir el kmo: “[A] mo dengchokl ra kidekmek ma katruk a diak le kirek el meskemiu, ngbai kirir tirikel le meltutk el kirir era Demak.” (Matteus 20:23) Me a lsekum a Jesus a mera el mle Dios, e a lolekoi el uaisei e ngdiak lomulak? Sel lolekoi el melutk er Ngike el kuk ngarbab a klisichel er ngii, e a Jesus a kiltmeklii a kmal ungil kerebai er a klengariourreng​—e ulechotii el kmo ngdimlak losisiu ngii me a Dios.

KLAUMERANG: A Jesus a dimlak el di lungil el chad el merekong.

DELECHERUL: MERA EL TEKOI.

A Jesus a mle bleketakl el melekoi el kmo ngdimlak di lungil el chad el merekong. Ngmillekoi el kmo: “Ngak a Ngelekel a Dios.” (Johanes 10:36) E mera el tekoi el sebechel a ngii di el chad el melekoi el kmo te Ngelekel a Dios. Engdi a lsekum a tekoi el lullekoi a Jesus a mle klsuul, e tia ngngerang rullii el mo er ngii? Ngdiak el rellii el mo ungil chad e ngbai rullii el mo klou el cheblad er a osengir a rechad!

Sel kot el ngarbab el tekoi el mildung el omeketakl er a Jesus a mla er a Dios el mei. A Dios a mle eru el taem el lolekoi el kirel a Jesus el kmo: “Ngikang a . . . Ngelekek.” (Matteus 3:17; 17:5) Ka di molebedebek er tiang: A Bades a di ouchais a kesai el taem el lemorenges a ngerel a Dios er tia el chutem​—engdi ngngar er a eru er ngii el taem e ngulemeketakl el kmo a Jesus a Ngelekel! Tiaikid sel kot el ngarbab el olechotel a kmo a Jesus a mera el ngike el ledu el kmo ngngii.

Tia el suobel ngsilaod a bebil er a meral el tekoi el kirel a Jesus el dimlak modengei? A leuaisei, e ngera me ngdiak bai mluut el mo merriter er a Evangkelio el telkib el mo smesei? Chouaisei el omesuub a sebechel el mo uchul a deurreng er kau e mo klungiolem. E a Jesus a mera el dilu el kmo a dosuub el mo medengelii ngii me a Demal e ngmo uchul a “diak a ullebengelel klengar” el kired.​—Johanes 17:3.

[Footnote]

[Baks/​Siasing el ngar er a 14 el llel]

Lmuut el Bebil er a Tekoi el Locha Mo Mechas a Rengum er Ngii

A Jesus ngmle ua ngera blekerdelel el chad? Ngika ngkmal mle meringel a tekingel, e bekilekiakl el soal mengeroid er ngii er a rechad, me ngdimlak el sebechel el mera el ungil medengei a blekerdelir a rechad? Ngar er ngii a rebebil er a rechad el onger el kmo chochoi. Seikid a uchul me nglocha mechas a rengrir el mo medengei el kmo a Jesus a  . . .

• mlo er a kldibel el kirel a deurreng.​—Johanes 2:1-11.

• chilat er a rechad.​—Markus 14:6-9.

• mle dmeu a rengul el lobengterir a rengalek.​—Markus 10:13, 14.

• lilangel.​—Johanes 11:35.

• mle chubteterir a rechad.​—Markus 1:40, 41.