Molekeed er Kau er a Dios

Ngomes a Klungiolir a Rechad

1 KING 14:13

‘A [JEHOVAH] a merriter a bek el rengrir a rechad e medengei a bek el uldesuel ma telbilel a rengud.’ (1 Kronika 28:9) Aika el mlukrael er a Dios el mei el tekoi a kirel el rullid el mo oba omereng el saul el kirel a dmolech el klemeriarreng er a Jehovah el bedulkid. Me alta e ngdiak demecherrungel engdi ngii el Jehovah a omes aike el ngar er a rengud, e dmeu a rengul er a ungil el uldesued. E tia el omerellel a kmal bleketakl er a tekingel el kirel a Abia, el sebeched el metik er ngii er a 1 King 14:13.

A Abia a kiliei er a chelsel a telungalek el kmal mle mekngit a omeruul er a chelsel. A demal el Jeroboam a mle mengeteklel a cheldebechel el omtok er a mera el osisechakl.a Me a Jehovah a ulterekeklii a uldesuel el mo olekngemed er a telungalek er a Jeroboam el rokir, “el ua dach el di nguemed el mo diak.” (1 King 14:10) Me nguaisei, engdi a Dios a kilengei er a ta el chedal a telungalek er a Jeroboam, el Abia, el ngii a kmal mle smecher e mlad me ngmlo medakl el ua ta er a rungil chad.b Ngera uchul me ngmirruul el uaisei? A Dios a mesaod er ngii el kmo: “Ng di mo ngiil tal chad er a telungalek er a Jeroboam a mo medakl er a debull, ele ng di ngiil tang a ungil er a rengul a [Jehovah] el Dios er a Israel.” (1 King 14:1, 12, 13) Me aika el tekoi ngerang ngouchais er kid el kirel a Abia?

A Biblia a diak lolekoi el kmo a Abia a mle blak a rengul el mengull er a Dios. Me nguaisei engdi ngmla er ngii er ngii a ungil el blekerdelel. Me tia el ungil el omerellel a ulterekokl el lurruul er ngii el ngar er a omengull er ngii el “mo er a Jehovah.” Me a remeluches e olisechakl a tekoi er a klechelid a omdasu el kmo a Abia a locha dirrek el mle teloi er aike el omerael el mo mengull er a templo er a Jerusalem me a lechub e nguleldik er tirke el milengkar a siseball me bo lak el sebechir a rechad er a Israel el tuobed el mo mengull er a Jerusalem.

Me alta e ngdiak dodengei el kmo ngngera el ungil el omeruul a lullecholt er ngii a Abia, engdi a kot, e ngulterekokl el “di ngiil tang” a mle ungil. Sel ungil el tekoi a mle ngar er a chelsel a rengul. Ongerung, tiang a kmal mle ileakl el tekoi, e le a Abia a mle chemolt el ungil a omerellel alta e ngmle chedal a “telungalek er a Jeroboam.” A ta er a mengeteklel a klechelid a melekoi el kmo: “Ngkmal klou el chetengakl a mo er a chad el lomelemii a ungil el omerellel alta e ngkiei er a mekngit el basio me a dirrek el chelsel a mekngit a omerellir el telungalek.” A kuk tang a melekoi el kirel a ungil el omerellel a Abia el kmo “ngkmal mle bleketakl el di ua bduch er a eanged el kmal medidiich er sel taem el kmal milkolk, e ua kerrekar el sidar el kmal klebokel el ngar er a delongelel a betok el mla mo moalech a llel el kerrekar.”

A kot el klou a ultutelel el tekoi a medung er a 1 King 14:13 el osisecheklid el kirel a ta el klebokel el blekerdelel a Jehovah me a dirrek el sel uldesuel me a osengel el kired. Ngsebeched el melatk er sel “ungil” el tekoi el lulemes er ngii er a rengul a Abia. Ngsebeched el mesang el kmo a Jehovah a mlerriter er a rengul a Abia el mo lmuut er a lebetik er a telkib el ungil el omerellel. Me sel domekesiu er a Abia el mo er a mekngit el telungalek er ngii, e ngdi ua losaod a ta el chad er a omesuub el kmo, ngii a ua ngisel a chesiuch el debetik er ngii “er a delongelel a betok el mekekerei el bad.” Me sel ungil el blekerdelel a Abia a kmal mle mekreos er a rengul a Jehovah me ngulemekngeltengat er ngii, e dirrek el ulechotii a klechubechub er ngii el mo er ngika el di ta el ungil el chad er a chelsel a mekngit el telungalek.

Kede kmal ngeltengat el mo er ngii a techelled el mo medengei el kmo a Jehovah a dirrek el omes er kid e merriter a rengud el osiik er a ungil el blekerdeled, alta e ngkmal diak demecherrungel. (Psalm 130:3) Me ngulterekokl el okiu tia el klemedengei er kid e ngsebeched el lmuut el olekeed er kid er a Jehovah el Dios, el ngii a sebechel el merriter a rengud el osiik el mo metik aike el mekekerei el ungil el blekerdeled.

[Aike el Footnote]