Ngdi Ungil a Doker a Ker er a Dios?

A REBEBIL a melekoi el kmo ngmekull a doker a ker er a Dios, e le te oumerang el kmo ngdiak el olechotel a omengull a doker er Ngii er sel uchul me ngomechei a tekoi me leduubech me a lechub e ngdiak. Ke kongei er tia el uldasu?

Nglocha mo mechas a rengum sel bo modengei el kmo a rebebil el melemalt el chad a dirrek el uleker a ker er a Dios. El ua tiang:

A Job a uleker el kmo: “Ngera ma Dios a mechititerir a re mekngit el chad me te chad, e mechititerir me te mo mechuodel e ungilbesrir?”​—Job 21:7.

A profet el Habakuk a uleker el kmo: “Ke mekera e mtekengelii a rengum er tirkal diak doumera er tir e mekngit el chad? . . . Ngera uchul me ke di lmuk a lolemall er a re chad el kuk melemalt er tir?”​—Habakuk 1:13.

A Jesus Kristus a dilu el kmo: “Dios er ngak, Dios er ngak, ngera uchul me ke mla choitak?”​—Mateus 27:46.

A lsekum ke menguiu aika el bades el ngar er a Biblia, e ngmo sebechem el mesang el kmo a Jehovaha el Dios a dimlak bo el kesib a rengul er sera loker aika el ker. Me ngdiak el mechas a rengud er a omerellel. El ua tiang, ngdiak bo lekesib a rengul sel dolengit aike el dousbech er a bek el sils, e ngbai dmeu a rengul el omeskid. (Mateus 6:11, 33) Ngdirrek el ouchais er kid a tekoi el ngosukid el mo chelellakl a rengud me a uldesued. (Filipi 4:6, 7) Me a Jesus a dilu er a redisaiplo er ngii el kmo: “Molengit, e kom mo ngmai.” (Mateus 7:7) A cheldechedechal a Jesus a ochotii el kmo ngdimlak el di losaod el kirel a ongtil a tekoi er a kerruul e ngdirrek el millisiich er tir me lolemolem el oker a ker.

A lsekum e ngmo er ngii a techellem, e ngera er aika el ker a soam el oker er a Dios?

● Ngar er ngii a belkul a klengar er ngak?

● Ngera mo duubech sel kmad?

● Ngera uchul me ke mechikak me ak chuarm?

Ngsebechem el metik a nger el ngar er a Biblia e le “Dios a dilokou a Chedaol Llechukl el rokui er a dingerir a re milluches.” (2 Timothy 3:16) Me bo domes er sel uchul me a rebebil a oker aika el ker me a nger el mocholt er a Biblia.

[Footnote]