Ngsebechel el Mo er Ngii a Mera el Belkul a Klengar?

NGMERA el klemerang aika el tekoi. A klengar er tia el beluulechad a mui er a “blekiklreng ma uldikel.” Ke locha mla melatk el kmo, ‘Ngsebechel el mo er ngii a mera el belkul a klengar er chelechang?’

Ka molatk er a Maria. Alta ngkmal mle mesisiich a bedengel er a uchei, engdi chelecha el bla bo el 84 a rekil, e ngdikea el sebechel el tuobed er a blil. Ngdirk mesisiich a uldesuel, engdi ngmla mo mechitechut a bedengel. Ngmekerang e sebechel a Maria el omdasu el kmo a chouaisei el klengar a mera el ngar er ngii a belkul?

E kau a kuk mekerang? A lebebil er a taem e ke locha mo oker el kmo a klengar er kau ngmera el ngar er ngii a belkul me a lechub e ngdiak. A urerem a locha rullau el mo mesaul e mo seselk a rengum, me a lechub e ke kmal meringel el oureor engdi a rechad a diak lesa ureor el moruul er ngii. Me alta ngungil a klengar er kau er chelechang, engdi ke locha dirk bekikl el kirel aike el mo duubech er a ngar medam el taem. A lebebil er a taem, e ke locha mo mechitechut a rengum me a lechub e ngmo er ngii a mondai er a telungalek er kau, me a lechub e ngmad a betik er a rengum. A ta el chad el ngklel a André a kmal mle kmes a deleuill er ngii me a demal. Engdi a ta er a klebesei e a demal a kmal di mle kiul mo smecher e mad. Tiang a kmal mle meringel er a André e le ngdimlak el sebechel el obes er ngii.

Me alta kede chelebangel a mondai, engdi ngar er ngii a tekoi el kmal kired el mo medengelii. Tia el tekoi a kmo: Ngsebechel mo er ngii a mera el belkul a klengar? Ngsebeched el metik a nger er tia el ker el oeak a domes er a klengar er a Jesus Kristus, el ngii a mla er tia el beluulechad er a bekord el 2,000 el rak er a mla me mong. Alta e ngchilebangel a betok el meringel el tekoi, engdi ngmla er ngii a mera el belkul a klengar er ngii. Kid me ngdirrek el sebeched el mo uaisei a lsekum e kede oltirakl er a kerebil.