Kau Ke Medengei Aike el Ungil er Kau?

A rechapostol me a rebebil er a rechad el uluungerachel er a rulebengkel a Jesus er a kot el dart el rak, a mlo kldibel el mlo melib el kmo ngngera el llach a mle kirir el mo oltirakl er a chelsel a rokui el ongdibel er a Rekristiano. Me ngoeak a ulekrael er a oureor el klisichel a Dios, e ngmeltib el kmo ngdiak a ngii di el tekoi el mo omekberaod er tir engdi te kirir el mo omekiai a uldars el mo er a bleob el chelid, me a rasech, me a ulebeng a telil [mechei a rasech me ngdi ngar er a chelsel a techel a charm], me a deleboes. (Rel. 15:28, 29; 21:25) Me ngkmal kired el melemolem el ‘omekiai er kid er a rasech.’ Ngar er a osengel a Dios, e a doruul er tiang e ngdi osisiu a klungel a ultutelel ngii me a domekiai er kid er a omengull el bleob me a lechub a deleboes el omeruul.

A llach el kirel a domekiai er kid er a rasech nguldimukl er a oidel a rasech? Chochoi. Ngsebeched el omekesiu er ngii el ua tiang: Ka me dedu el kmo a toktang a dilu er kau el kmo ngkirem el omekiai er kau er a rrom. Tiang belkul a kmo ngdiak el sebechem el melim engdi ngsebechem el merus er ngii el oltuu er a ngurd er a bedengem? Ngkmal diak. Me a domekiai er kid er a rasech e ngbelkul a kmo ngdiak dekengei a oidel a rasech el oeak a ngurd me a ngii di el keskelel a bedenged.

Me ngngera mo duubech a lsekum a Kristiano a kmal klou el telemall me a lechub e ngousbech er a klou el botk? Ngar er a blakerreng er ngii el mengeluolu er a klengar el mekreos el sengk el mla er a Dios, e ngmo kongei a bebil er a bedengel a ukeruul el diak el uldimukl er ngii a mekngit el usbechel a rasech. Me ngmo osiik a rolel a ukeruul, a lengar er ngii, el ousbech a betok el klekedall el sebechel el telkib el taem el lomtechei a rasech me a urerel er a chelsel a bedenged a rechad.

Ke mla mo ulterekokl a rengum el kirel aike el ukeruul el mkengei el mo ousbech kau me a telungalek er kau, e mla lemuches er a chelsel sel Durable Power of Attorney el card er kau? A lsoam a lmuut el klou el omesodel tia el tekoi, e momes er a October 1, 2004 el A Ongkerongel, er a 8-18 el llel. E sola e mousbech er a suobel er sel chelsel llel a November 2006 el Omesiunged el kirel a Renged el dai er ngii a kmo: “Ngua Ngera Osengek el Kirel a Dertelngimech el Klekedellel a Rasech me a Rolel a Ukeruul el Ousbech a Rsechek?,” me bo el sebechem el ungil el melilt el kmo ngera el rolel a ukeruul a omkengei er ngii. E a orekil, e ngkmal kirem el lemuches aike el rolel a ukeruul el mkengei er a chelsel sel DPA card er kau. Me tirke el omolilt er tir el mo omtechei er kau el kirel a ukeruul, me a ngii di el diak el Sioning el chedam, a kirem el mo subedeterir el kirel a uldesuem.