Kau Ke Kltmokl el kirel a Bkaischemrungel el Secher?

A bkaischemrungel el secher a sebechel el di mereched el duubech el diak dekltmokl el kirel. (Jak. 4:​14) Me a mellomes a rengul el chad a di blechoel el mengetmokl er ngii el kirel tia el tekoi. (Osi. 22:⁠3) Me kau, ke mla tibir el kmo ngua ngera el rolel a ukeruul a omkengei el melai, e mla lmuches a urungulem er a babier? Sel video el Transfusion-Alternative Health Care​​—Meeting Patient Needs and Rights (Rolel a Ukeruul el Mo Mtechir a Oidel a Rasech​​—el Olterekokl Aike el Ousbech a Smecher me a Llemeltel) a mleketmokl el mo ngosukau. Me sel momes er ngii e ngmo sebechem el onger aika el beldukl el ker. Tia el video a olecholt a bebil el rolel a botk el ngar er ngii, me a ruungalek a kirir el mo oba sekutaberreng a lomes er ngii el obengterir a remekekerei el ngelekir.

(1) Ngera uchul me a rebebil er a retoktang a lmuut el merriter a uldesuir el kirel a oidel a rasech? (2) Mouchais a edei el bedengel a meringel el botk el mleketmokl el dimlak el ousbech a oidel a rasech. (3) Ngera uchul me a rebetok el telael el toktang me a rechad er a botk er a beluulechad el rokir a mla mo kongei el omotk er a rechad el diak lousbech a oidel a rasech? (4) A omesuub er chelechang el meketmokl er a osbitar ngmla ocholt a ngerang el kirel a usbechel a rasech? (5) Ngerang a bebil er a tellemall el sebechel el mo er ngii el oeak a oidel a rasech? (6) Ngmlo ua ngerang a uldesuir a rebetok el toktang el kirel a klungiolel a usbechel aike el klekedall el omtechei a oidel a rasech? (7) Ngera uchul e ngmo olengesonges a rsechel a chad, e kede mekerang e ngosuir a chad el olengesonges a rsechel? (8) Kede mekerang e rullii a bedengel a chad el mo meruul a bekerekard el cell? (9) Ngera bebil er a rolel e kede kekeringii a ildisel a rasech el remiid er a temel a botk? (10) Ngsebechel a bebil er aike el ukeruul el omtechei er a oidel a rasech el oureor el kirir a remekekerei el ngalek me a rechad el tir a mo ocherur a kodall? (11) Ngerang a ta er aike el meklou a ultutelel el omellach el kirel a ungil el ukeruul?

A derta me a derta el chad a kirir el di tir el melilt el oltirakl er a ukltkir el kmo te kongei el ousbech a bebil er aike el ukeruul el mlocholt er a chelsel tia el video me a lechub e ngdiak, engdi lak mongiil el mo er sel taem el leduubech a bkaischemrungel el secher e bochu molilt el kmo ngera el rolel a ukeruul a omkengei er ngii. Sel chelsel el llel a Omesiunged el kirel a Renged er a November 2006 a sebechel el ngosukau el mo ungil el melilt a tekoi el moruul. Me a lsekum e ke mla metecholb, e ngkirem el lmuches aike el soam er a chelsel a DPA card er kau, e kirem el obang er a bek el taem.

[Blurb el ngar er a 3 el llel]

Me kau, ke mla tibir el kmo ngua ngera el rolel a ukeruul a omkengei el melai, e mla lmuches er a babier?