Momdasu e Moltaut a Omellach
1. Ngerang a omellach?
1 Ngerang a omellach? A omellach a “mengai a uchetemel er a klemerang.” Ngera klekakerous er a omellach me a llach? A llach a mengai a uchetemel er a omellach.
2. (a) Ngera uchul me a doltirakl a omellach e ngkuk meringel er a doltirakl a llach? (b) Ngera uchul me ngkired el blak a rengud el merriter a tekoi el ousbech a omellach er a bai di doltirakl a llach?
2 Ngbetok el taem, e a “tikingel a Dios er kid” a melisiich er kid el mo omdasu e oltaut aike el uchetemel a omellach. A domtab e doltaut a omellach er a Biblia a diak lebeot el tekoi el ua sel doltirakl a llach. Kid el diak demecherrungel a uchul me ngsoad el mo cheroid er a omelsemai el mo merriter a tekoi el ousbech a omellach. Ngbai soad a ileakl el llach el sebeched el oltirakl er ngii sel bo dechelebangel a omelilt. A lebebil er a taem e kede osiik a ulekrael er a ta er a mesisiich el Kristiano, el uai a ta er a remechuodel er a ongdibel, e le kede omdasu el kmo ngmo er ngii a llach el melutk el mo er sel blekeradel el dengar er a chelsel. Engdi a Biblia me a lechub e ngbabier el mengai er a Biblia a diak lebeskid a ileakl el llach, e a lsekum e ngmeskid a llach, e ngdiak el sebeched el ousbech er ngii er a bek el taem me a chelsel a bek el blekeradel.
3. (a) Ngmekerang e sebeched el kmo a Josef a uleltirakl a omellach er a bai loltirakl a llach? (b) Ngmekerang a doltirakl er a kerebil a Josef?
3 Ka momtab er a kerebil a Josef el dimlak lekengei er a omengesuseu er a bechil a Potifar el mo er a deleboes el omeruul. Alta ngdirkak lebo er ngii a llechukl el llechul a Jehovah el kirel a laokreng me a blals el mo er ngike el mlo bad el obengkel a bechil a ta er a chad, engdi a Josef a mle medengelii a omellach er a Dios el kirir a rebechiil el chad. (Genesis 2:24; 12:18-20) Kede mesa el oeak a tekingel el kmo aike el omellach a kmal ulemekrael er ngii e le ngdilu el kmo: “Ak mekera e sebechek el mo meruul er choua tial mekngit el tekoi e mora klengit el omtok ra Dios?”—Genesis 39:9.
4. Ngmekerang a doltaut a omellach a lomekerreu er kid er a bedikl er a bechachau el diak a ultutelel el omengull?
4 A bo dodengei a omellach e doltirakl e ngdirrek el omekerreu er kid er a bedikl er a bechachau el diak a ultutelel el omengull. Ngngar er ngii a klekakerous er a delongelel a doltirakl a omellach me a dolengesenges a llach. A doltirakl a omellach er a Biblia, e ngdiak dolasem el kiei (me a lechub e dorrimel er a rebebil el mo kiei) el oltirakl a betok el meringel el llach el kirel aike el sebeched el meruul me aike el diak el sebeched el meruul el engelakl er a osisechakl er a Biblia. Kede bai mo melatk a omellach er a bltikerreng me a blekongesenges el mo er a Dios er a bai di dolatk er a omengull el olechau a osengir a rebebil.—Lukas 11:42.