Kerrir A Rechad
◼ Ngera kired el melatk er ngii a lsekum e ngsoad a bebil me a lechub a rokui el klokled a lebo er a cheldebechelel a Jehovah sel demad?
A rechad sel lemad, e ngdikea klisichir el chodereder a kloklir. (Oli. 9:5, 6) Sei a uchul me a rebetok el chad a meruul a will er tir er a uchei er a lemad el mo mesaod el kmo ngua ngerang a oketmeklel a kloklir. (2 Ki. 20:1) Tia el mla meketmokl el babier el oeak a llach a dirrek el mo ochotii el kmo ngtecha el chad a sorir a bo loungerachel a kloklir. A lsekum e ngdiak lemeketmokl tia el babier, e ngngar er a betok el beluu e a rechad er a kabelment a mo olterekokl el kmo te mekerang e merous a kloklel ngika el chad el mlad. Me a leuaisei, e a lsekum e ngsoad a bebil me a lechub a rokui el klokled a lebo er a cheldebechelel a Jehovah, e ngklou a ultutelel a derellii a babier el okiu a llach el melekoi el kirel tiang e dirrek el ungil a dekerekikl el melilt er a chad el mo oungerachel aika el klokled.
Ngike el miltutk el mo oungerachel aika el klokled a kmal klou a ngerechelel. A teletelel a bo lorous aika el klalo a kmal ousbech er a klou el taem, el oltirakl er a klungel a udoud me a lechub e ngchutem el lebilechei ngika el chad el mlad. Me a lmuut el tang, a kabelment a blechoel el ngar er ngii a llecherir el kired el oltirakl. Ngdiak el rokui el chad er a chelsel a ongdibel a sebechir el mengilt el mo oungerachel a klokled. Ngike el chad el dengiltii a kirel el kongei el mo oltirakl aike el soad, e bekongerachel, e sebeched el oumerang er ngii.
A Lsekum a Chad a Olengit er Kau el Mo Oungerachel a Kloklel: A lsekum a chad a olengit er kau el mo oungerachel a kloklel sel lemad, e a kot e ngkirem el mo ungil el tirterii tia el tekoi e meluluuch el kirel el kmo ngsebechem el kutmeklii me a lechub e ngdiak. (Lk. 14:28-32) A uriul er a lemad a chad, e ngkirem el mo mesubed er tirke el chad el llechukl a ngklir er a will er ngii. E sel mnguu a kengei er a kort, e ngmocha ngerechelem el omii a kloklel ngike el mlad el oltirakl er a llach me aike el llechukl er a will er ngii. A chad el miltutk el mo oungerachel a kirel el mo medengei el kmo a lekesai me a lechub e lebetok a kloklel ngika el mlad, me ngii a di kirel el oltirakl aike el tekoi el llechukl er a will. Aike el tekoi el kirel el mo er a cheldebechelel a Jehovah a kired el omes el kmo ngmla mo kloklel a Jehovah.—Lk. 16:10; 21:1-4.