Mrellii el Mo Blekerdelem el Oltirakl a Taem
1. Ngera el kerebai a longetmokl er ngii a Jehovah el kirel a doltirakl a taem?
1 A Jehovah a blechoel el oltirakl a taem. El ua tiang, ngmesterir a remesiungel aike el lousbech “er sel kirel blsechel.” (Heb. 4:16, BT) Ngdirrek el merous a “kelir er sel belsechel” el melisiich a klaumerang er tir. (Mt. 24:45) Me ngsebechel el mo ulterekokl a rengud el kmo a sils er a cheldechuderreng er ngii a “diak bo le meoud.” (Hab. 2:3) Ngkmal sebeched el ngmai a klungioled er a blekerdelel a Jehovah el blechoel el oltirakl a taem. (Psa. 70:5) Engdi kid el mechesang e diak demecherrungel el chad a uchul e tiang a sebechel el mo meringel er kid. Me ngera me ngkired el blechoel el oltirakl a taem?
2. Ngera me a doltirakl a taem e ngmo uchul a odanges el mo er a Jehovah?
2 A rebetok el chad a blechoel el meoud er chelecha el taem er a uriul el sils e le te melatk er a di tir e diak el ulserechakl a rengrir. (2 Ti. 3:1-3) Me a Rekristiano sel loltirakl a taem el kirel a ureor, appointment, me a miting, e a rechad a sebechir el mes a omerellir e tia mo uchul a odanges el mo er a Jehovah. (1 Pe. 2:12) Kid kede blechoel el oltirakl a taem sel bo doureor, engdi sel bo el kirel a omengull er kid el mo er a Jehovah e kede blechoel el meoud? A doltirakl a taem el kirel aike el miting er kid, el uldimukl er a chelitakl me a nglunguuch er a uchelel, a ochotii a urunguled el soad el oltirakl er a Demad el ngar er a eanged el ungil el blechobech a tekoi el loruul.—1 Ko. 14:33, 40.
3. Ngera me a doltirakl a taem e ngochotii el kmo kede melatk er a rebebil?
3 A doltirakl a taem a dirrek el olecholt el kmo kede melatk er a rebebil. (Fil. 2:3, 4) El ua tiang, sel doltirakl a taem er a miting, el uldimukl er a miting el kirel a odingel a obliil, e ngdiak bo dongesang er a rekldemed er a klaumerang. Engdi a lsekum e kede blechoel el meoud, e a rechad a sebechir el mo omdasu el kmo kede omes a temed el kuk ngaruchei er a temir. Me a chad sel loltirakl a taem e ngolecholt el kmo ngblak a rengul e sebeched el ultuil e oumerang er ngii, e aikang a blekeradel el rechad el ngar er bita er kid a sorir.
4. Me a lsekum kede blechoel el meoud, e kede mekerang e lmuut el mo ungil er tia el tekoi?
4 A lsekum e ke blechoel el meoud, e molebedebek er a uchul me ke uaisei. Bechobech a tekoi el moruul el oeak a omrellii a ungil el schedule el rullau el mo sebechem el kutmokl a ngerechelem er a ulterekokl el taem. (Oli. 3:1; Fil. 1:10) Molengit a ngeso er a Jehovah. (1 Jn. 5:14) Me a doltirakl a taem a ochotii a omereng el saul er kid el kirel aike el eru el meklou a ultutelel el Llach, el bltikerreng el mo er a Dios me a ngar er bita er kid.—Mt. 22:37-39.