Ngmo er Ngii a Okiis el Okiu a Olubet

A Chedaol Belsoil a meskid a kmal ungil techall el mo melatk el kirel aike el klengeltengat el mo er ngii er a ngar medad el taem el okiu a olubet, e a okiis a ta er aika el klengeltengat. Ngdimlak el moktek er a Jehovah el rechad a mo mad. Sei a uchul me a ta er a kot el meringel el tekoi el bo lechelebangel er ngii a chad a kodellel a betik er a rengul. (1Ko 15:26) A Jesus a kmal mle mekngit a rengul er a leseterir a redisaiplo er ngii el mengeiung er a kodellel a Lasarus. (Jn 11:33-35) Ngii el okesiul a Demal a uchul me ngulterekokl a rengud el kmo a Jehovah a dirrek el kmal mekngit a rengul sel lesekid el mengeiung er a kodellel a betik er a rengud. (Jn 14:7) A Jehovah a kmal mengiil er sel taem el bo lolekiis er a remesiungel, me kid me ngdirrek el soad el mo meruul el uaisei.​—Job 14:14, 15.

A Jehovah a soal a tekoi a lemeketmokl el ngar er a ungil bldeklel a uchul me kede oumerang el kmo a okiis a mo meketmokl el ngar er a ungil rolel. (1Ko 14:33, 40) Ngar seikid el taem e kede mo outkeu er tirke el mo mekiis er a kodall er a bai doruul er a kemeldillir. Kau ke melebedebek el kirel tiaikid el taem er a okiis, el ileakl sel mongeiung er a kodellel a betik er a rengum? (2Ko 4:17, 18) Kau ke mereng a sulel a Jehovah el kiltmeklii a olubet e dirrek el mla ouchais er kid el kmo a rulekoad a lmuut el mo mekiis?​—Kol 3:15.

• Ngtecha el sechelim me a rechedam a soam el lmuut el mo mesterir sel bo er ngii a okiis?

• Te rua techa el chad er a Biblia a soam el mo mesterir e mengedecheduch er tir sel bo er ngii a okiis?