“Mesang! Ak Meruul a Bek el Tekoi el Mo Beches”

1-4. (a) Ngera bebil er aike el blekeradel el soam el mo teloi er ngii el locholt el ngar er a ikrel itia el babier? (b) Ngera el ungil el tekoi a sebechem el nguu? (c) Ngera bebil er a bades er a Biblia el ulterekeklii itia el omelatk?

KA MESETERIR tirke el dmeu a rengrir el chad el ngar er a ikrel tia el babier. Kau ngsoam el mo ta er tir? Ke locha mo dmu el kmo, ‘Chochoi, ngkmal soak.’ E le tiaikid isel budech ma kltarreng el sorir a rokui el chad. A rokui el chad—el mechedelekelek, ma rebecheleleu, ma redi ngodech el bedengir a rechad—a di ua ta el telungalek el dmak. Ngkol ua ngera el deurreng! Ngkol ua ngera el kltarreng! Ngulterekokl el tirkaikid el chad a diak lsebek a rengrir er a mla obuu el dub ma eltel, ma lechub a delengerengerir a reterrorist. Aike el skoki er a mekemad a diak el sebechel el tomellii tiaikid el budech er a melidiul er bebul tia el klebokel el paradis. Me ngdiak a resoldau, ma mlai er a mekemad, ma boes. El mo lmuut er a rebulis me ngdi kea lousbech er tir el meruul er a budech. E le mekemad ma delengerenger a mla mo diak. E diak a ngelsonges er a blai, e le rokui el chad a ngar er ngii a klebokel el delengcheklir.

² Ka momes er tirka el ngalek! Ngkmal dmeu a rengud el lomes er tir a loilil. E dirrek el momes aika el ledak el milil el charm! A deel el merers a di kea lousbech er a chelsel tia el paradis, e le rokui el charm a ngar er a budech tir ma klechad. El mo lmuut er a laion ma ngelekel a sib a dmak el ta rengrir. E momes aika el betok el bedengel a suebek el charm el mesebesebek er a melidiul, e morrenges aike el klebokel el cheliteklir el lobengkel a derrouakl er a rengalek. Ngdiak a rruul el blil a charm? Ngdiak, e le tiaikid el basio a di mimokl a rokui el tekoi er ngii ma deurreng me ngdiak a telkelel. Ka molungel aika el bung, e morrenges er a bochel a ralm, e mo melechesiu er a kleldelel a sils. Nglocha kmal ungil a telemtemul aika el rodech er a chelsel isel sualo, e le aikang aike el kot el ungil el sebechel el loltobed tia el chutem, el uaike el rokui el tekoi el bo domes e oldeu a rengud er ngii er a chelsel tia el kmal klebokel el paradis.

³ Engdi, alta e a chad a mo melekoi el kmo, ‘Ka mhall, te ngar er ker a remechuodel? Ngdiak lekirir, el dirrek, el mo er ngii a blingelir er tia el klou el deurreng?’ A mera er ngii, a remechuodel a ngar er tiang, engdi te mla lmuut el mo ngeasek. A chelsel tia el basio e ngdiak a mad er a cheluodel. A rengalek a mukeroul el mo meklou, engdi diak bo lechuodel. A 20 a rekrir ma lechub e ng 200 a rekrir, tirke el betok el milliol el chad el ngar er tia el basio a oldeu a rengrir er a klengeasek er tir, el ngar er a cherrengelel a klisichel a bedengir. Ka locha mo dmu el kmo, te betok el milliol? Chochoi, te betok el milliol, e le tia el paradis a mo roureur a beluulechad. Ngmo mui er a klengar, ma budech, ma kllebokel el mo er a bek el merekelel a beluulechad, el ngar er sel rois el Fuji el mo er aike el rois el Andes, el ngar er a Hong Kong el mo er a daob er a Mediterranean. E le beluulechad el rokir a oltii sel klebekelel. Ngmo Paradis el roureur a chutem el rokir.

⁴ Kau ke dilu el kmo, ‘Ngmeringel a bo kuumerang’? Engdi, kot, bo morritel aike el locholt el ngar er ngii. Ngsebechem kau ma telungalek er kau el mo suobel er tia el meringel el blekeradel e mo soiseb er sel Paradis el mlucholt er a ikrel tia el babilengam.a

Sel Babier el Mesaod er Tia el Paradis

5. (a) Ngera el babier a mesaod er aika el tekoi? (b) Ngera ochotii el kmo ngkmal ngar er a bab el babier?

⁵ Chouaikaikid el rokui el mengasireng el klemera el tekoi, a llechukl er a chelsel a ta el babier, isel kot el lungil el babier el milluches. E ngii a Biblia. Ngkmal chuodel el babier, a bebil er ngii a milluches el bekord el 3,500 el rak er a mla memong. Engdi osisiu el taem, e ngkot el ngar er uchei el babier el ngar er ngii a ungil el lulekrael el kirel a omerellel a klengar er kid er a chelecha el taem. Aika el ulaoch el llechukl er ngii a meskid a ungil el omelatk el kirel a ngar er a medad el klebesei. E tiang isel kot el merael a chisel el babier er a reksi er a klechad, el betok er a 4,000,000,000 el cherrungel el Biblia ma lechub a klou el tedobech er ngii a bla lrrous el ngar er a bekord el 2,200 el bedengel a omelekoi.

6. Ngerang a kakerous er ngii a Biblia er aike el bebil er a llechukl el leko ngchedaol?

⁶ Ngdiak a ngodech el leko ngchedaol el babier el mlo uaisei a omerusel, e oumesingd er aikang a diak lechuodel el ua ingii. Sel babier er a Koran er a Islam a kesai er a 1,400 el rak er a lemeruul. E a Buddha ma Confucius a kiliei el bekord el 2,500 el rak er a mla me mong, ma ike el lliluches a ulemuchel er sel taem. Aike el Bades er a Shinto el lousbech er a chelecha el taem a lliluches er a di 1,200 el rak er a mla me mong. Me sel Book of Mormon a di 160 el rak er a lemeluches. E diak a ta er aika leko ngchedaol el babier el sebechel el ungil el mesaod er a reksi er a klechad er aika el mereko el 6,000 el rak, el ua Biblia. A lsoad el mo ungil el medengelii sel kot el rolel a omengull, e ngkired el merritel er a Biblia. Ngdi ta el Biblia a ngar er ngii a klemera el tekoi el mo er a rokui el chad.

7. Te dilu el kmo ngerang a remellomes a rengrir el kirel a Biblia?

⁷ Aike el llomeserreng ma klebekelel a klumech el ngar er a chelsel a Biblia a bla bo lodengei a remellomes a rengrir er tia el beluulechad. Ngke el scientist el mle kot el mo medengelii a llach er a gravity, el Sir Isaac Newton, a dilu el kmo: “Ngdiak a llomeserreng el ngar er a beluulechad el ua aike el ngar er a Biblia.” A Patrick Henry, el ngke el mle mengeteklel a mekemad er a beluu er a Merikel el merael a chisel a millekoi er itia el tekoi el kmo, “Beskak a ilmokl, ma lak e ngkodall,” e dirrek el dilu el kmo: “A Biblia a kuk klou a ultutelel er aike el rokui el rruul el babier.” E dirrek ngke el chellimosk el merredel er a Hindu el Mohandas K. Gandhi a mle ta lolekoi er ngike el lulemtechei er a Britain el ngar er a India el kmo: “Sel lebo ldak a beluam ma beluak e loltirakl aike el osisecheklel a Kristus el ngar er sel Cheldechedechal er a lengar er a Rois, e kede mla sumechokl a rokui el mondai, el diak di lebeluad e ngbeluulechad el rokir.” A Gandhi a milsaod aika el tekoi el ngar er a Matteus er a 5 el mo er a 7 el klou el bliongel el ngar er a chelsel a Biblia. Moutekangel el menguiu aike el bliongel e bo molechesuar sel klisichel e dirrek el kmal mo sisichii a rengum.

A Biblia​—A Babier er a Ongos

8, 9. (a) Ngera me ngcheleuid a domekedo er a Biblia el babier er a Ngebard? (b) Ngmlekerang e a Biblia a milluches, e ngmle ua ngerang a klteketel el taem? (c) Ngera me ngsebeched el omekedo er a Biblia el kmo nglibrary? (d) Te mle tela el chad a milluches er a Biblia? (e) Te dilu el kmo ngerang a rebebil er tir el kirel ngike el Luchul a Biblia?

⁸ Ngkuk ngodech er aike el loumerang a oumesingd er a rechad, e tia el Biblia a dimlak lerruul er a beluu er a Ngebard, ma ka longebkall er ngii el beluu. E le oumesingd er ngii a milluches er a beluu er a Ongos. Ma rechad el milluches er ngii me te mle chad er a Ongos. El ta el telael el rak er uchei er a Buddha, sera 1513 B.C.E., e a Moses, el mle chedal a Dios el kiliei er a Middle East, a mlukreng er a Dios el mo meluches er sel kot el babier er a Biblia, el lulngakl el kmo Genesis. Me seikid e ngmla er tia el uchelel, e a Biblia a oltirakl er a di ta el dai ma lechub e nguldasu el mo lmuut er a ullebongel el babier el Chocholt. A omelechesel a Biblia a mlo merek er sera 98 C.E., el bekord el 600 el rak er uriul er a Buddha. E kau ke medenge el kmo tia el Biblia a uldekial a 66 el kakerous el babier? Chochoi, a Biblia a mlechudel el babier, el di uai a library!

⁹ Me nguaisei, ngbetok er a 1,600 el rak er sel taem er a Moses el mei, e te mle bekord el 40 el kakerous el chad a lilechesii tia el Biblia. E te milsaod el kmo te uleba kuk mesisiich er a rechad el klisichel a chedaol el reng e milluches er ngii. Me ngike el Kristiano el apostol el Paulus a milluches el kmo: “Ele chedaol Llechukl el rokui a melluches luleak a Reng ra Dios, me ngngarngii a belkul er chosisechakl, ma chomellach, ma chomekmelemalt, ma chomekrael el mora llemalt.”b (2 Timoteus 3:16) Ma apostol el Petrus a silaod el kmo: “Ngkiriu lomuchel el mo medengei el kmo, a ulaoch ra chedaol Llechukl el rokui a diak di molab a rengmiu el mesaod, ele ulaoch a kmal dimlak el tobed ra uldesuir ar chad, e te chad a lulengedereder er tir a Chedaol Reng, me tuleak a Dios el mengedecheduch.”—2 Petrus 1:20, 21; 2 Samuel 23:2; Lukas 1:70.

10. (a) Ngmlekera Biblia e me er kid er a chelecha el sils? (b) Ngera me ngsebeched el oumera el kmo kede dirke ousbech er sel osisiu el tekoi er aike el mle kot el milluches?

¹⁰ Me ngdirrek el kol ua ngera el mengasireng el tekoi, sel rolel e tia el Biblia a mle er kid el me lmuut er a chelecha el sils. E le ngbetok el telael el rak, el me lmuut er sel taem er a lebo er ngii a mesil er a omeruul el babier er sera 500 el rak er a mla memong, e aike el oidel a Biblia a di milluches er a chim. Me ngdiak a ngodech el babier er a irechar el mleketmokl e lulluches el liluut el meluches er ngii. Me ngmla mo betok el loluches er ngii lolab a di chimorir, el kmal kerekikl. Ngdi mle mekesai aike el blo lemecheuid a ruuliuid, ma usbechel aike el oidel a ulterekeklii aike el mle kot el milluches er a Biblia. A ta er a kmal ungil el medengei aika el tekoi er a Biblia, el Sir Frederic Kenyon, a kmo: “Ngmla mo diak doumededenger el kmo a chedaol el Llechukl a milluches el uaise el kot el luchul er a lolemolem el me er kid.” Me chelecha el sils, e ngdirke ngar er ngii a bekord el 16,000 el like el loluches er a chimorir ma lechub e ngtedebechel tia el Biblia, ma bebil a mlo medechel el like el liluches er a 200 er rak er uchei er a Kristus. Ma lmuut el tang, aike el melemalt el oidel a mleketmokl el mla er a tekoi er a Hebru, ma Aramaic, ma Griik el tekoi el mle kot el milluches er a Biblia el mo er a oumesingd el omelekoi er a beluulechad.

11. Ngera bebil er aike lebiltik a rehakase el lochotii el kmo a Biblia a klemerang?

¹¹ A rebebil er a rechad a dmu el kmo a Biblia a diak lulterekokl e melatk el melemall a chisel. Engdi, chelsel aike el dirke mlo merek el rak, e a recharchaeologist (el tirke el mengiis er a chutem el mesuub a klalo ma lechub e ngbeluu) a mla mengiis aike el bluotel el beluu er a irechar el ngii a mildung er a chelsel a Biblia e mla metik aike el llecheklir ma kuk bebil el olechotel el ngii a olecholt el kmo tirka el chad ma beluu el meldung er a Biblia a mera el mla er ngii. Te dirrek el mla metik a ocholt el kmo ngmera el mla er ngii a ieleb er a beluulechad, el lolekoi er ngii a Biblia el kmo ngdilubech er a betok er a 4,000 el rak er a mla me mong, er sel taem er a Noa. Me sera lolutk er tia el tekoi, e a Prince el Mikasa, el ngike el merael a chisel el archaeologist, a dilu el kmo: “Ngmera el mla er ngii a Ieleb? . . . Sel klaumerang a kmo ngmera el mlo er ngii a ieleb e ngmla mocholt el kmo ngklemerang.”c

A Dios er a Biblia

12. (a) Te dmu el kmo ngerang a rebebil er a rumtok er a Biblia el kirel a Dios? (b) Ngera ma Biblia a ousbech el kmo a Dios a uai a Chedam? (c) Ngerang ochotii a Biblia el kirel a ngklel a Dios?

¹² Te ngar er ngii a rechad el melenguul er a Biblia, ma rekuk bebil a melenguul er a uldasu el kirel a Chimong el Kedidai el Dios. (2 Petrus 3:3-7) Me te dmu el mo, ‘Ngmekerang e sebechek el oumera er a Dios, a lak kisang? Ngngar er ngii a olechotel el lolecholt el kmo ngar er ngii a diak lemeues el Ulemeob, el kuk ngar er a bab er a rechad? A Dios ngdiak lekiei er a chelsel a rokui el tekoi?’ Ma rebebil a kmo, ‘Ngdiak a Dios ma lechub e ng Buddha.’ Engdi, Biblia a olecholt el kmo ngdi uaikid a denguu a klengar er kid er a demad er tia el beluulechad, me nguaisei ngike el mle kot el demad ma delad a ngilai a klengar er tir el mla er ngike el Demerir er a eanged, ma lechub e ngike el Lulemeob, el ngklel a Jehovah.​—Psalm 83:18; 100:3; Isaia 12:2; 26:4.

13. Ngoeak a ngera el eru el rolel e a Dios a ulecholt er ngii el mo er a klechad?

¹³ A Jehovah a ulecholt er ngii el mo er a rechad el oeak a eru el rolel. Sel kot el klou el rolel a oeak a Biblia, el lolecholt aike el klemerang ma moktek er ngii. (Johanes 17:17; 1 Petrus 1:24, 25) Sel ta er a rolel a oeak a blebelel. Sel lomes aike el betok el mengasireng el tekoi el meliuekl er tir, e a rebetok el chad a mlo medenge el kmo ngar er ngii a Ulemeob e Dios e a ungil el blekerdelel a mlocholt er a urerel.​—Chocholt 15:3, 4.

14. Ngera losaod a Biblia el kirel a Jehovah?

¹⁴ A Jehovah el Dios ngii a Uchul a Biblia. Ngii a kot el Ngar er a Bab el Reng, e di mla ngar er ngii er a irechar el mo cherechar. (Johanes 4:24; Psalm 90:1, 2) Ma ngklel el “Jehovah” a melutk el kirel aike el luldesuel el mo er a reblebelel. Me ngmoktek er ngii el molecholt er sel klou el ngklel sel bo lolekngemed er a remekngit e lolsobel er a rebetik a rengrir er ngii me bo lsebechir el mo kiei er sel paradis el chutem. (Exodus 6:2-8; Isaia 35:1, 2) E le ngii a Chimong el Kedidai el Dios, me ngar er ngii a klisichel el remuul aika el tekoi. Ingii a Ulemeob er a eanged ma chutem, el kuk ngar er a bab er a rokui el chelid ma bleob el chelid.​—Isaia 42:5, 8; Psalm 115:1, 4-8.

15. Ngmlo ua ngera uldesuir a remellomes a rengrir sera losuub er aika el blebelel a Dios?

¹⁵ Tirke el hakase a mla mo tmaut el mengoit a betok el taem el losiik er a blekerdelel aika el blebelel a Dios er aika el mereko el betok el dart el rak. Me ngera te mla metik er ngii? A ta er tirke el chad er a omesuub el kirel a dengki, el merael a chisel el hakase el Lord Kelvin er a beluu er a Britain, a dilu aika el tekoi el kmo: “Sel dosuub el mo smesei omesubed e ngmengal el mo diak doumera er sel tekoi el kmo ngdiak a Dios.” E dirrek e ngike el milechell er a Europe, el Albert Einstein, el leko ngdiak loumera el kmo ngar er ngii a Dios, a millekoi el kmo: “Sel bo . . . kumtab er sel mengasireng el rolel a omerellel aike el ngar er ngii er a eanged me tia el beluulechad, ngdiak lsebechek el medengelii sel kot el kekere el llomeserreng el ngar er ngii er a rokui el tekoi.” A ta er a hakase el chad er a Merikel el ngiluu sel nguked el Nobel el Arthur Holly Compton a dilu el kmo: “Tia el domes er ngii el eanged ma chutem maike el ngar er a chelsel a olecholt er a klemerang er sel klou el tekoi el kmo—‘A Dios a mla er ngii er a kot el luchul.’” Ngmillekoi aike el kot el tekoi er a chelsel a Biblia.

16. Ngmekera e tia el eanged ma chutem a olecholt er a llomeserreng ma klisichel a Dios?

¹⁶ Ma remerredel er aika el mesisiich el renged a melekoi el kirel a llemesel a rengrir maike el lurruul el ngar er a eanged. Ngkol ua ngerang el mekekerei aike el loruul a rechad el mlai el satellite el suebek er a melidiul sel domekesiu er ngii er a buil el meliuekl er a chutem, maike el planet el meliuekl er a sils! Ngkol ua ngerang el ngelsengesel aike el urerir tirka el chad sel domekesiu er ngii er aike el blebelel a Jehovah er a billiol el cheldellel a btuch er a eanged, e a derta er aika el cheldellel a btuch a olab a betok el billiol er a sils el ua sils er kid, e ngii a ngilai el mechei er a eanged me lemedechel el diak a ullebengelel! (Psalm 19:1, 2; Job 26:7, 14) Me ngdiak lemechas a rengud a Jehovah a lomes er a rechad el ua mekekere el chebud, maike el mesisiich el renged el di uai a “diak lengerang.”​—Isaia 40:13-18, 22.

17. Ngera me ngungil a bo doumerang el kmo ngar er ngii a Ulemeob?

¹⁷ Kau ke kiei er a blai? Nglocha dimlak di leklisichem e mokedecherur a blim, ma ka modengelii el kmo ngtechang a ulemekedechor er ngii. Me nguaisei, e ngdiak modengelii ngii el daiksang engdi tia diak lolekebai er kau el mo kongei er tia el klemerang el kmo ngmla er ngii a chad el mle mellomes a rengul e rirellii. E le ngklebelung el tekoi omolatk el kmo tia el blai a di mle ngii el mo dechor! Me nguaisei, tia el eanged ma chutem, ma rokui el tekoi el ngar er a chelsel, a kuk lmuut el ousbech er a klou el llomeserreng ma kldachelbai el meruul aikang, me nguaisei ngdiak lemelemalt a bo domdasu el kmo ngar er ngii a Mellomes a Rengul el Ulemeob? Me ngklemerang, engdi tirke el mekebelung a omdasu er a chelsel a rengrir el kmo, “Ngdiak a Jehovah.”​—Psalm 14:1; Hebru 3:4.

18. Ngerang ochotii el kmo a Dios a ngar er ngii, e kirel el modanges?

¹⁸ Maika el mengasireng el blebelel a Dios el meliuekl er kid​—el bung, ma suebek el charm, ma merael el charm, me ngike el mengasireng el blebelel el lokedongall el chad, maikaikid el mengasireng el klengar ma cheroll—aika el rokui a olecholt er a diak lemeues el kot el Ngar er a Bab el Mellomes a Rengul el Lulemeob a mirruul aika el rokui. (Rom 1:20) Me sel lengar er ngii a llomeserreng er ngii, e ngar er ngii a uldasu. Me sel lengar er ngii a uldasu er ngii, e ngar er ngii a chad el omdasu. Me ngike el kot el Ngar er a Bab el Mellomes a Rengul el Chad, a ngii a Ulemeob er a rokui el tekoi el di ngar, e luchul el Madedok er a klengar. (Psalm 36:9) Me ngii el Lulemeob a kmal rredemellel el ngmai a rokui el odanges ma omengull.—Psalm 104:24; Chocholt 4:11.

19. (a) Ngera me ngdiak a renged er a chelecha el taem el sebechel el dmu el kmo te mlo mesisiich er a mekemad el oeak a klisichel a Dios? (b) Ngera ma Dios a diak a ngerechelel er aika el mekemad er a bek el renged?

¹⁹ Te mla er ngii a rechad el urriid a klaumerang er tir el mo er a Dios er aike el ringel er a Ongeru el Mekemedil a Beluulechad. E le sel taem e aike el bek el renged el ulemekedong el mo er a “Dios” er tir, e tirke el ngar er a klechelid er a Katolik ma lechub e ng Protestant ma lechub e aike el klechelid er a beluu er a Ongos. Engdi ngsebeched el dmu el kmo a “Dios” a milsterir a klisiich a bebil er a renged e milechei a kuk bebil me bo lemechitechut? A Biblia olecholt el kmo ngdimlak a ta er aika el renged e lulemekedong er ngike el mera el Dios. A Jehovah el Dios, el Ulemeob er a eanged ma chutem, a diak a ngerechelel er aikaikid el rraurreng ma mekemad er a delongelel aika el beluu. (1 Korinth 14:33) E le uldesuel a kuk ngar er a bab er tirke el omtebechel aika el gobelment ma klsoldau er tia el beluulechad. (Isaia 55:8, 9) Me nguaisei, e sel mera el klechelid ma omengull er a Jehovah a diak leteloi er aika el mekemad er aika el renged. E le ngii el Jehovah a kuk ngar er a bab er aike el chelid er aika el kakerous el renged. E ngii a ileakl el Dios er tirke el betik a rengrir er a budech er a rokui el renged. El di ua lolekoi a Biblia el kmo: “A Dios a diak longetukel rar chad, me tirkel meluu ra Dios e meruul a llemalt a le ngiiteterir ra bek el beluu.” (Rellir ar Apostel 10:34, 35) Tirke el sorir el meruul a llemalt el ngar er a bek el renged a mesuub er a Biblia er a chelecha el taem e mengull er ngike el mera el “Dios el meskid a budech,” el Ulemeob er a rokui el chad.​—Rom 16:20; Rellir ar Apostel 17:24-27.

20. Ngera ochotii el kmo a klsuul el Klekristiano a diak lekristiano e omtok er a Dios?

²⁰ A rebebil er a rechad a melutk el mo er aike el klekakeakl ma omengeblad el ngar er ngii er a delongelir tirke el Kristiano, el leko te oltirakl er a Biblia. Me te mo dmu el kmo, ‘Ma kmekerang e mo oumerang er ngike el Dios er a Biblia, a lsekum e aika el renged el lolab a Biblia a teloi er a delongelir tirke el kmal blak a rengrir el mengudel aike el mesisiich el nuclear el klekedall er a mekemad?’ A klemerang a kmo, a Biblia a melemolem el klemerang, engdi aika el renged el leko te Kristiano a bai kmal mocha cheroid er a mera el Klekristiano er a Biblia el ua cherridel a Diluches el mo er a Dimes. Me nguaisei, te mengeblad er a ledu el kmo te Kristiano. Me te oba Biblia, engdi te diak loltirakl aike el osisecheklel. Me ngike el mle president er a Merikel el kilengei er a omengitel sel dub er a Hiroshima a mle ta ledu el kmo: “Ulekum e ngdi Isaia ma lechub e ng Paulus!”​—el mengetikaik er a rechad er tia el uldikel er a beluulechad. Okmo nguluumerang er a Isaia er a Biblia, e ngdimlak lebo lekengei er a orrebetel sel dub, e le Isaia a dilu el kmo: ‘Mruul aike el klekedall er a mekemad el saider el mo osib ma biskang a mo ochadu er a dellomel.’ Ma Paulus er a Biblia a dilu el kmo: “Le ki merael el ngara tech e ngdi diak ki mokoad loltirakl er a tech, le klekedall er kemam ra mekemad a diak le klalo ra klechad.” (Isaia 2:4; 2 Korinth 10:3, 4) Engdi, aika el renged er a klsuul el Klekristiano a mlo teloi er sel klaidesachel er sel kmal kdekudel el omengudel er a klekedall er a mekemad, er a bai loltirakl er aika el ungil el luleklatk er a Biblia. Maike el lolekoi el kmo te Kristiano e oltirakl er a Biblia a klsuul. Me chelecha lemlak loltirakl er a uldesuel a Dios e ngmo uchul e te ocheuir a kerrekerilel el mo er tir.—Matteus 7:18-23; Sefania 1:17, 18.

Aike el Blebelel ma Mengasireng el Omerellel a Jehovah

21. Ngera me ngsebeched el oumerang er aika el mengasireng el omerellel a Dios?

²¹ A Jehovah a omeob, e meruul a ongasireng. E kau ke mla melebedebek me ngkora rrau a rengum er ngii er sera lomult a ralm el mo rasech, e milingii a Bekerekard el Daob, ma cherellel a Jesus er a klikiid el ekebil, maike el kuk bebil er a ongasireng el omeruul el milluches el ngar er a chelsel a Biblia? Nglocha diak bo lodenge el kmo ngmlekera mo duubech aika el ongasireng el omeruul, el di ua lak lungil medengelii sel mengasireng el sils sel lengasech e bo lengelt er a bek el sils, e le ngar er ngii a telkelel a llomeserreng ma klisichir a rechad. A omebelel a chad a mle ongasireng el tekoi. Ma rechad er a chelecha el taem a dimlak lesa tia el ongasireng, engdi te medenge el kmo ngmera el dilubech, e le ngii a ngar er a chelecha el sils el lolecholt er a klemerang er sel tekoi. Me nguaisei, a rokui el klengar maike el rokui el klekedall el ngar er a eanged ma ngar er tia el chutem a mleketmokl el ongasireng. Me kid kede mo oumededenger sel lolekoi a Tekingel a Dios, el Biblia, el kmo ngii a riruul a betok el ileakl el mengasireng el omeruul er sel telutk el taem, e alta e chelecha el taem e ngdiak loruul er a uai ngii el tekoi?

22. Ka msodii ngike el kot el blebelel a Dios.

²² Aike el rokui el blebelel a Jehovah a kmal mengasireng! Engdi, isel kot el blebelel a ngii a mle kot el ngar er a uchei er a rokui. E tiang a mle omebelel a Ngelekel, el mle diak lemeues el reng, el ngike el mle “kot el mlechell” er ngii. (Kolose 1:15) Me ngkaikid el Ngalek er a eanged a mlungakl el “Tekoi.” Ma betok el telael el rak er a uriul er a lobeob, e ngmle er tia el chutem, me ngmle okedongall el ngii el “chad, el Kristus Jesus.” (1 Timoteus 2:5) Me nguaisei a bades a melekoi er ngii el kmo: “Ma Tekoi a mlo chad e kiliei ra delongeled, me kede miles a klebkellel, el klebkellel a dital Ngelekel a Chedam, el mui ra grazia ma klemerang.”​—Johanes 1:14.

23. (a) Ke mekerang omosaod er sel delongelel a Dios ma Ngelekel? (b) Ngera ngulemeob a Jehovah, el oeak a Ngelekel?

²³ A deleongel er a Jehovah ma Ngelekel a domekesiu er ngii er a ta er a ouklalo e merredel er a blai er a ureor ma ngelekel, e a ngelekel a olengeseu el meruul aike el klalo el lomdasu a demal. Me ngoeak ngike el kot el mlechell el Ngelekel e ledak el chad er a ureor, e a Jehovah a ulemeob er a rebetok el reng, el bebil er a ngelekel a Dios. E uriul, e te uleldeu er a rengrir er a lomes er a Ngelekel a Jehovah, el ngike el Merredel er a Ureor er ngii, el ulemeob a rokui el tekoi er a eanged me tia el beluulechad el dekiei er ngii. Me kau ke oumededenger el kmo aika el tekoi a ulebeob? A betok el telael el rak er a uriul, e a Jehovah a uleker er a ta er a blak a rengul el chad el kmo: “Sera kuruul ra belulechad e ke mlar sei? Cho msal ungil medengei e bo mouchais er ngak. Isel sils ra mochu tutau e a btuch a dilak el mengitakl, mar ngelekel a Dios a uleldiu ra deurreng.”​—Job 38:4, 7; Johanes 1:3.

24. (a) Ngera mle ileakl el blebelel a Jehovah el ngar er tia el chutem, e uleak a ngera el rolel? (b) Ngera me ngdiak lungil el uldasu a domdasu el kmo a chad a mla er a bebil er a charm?

²⁴ A bo lechib a kemanget el taem, e a Jehovah a ulemeob aike el mlo er ngii er tia el chutem, el dellomel, ma kerrekar, ma bung, ma ngikel ma suebek el charm, maike el merael el charm. (Genesis 1:11-13, 20-25) Ma Dios a millekoi er ngika el Merredel er a Ureor er ngii el kmo: “Chelechang e bo doruul ra chad; kede mo rullii el ua ikid loltirakl ra teleteled. . . . Mitia Dios a milebii a chad, el rirellii a chad el okesiul a Dios. Ngmilebii a sechal ma redil.” (Genesis 1:26, 27) E a lulebeob el ua blekerdelel a Dios, el olab aike el blekerdelel a Dios el bltikerreng, ma llomeserreng, ma llemalt, ma klisiich, e ngike el kot el chad a mle kuk ngar er a bab er a rokui el charm. Ma chad a ileakl er a rokui el charm e le ngsebechel el lomdasu, e sebechel el melatk er aike el soal el bo loruul, e ngar er ngii er a uldesuel el soal el mengull er a Dios. A charm a diak choua itia el llomeserreng el sebechel el lomdasu, e ngbai di oltirakl aike el lousbech a bedengel. Me ngkora klebelung el tekoi a dedu el kmo ngdiak a Ulemeob ma lechub e ngke el mellomes a rengul el chad a mla er a ta er a ngar er eou el bleob el charm el mei!​—Psalm 92:6, 7; 139:14.

25, 26. (a) Ngera el klou el omelatk el mla er a medal a chad? (b) Ngera me ngdiak lebo er ngii a mondai a lomdois a rechad el mo chimis el betok er tia el chutem?

²⁵ A Dios a lilia a chad er a “sers ra Eden, el ngara ongos.” Ngmle sers er a tametereng el di ua sel sers er a ikrel tia el babier, engdi te di mle teru el lobekel a mla er ngii, el Adam ma bechil. Me tia el kot el Paradis a di kea lengar er ngii, e le ngmiltemall er sera Ieleb er sel taem er a Noa. Kede medenge el kmo ngmla er sel beluu er a Middle East, e le aike el omoachel el lulecholt er a Biblia el mla er ngii er isei a dirke ngar er ngii er a chelecha el sils. (Genesis 2:7-14) Ma chad a mla er ngii a techellel el ousbech er itia el sers el ua uchetemel a paradis e lomerk er ngii er a beluulechad el rokir, el rullii tia el beluulechad el rokir el mo paradis.​—Isaia 45:12, 18.

²⁶ El ua Dios ma Ngelekel el meses el oureor, me nguaisei e a Dios a milsa chad a urerel er tia el chutem. (Johanes 5:17) Ngdilu er a Adam ma Eba, el ngike el mle kot el sechal ma redil, el kmo: “Bo le betok ar ngelekiu, mar uldidellel a rsechiu, bo le kiei er ker me ker ra belulechad e bo lorreder er ngii. Ak meskemiu a klisiich er chomerreder ra ngikl, ma suebek el charm, ma rokuil meklou ma mekekerel tebelik el charm.” (Genesis 1:28) Me tiang belkul a kmo a rechad te di mobdois, el mekekii tia el chutem, e sola e di merael el mo mui e kmal mo meseked? Ngkmal diak. A chad sel ledu el kmo bo momekeek er a kob er a otsia, e kau a diak di molemolem el loleiitel er ngii el dimerkmo bo lemechubel er a tebel. Ke di mekekii a kob e merekong. Me nguaisei, e a Jehovah a milellach er a chad el kmo: “Bo le kiei er ker me ker,” e ngochotii a kmo sel lebo lungil a ildisir a rechad er tia el chutem, e ngmo merek a cheroll. Me sel bo lecherrungel tia el blekeradel er a klechad e ngdiak bo lemeringel choua itia el tekoi. Me ngdi chelechang e tia el diak lecherrungel el beluulechad a uchul me ngmla mo meringel a terebengel a cheroll.

Aike el Mekngit el Omeruul​—Ngera ma Dios a Milecherei el Uaisei?

27. Ngera bebil er a ker el kirel monger er a chelechang?

²⁷ A lsekum ngmoktek er a Dios el mo kutmeklii tia el chutem el mo paradis, e ngera uchul me chelecha el sils e tia el chutem a mui er a delengerenger, ma ringel, ma klengiterreng? E okmo a Dios a ngike el Chimong el Kedidai, e ngera me ngkilengei er chouaika el blekeradel el me er a chelechang? Ngsebeched el oumerang el kmo ngmo er ngii a ullebengelel aika el mondai er kid? Ngera ngdmu Biblia el kirel tiang?

28. Ngmlekera e a ultok a mlo er ngii er a chelsel sel Paradis el sers?

²⁸ A Biblia a olecholt el kmo aike el mondai er a klechad a ulemuchel er sera lomtok er a omerredelel a Jehovah a ta er a ngelekel a Dios el reng. (Rom 1:20; Psalm 103:22, New World Translation of the Holy Scriptures​—With References, ftn.) Ngulterekokl el ngike el anghel a mla er a delongelir tirke el uleldeu er a rengrir er a lesa omebelel a chad. Engdi ngmlo nguibes a rengul e a kldidai el reng a dilubech er a rengul, e mlo mekesuseu el oeak a ngibes er ngii me lebo longull er ngii a Adam ma Eba er a bai ngike el Lulemeob er tir, el Jehovah. Me ngmilengedecheduch el oeak a bersoech, el di uai a chad el sebechel el rullii a oningio el ua longedecheduch, e ngike el anghel a milengetikaik er a Eba el mo omtok er a Dios. Ma bechil el Adam a uleltirakl er ngii el mo orrengesmengoit.​—Genesis 2:15-17; 3:1-6; Jakobus 1:14, 15.

29. (a) Ngera bebil er a tekoi el mlo duubech el mle kirel el monger? (b) Ngmlekera Dios er a bo longer er sel omelsemai? (c) Ngmekerang e sebechem el dirrek el onger er aika el otubel a Satan?

²⁹ Ngike el lulemtok el anghel a blo lodengelii el kmo “ngchuodel bersoech.” (Chocholt 12:9; 2 Korinth 11:3) Ngdirrek el blo lomngakl er ngii el Satan, el belkul a kmo ngike el “Omtok,” e Diabelong, el belkul a kmo ngike el “Oltuub.” Ngdirrek el luleker el kirel a llemeltel ma blekerdelel a omerredelel a Jehovah er tia el chutem el kmo ngungil e ngdiak, e dirrek el milsemai er a Dios el kmo ngii, el Satan, a sebechel el omult er a rechad el mo ikrii a mera el lomengull. Ma Dios a milsa techellel a Satan er aike el mereko el 6,000 el rak el mo otutii a tekingel, me bo lsebechel el mesaod itia el lultok el mo cherechar. Ma omerredelir a rechad el ileakl er a Dios a di mlo mekngit el rokui. Engdi a reblak a rengrir el sechal ma redil, el Jesus a mle ngike el kot el ungil el kerebai er a delongelir, a ulerreked er a klaumerang el mo er a Dios el oeak aike el kmal meringel el ongarm, e milengebkall er a Jehovah e ulecholt er a blulekngel a Diabelong. (Lukas 4:1-13; Job 1:7-12; 2:1-6; 27:5) Kau, me ngdirrek, el sebechem el mo ta er tirke el loba klaumerang. (Osisechakl 27:11) Engdi ngdiak di el ta el Satan a cherroued el omekringel er kid. Ngera isel ta er a cheraro el ngar er ngii?

A Cheraro​—el Kodall

30. Ngerang dmung a Biblia el kirel a blsel a chad e le ngdimlak lolengesenges?

³⁰ A Dios a uluuchais er a blsel a orrengesmengoit​—a kodall. Ma bocha lomals er ngika el kot el redil, e a Jehovah a dilu el kmo: “Ak mo omdois a chelebulem ra kldiull er kau; me ke mo chuarm ra ringel cho bo momechell; e dirrek el di soam el mo obengkel a bechim, e ngii a mo merrederem.” Me ngdilu er ngika el chad el Adam el kmo: “Ke mo kesib e mo meringel el oureor el omekdubech a dellomel el dimerkmo cho mluut el mora chutem el ngii cho mlengai er ngii. Ele kau a ulebeob ra chutem, me ke lmuut el mo chutem.” (Genesis 3:16-19) Me tirka el dimlak lebekongesenges el teru el lubekel, a mlodik er sel Paradis er a deurreng el mlo er sel dirkak lemeketmokl el chutem. E a uriul e te mlad.​—Genesis 5:5.

31. Ngerang a klengit, me ngera dilubech el mo er a klechad?

³¹ A Adam ma Eba er a lebocha lecheroid er a llemalt e te mlochu oungalek. Ma rokui el chad er a chelecha el sils a klengelakel er tir er a bo lak lemelemalt, me te oudiukes er a kodall. A ta er a milluches er a Biblia a milsaod er ngii el ua itia el kmo: “Le tal chad a uchul ma klengit a siliseb ra belulechad ma rokuil chad a mlora klengit, me ngsiliseb ra rokui chad a kodall, el ua kodall luleak a klengit el me soiseb.” Ngera itia el “klengit”? Sel bo dengesonges er a chelerrungel. Ma Jehovah a diak lsebechel el kongei me di lengar er ngii aike el rokui el diak lemecherrungel ma lechub e ngdiak lemelemalt. Ma rokui el chad a mildiukes er a klengit ma chelebirukel el mla er ngike el kot el chad el Adam, me nguaisei e te mlo “chederdall ra kodall.” (Rom 5:12, 14) Me te mad, el di uai a charm el mo mad.​—Olisechakl 3:19-21.

32. Ngmekera Biblia a losaod er sel demildiukes er ngii el kodall?

³² Ngera itia el “kodall”? A kodall a ikrel a klengar. A Dios a milsa chad a omelatk er a diak a ullebengelel el klengar el ngar er tia el chutem a lolengesenges. Engdi, dimlak lolengesenges, ma blsel a mle kodall, el diak lomelechesiu, el diak lengar. A Dios a dimlak a ta el taem el losaod el kmo a lak lolengesenges a chad e lemad e ngmo oidii a klengar er ngii el mo er sel diak lemeues el blekeradel el datk ma lechub e ngmo er a “beluu er a ngau.” Ngulemeklatk er a chad el kmo: “Ko [mo] mad.” Ngmle ngike el lomekoad er a rechad el Diabelong el lulemulak el kmo: “Ngdiak bo mad.” (Genesis 2:17; 3:4; Johanes 8:44) Ma rechad el rokui el mla er a Adam el mei a rokui el di mad el mo chebechab.​—Olisechakl 9:5, 10; Psalm 115:17; 146:4.

33. (a) Ngera sel mengasireng e klebokel el ngar er a mederir a rechad me tia el chutem? (b) Ngera ede el tekoi el lekiltmokl a Jehovah el oeak a Ngelekel?

³³ Ma leuaisei, ngdiak a omeltkir a rulekoad er a ngar er a mederir? Ngngar er ngii a mengasireng el omeltkir el kirel a ngar er a mederir el klebesei! A Biblia a olecholt el kmo sel moktek er a Dios el kirel a paradis el chutem el kirir a rokui el chad, el dirrek a rulekoad, a diak bo leiit. Ma Jehovah a dmu el kmo: “A eanged a kingellek er chomerreder, e a chutem a druchellel ochik.” “Ma kmo menglebokel er sel deruchellel a chochik.” (Isaia 66:1; 60:13, NW) Me ngoeak a klou el bltikerreng er ngii, e a Jehovah a ulderchii a Ngelekel, el Tekoi, el me er tia el chutem, me bo lsebechir a rokui el chad el nguu a klengar el oeakngii. (Johanes 3:16; 1 Johanes 4:9) Me chelechang e ngar er ngii a ede el tekoi el kmal klou a ultutelel el bo dosaod el bo leketmokl a Jehovah el oeak a Ngelekel, el kmo, (1) a otebeded er a klisichel a kodall; (2) a okisir a rulekoad; ma (3) omengetmeklel a cherrungel el omengedereder el mo er a rokui el chad.

Otebeded er a Kodall

34, 35. (a) Ngera di ta el rolel e a chad a mlo sebechel el mengubet er a kodall? (b) Ngerang a olubet?

³⁴ A irechar, e a reprofet er a Dios a ullecholt a klaumerang er tir er sel omelatk el kmo a Dios a “mokisterir” er a kodall, er a bai sel osisechakl el kmo a klengar er a chad a diak lemad. (Hosea 13:14) Engdi te mekerang a rechad el mo mesisiich er a klisichel a kodall? Sel melemalt el llechul a Jehovah a ousbech el kmo ‘a klengar omtechei er a klengar, ma mad omtechei er a mad, ma uingel omtechei er a uingel.’ (Duteronomi 19:21) Me nguaisei, a ta er a cherrungel el chad a mle kirel el omtechei er a Adam el melenget er sel cherrungel el klengar er ngii, el mo omechar er sel luridii a Adam, e le rokui el chad a mildiukes er a kodall er sera loridii a cherrungel el klengar er ngii a Adam er a lak lolengesenges er a Dios.

³⁵ Sel llach el kmo ‘ngerang omtechei er a ngerang’ a blo lousbech er ngii er a reksi er a klechad. Sel tekoi el blechoel lousbech er ngii a kmo a “char el olubet.” Ngerang a olubet? “Ngchar er a bo loluut er a chad ma lechub e ngklalo er ngike el lobang. Me nguaisei a remekelebus er a mekemad ma lechub e ngsibai a mengubet sel lebo ltobed er a kelebus el kirel a klou el udoud ma lechub e ngklou a ultutelel el chad. . . . Ma ngii di lengerang el mlomtechei er ngii a olubet el melubet er ngii.”d Nguleak a kngtil a Adam, e a rokui el chad a mlo uai a rekelebus er a mekemad ma lechub e ngsibai, el ngar er a klengit ma kodall. Ngmle kirel el mo er ngii a olubet, me bo lsebechir el tuobed er sel blekeradel. Ngmle kirel a cherrungel el klengar el mo tenget, el di uai a Adam, me bo lak a mondai er a uriul el kirel a llemeltel a char er a olubet.

36. Ngmlekera Jehovah el kutmeklii a cherrungel el klengar el kirel a olubet?

³⁶ Engdi, kede mo metik er choua itia el cherrungel el klengar er a chad er ker? E le rokui el chad, el klengelakel er a Adam, a milechell el diak lemecherrungel. “Me ngdiak a ta er tir el sebechir el ngubetii a odam er ngii, ma ka bo lebsa Dios a olubet el kirel.” (Psalm 49:7) Ma longer er tiang, a Jehovah, el oeak sel dmolech el bltikerreng er ngii el mo er a klechad, a ulderchii ngike el mekreos el “kot el mlechell” el Ngelekel el mo tenget. Me nguliuelii sel cherrungel el klengar er ngike el Ngelekel el reng, el Tekoi, el mo er a delel a ekebil er a Judea, el Maria. Me ngmlo dioll e milechellii a ngalek el sechal, el mlungakl er a “Jesus.” (Matteus 1:18-25) Me ngike el Lulemeob er a klengar a ulterekokl el sebechel el meruul er choua itia el mengasireng el tekoi.

37. Ngmlekerang a Jesus er a lolecholt er sel bltikerreng er ngii el mo er tirke el rokui el sorir a klengar?

³⁷ Ma Jesus a mlukeroul el mo klou, e mlodersii el mo er a Jehovah, e mlo metecholb. E seikid e a Dios a ngileltii el mo meruul er aike el Soal. (Matteus 3:13, 16, 17) A klengar er a Jesus a mla er a eanged el mei me ngmle cherrungel, ma uchul me ngmle sebechel el odersii itia el cherrungel el klengar er ngii, el mo osobelterir er a rokui el chad er a kodall. (Rom 6:23; 5:18, 19) Ma uchul me ngmillekoi el kmo: “Ngak a mlei el kirel me bo lolab a klengar a sib, el mo olab el olsibes.” “Ngdiak a chad el oba guk kloul bltikerreng er tial le bengkengkii a klengar er ngii a chad el bedul ar sechelil.” (Johanes 10:10; 15:13) Sera lokodir a Jesus a Satan er a teluo el kerrekar, a Jesus a kilengei el mo mad el uaisei, el mle medenge el kmo tirke el mo oumerang a mo sebechir el nguu a klengar el oeak itia el olubet.​—Matteus 20:28; 1 Timoteus 2:5, 6.

Ltel a Klengar

38. Ngmlekerang a Ngelekel a Dios er a lluut el me ngar, e ngera ngochotii tiang?

³⁸ Alta e a recherroel a milekodir, engdi a Ngelekel a Dios a dimlak loridii sel llemeltel el mo nguu a cherrungel el klengar, e le nguleba blakerreng el mo er a Dios. Engdi, ngmlekera Jesus e mlo sebechel el lousbech er sel llemeltel er a klengar er a klechad, el kirir a rechad, a lsekum e ngmlad e mla er a debull? Me ngtiaikid e a Jehovah a mirruul er a kuk ta er a ongasireng el tekoi, el ngii a mle kot el rirellii. Ngar er sel ongede el sils er a lengar er a debull a Jesus, e a Jehovah a ulekisii er a kodall el ua reng, el diak lengemed. (Rom 6:9; 1 Petrus 3:18) Me bo lolisiich er sel klaumerang el kirel a okiis, a Jesus a uluusbech er a bedengel a klechad e dilum er a kakerous el taem el mo er a redisciplo er ngii, e a ta er a taem e te mle 500 e locha lmuut el betok er tir. Ngdimlak a ta er tir, ma ka lechapostol el Paulus el ngii a mlo meiko er a klebkellel a Jesus, a mlo sebechir el oumededenger er sel mengasireng el okisel.​—1 Korinth 15:3-8; Rellir ar Apostel 9:1-9.

39. (a) Ngmlekera Jesus er a lousbech er sel belkul a tengetengel, e a kot e ngmlo er a rua techang? (b) E ngera ta er a klou el mengasireng el tekoi el lullekoi er ngii a Jesus?

³⁹ Uriul er a 40 el klebesei er a lebekiis er a kodall a Jesus e ngngilasech el mo er a eanged er sel lengar er ngii a Dios, e mlo oldars er sel belkul tia el cherrungel el klengar er ngii el tilengetengii el kirir a rechad. “E a Kristus a uldersii a di tal tenget el mo cherechar el kirel a klengit, e sola e mo dengchokl ra kidekmel a Dios, e mengiil el dimerkmo le meruul ar cherrouel el mo deruchellel chochil.” (Hebru 10:12, 13) Me tirke el kot el lotebedeterir er a kodall el lokiu itia el olubet a tirke el mle blak a rengrir el Kristiano er sel lokedongall el “kekerel delebechel” “tirikel klekedall ra Kristus.” (Lukas 12:32; 1 Korinth 15:22, 23) Te “mlengubet el mlara delongelir ar chad,” e sel lebekiis e te mo reng el dmak tir ma Kristus el ngar er a eanged. (Chocholt 14:1-5) Engdi, ngkuk mo ua ngerang tirke el betok el milliol el dirke ulekoad el ngar er a chelsel a debellir? Sera ledirke ngar er tia el beluulechad, e a Jesus a dilu el kmo a Demal a milsa klisichel el mo oukerrekeriil e omekngar. Me ngdilechel el kmo: “Lak bo le rrau a rengmiu ra ikang; e a sikang a mei el bo lorrenges ra ngerel tirkel rokuil ngara debull, me te tuobed, . . . [e mo] mekiis.” (Johanes 5:26-29) Ngmo olluut er tir el mo er a klengar el ngar er a Paradis el chutem.

40, 41. (a) Ka msodii el kmo ngera belkul a “okiis.” (b) Ngera me ngsebeched el oumerang er sel telbilel a Dios el kirel a okiis?

⁴⁰ Ka momtab er a tekingel a Jesus el kmo: “Lak bo le rrau a rengmiu ra ikang.” Engdi, ngmekerang a mle meketeket el lulekoad el chad a lebekiis er a kodall? Ngdimlak lluut el mo chebechab a bedengel? Me nglocha bebil er aike el chebechab el mle bedengel a mla mengai el ousbech er ngii a bebil er a klengar, el uai a dellomel ma lechub e ngcharm. Engdi, a okiis a diak lebelkul a kmo a Dios a lmuut el mo melai aike el mla nguemed e lmuut el mousbech. Ngbai belkul a kmo a Dios a lmuut el mo omeob er ngii el chad, el di osisiu a blekerdelel. Me ngmo er ngii a beches el bedengel, e mo msa aike el dimla teletelel, ma osisiu el blekerdelel, e osisiu el uldesuel, e osisiu el blekerdelel a klengar er ngii el mlo er ngii el mo lmuut er a kodellel.

⁴¹ Ke locha mla oremii a blekeradel el kmo isel soam el blim a milseseb el mo diak. Engdi, ngsebechem el lmuut el mo mekedecherur el mo ua ingii, e le ke dirke ungil el medengelii sel teletelel el mle soam. Me ngulterekokl, e a Dios el ngii a Ulemeob er a uldasu a sebechel el lmuut el mo omeob er a rechad el tirke el medechel a omeltkir e le ngbetik a rengul er tir. (Isaia 64:8) Misei a uchul ma Biblia a ousbech er sel tekoi el kmo aike el “debull er a omelatk.” Me sel bo el temel a Dios el mo olekiis er a rulekoad, e ngliluut el mo meruul er sel mengasireng el omeruul, el di ua isel mengasireng el omerellel er a omebelel ngike el kot el chad, engdi seikid el taem e ngbetok el bo loruul er ngii.​—Genesis 2:7; Rellir ar Apostel 24:15.

42. Ngera ma diak a ullebengelel el klengar el ngar er tia el chutem a sebechel el mo er ngii e ulterekokl?

⁴² A Dios a mo olluut er a rechad el mo er a klengar, e loba omelatk el di kea lluut el mo er a kodall. Engdi ngmekerang e sebechel el mo er ngii a diak a ullebengelel el klengar? Ngulterekokl el mo er ngii e le sei a soal a Dios e le ngmoktek er ngii. (Johanes 6:37-40; Matteus 6:10) Ngdi ta luchul ma chad a mad er a chelecha el taem e le ngmildiukes er a kodall er a Adam. Engdi, sel dolebedebek er aike el betok el bedengel a mengasireng el tekoi el ngar er ngii er tia el beluulechad el mo uchul a deurreng er a klechad, e sel klemengetel a klengar er tir el ngesonges er a dart el rak a kmal kekedeb! Sera lebesterir tia el beluulechad a rengelekir a rechad, e a Dios a mle soal a rechad a lolemolem el kiei el dmeu a rengrir er aike el mengasireng el Blebelel, el diak di lekirel a dart el rak, ma lechub el ta el telael el rak, e ngbai mo cherechar!​—Psalm 115:16; 133:3.

A Cherrungel el Gobelment er a Budech

43. (a) Ngera me kede ousbech er a cherrungel el gobelment? (b) Me ngerang mo meruul a Jehovah el kirel tiang?

⁴³ Aike el gobelment er a klechad a mlo er a eungel a ultebechelel a Satan, e le ngike el mle kot el demad ma delad a ultngeklii a llechul a Dios. Me nguaisei e a Biblia a omekedong er a Satan el kmo “ngchelid er tial belulechad.” (2 Korinth 4:4) Maike el mekemad, ma ringel, ma chelebirukel, maike el chelitechetul aike el gobelment a ochotii tiang. Ma League of Nations ma United Nations a mlo diak lsebechir el kutmeklii a budech. Ma klechad a dirke oureng el kirel a gobelment er a budech. Ngdiak lemera el tekoi el kmo ngike el Lulemeob, el ngike el tilbir el mo olluut er a Paradis el me er tia el chutem, a dirrek el mo kutmeklii a cherrungel el gobelment el kirel sel Paradis? Me tiaikid a bo loruul er ngii a Jehovah. Me ngke el mo omtechei er Ngii el King er tia el gobelment a ngike el “Prince er a Budech” er ngii, el Kristus Jesus, e “a klisichel a kleking er ngii ma rengedel a di mo blechoel ngara budech.”​—Isaia 9:6, 7.

44. (a) Tia el gobelment ngmo er ngii er ker? (b) Ngmekerang e meketmokl?

⁴⁴ A Biblia a olecholt el kmo sel cherrungel el gobelment a mo er ngii er a eanged. A lengar er isei, e ngike el King el Jesus Kristus a mo sebechel el ungil el mengedereder er a beluulechad el rokir el ngar er a llemalt. Ma lmuut el tang, e ngmo er ngii a remo obengkel el mengedereder el ngar er sel diak lemeues el gobelment el ngar er a eanged. Me te milengilt er a delongelir a reblak a rengrir el chad, el tirke el lulebengkel a Jesus el oeak aike el betok el ongarm e lullekoi er tir el kmo: “Misei e ak mo oterekeklii er kemiu chomengedereder ra renged, el ua Demak el ulterekeklii er ngak.” (Lukas 22:28, 29) Te di mekesai er a delongelel a klechad a mengilt el mo er a eanged el obengkel a Kristus Jesus el mengedereder. Tiang a di ua aike el renged er a chelecha el sils, me te di mekesai a mengilt el mo chedal a gobelment. Ma Biblia a olecholt el kmo te di 144,000 a mo obengkel a Jesus Kristus e mengedereder. Me nguaisei, a Rengedel a Dios, ma lechub isel gobelment el ngar er a eanged, a uldimukl er a Kristus Jesus me tirke el 144,000 el mlengai er tia el chutem el mo er a eanged. (Chocholt 14:1-4; 5:9, 10) E kuk mo ua ngerang tia el beluulechad? A Psalm 45:16 a melekoi el kmo ngika el King a mo melilt er a “remo prince er ngii er a beluulechad el rokir.” Me tirke el chad el mo “prince,” ma lechub a remengkar el chedal isel gobelment, a mo mengilt er a eanged e le te kmal blak a rengrir el oltirakl er aike el llach er a llemalt.​—Momekesiu er a Isaia 32:1.

45, 46. (a) Ngera mle ua ledai er a osisecheklel a Jesus er tia el chutem? (b) Ngera me sel cherrungel el gobelment a dimlak lemereched el meketmokl? (c) Ngmlekera e a 1914 C.E. a mlo ua letelutk el rak er a ulaoch maike el mlo er ngii er a beluulechad?

⁴⁵ Ngoingerang e ngua ngerang e tia el cherrungel el gobelment a mo meketmokl? A Jesus er sera lengar er tia el chutem e tiaikid el gobelment a mle ua ledai er a osisecheklel. (Matteus 4:17; Lukas 8:1) Engdi, ngdimlak leketmeklii a Renged er sel taem, ma ka lesera lebekiis er a kodall. (Rellir ar Apostel 1:6-8) Me sera lebo er a eanged, ngdirrek el mle kirel el mengiil er sel telutk el taem er a Jehovah. (Psalm 110:1, 2; Hebru 1:13) Ma ulochel a Biblia a olecholt el kmo sel telutk el taem a mle 1914 C.E. Engdi, locha mo er ngii a mo oker el kmo, ‘A 1914 ngdimlak luchelel a chelebuul el me er tia el beluulechad, er a bai cherrungel el gobelment?’ Tia kmal klemerang! Ngar er ngii a belkul aika el chelebuul ma uldikel el dulemes er aika el mereko el betok el rak el mo er sel oketmeklel a Rengedel a Dios, el ua bo dosaod er ngii er a chelechang.

⁴⁶ Ngbekord el 35 el rak er uchei er a 1914, a Ongkerongel (isel kot el betok a ildisel er aika el babier er a klechelid el mla merous er a beluulechad el rokir) a di mla mesaod el kirel a 1914 el ua telutk el rak er a ulaoch er a Biblia. A otutel aika el ulaoch a mlo er ngii er sera 1914 el mei. A ta er aikang a mle ta er a ulochel a Jesus, el lullekoi er ngii el bekord el 1,900 el rak er a mla memong, el kirel a “olangch” el mo er ngii er a taem er a ullebongel er sel mekngit el blekeradel e mo olecholt el kmo ngmla nguu a klisichel omerredel el ngar er sel diak lemeues el demiel. Sera longer a kerrir a redisciplo er ngii el kirel tia el “olangch,” e ngdilu el kmo: “E le ngmo kautok ar beluu mar beluu, ma renged ma renged, e morngii a bosech ma desiu er ker me ker: ngdi ikal rokui a uchelel a ringel ra cheroll.” (Matteus 24:3, 7, 8) Ngmlo tmaut, e le sel kot er aika el mekemedil a beluulechad a ulemuchel er sera 1914, el mle euid el chachisois er a telemellel er aika el 900 el mekemad el mlo er ngii er aika el 2,500 el rak er uchei! Maike el chelebuul ma uldikel a millemolem el me er a chelecha el sils. Me kau ke mla chormii a telemellel a mekemad, ma ngelsonges er a kall, maike el meklou el desiu el mlo er ngii er sera 1914 el mei? A lsekum e nguaisei, ka mla mesa “olangch” er a “taem er a ullebongel” er tia el mekngit el blekeradel.​—Daniel 12:4.

47. Ngmlekerang e aike el blekeradel a ultaut er aika el “olangch” a liluut el mlo mesisiich er a chelecha el taem?

⁴⁷ Aika el “chelebuul” el mla er ngii a liluut el mechisois er sel Ongeru el Mekemedil a Beluulechad, el mle eua el chachisois a telemellel er sel Kot el Mekemedil a Beluulechad, e millemolem el me er a chelecha el taem er a nuclear, a tmaut er a ulochel a Jesus el kmo: “E morngii a kdekudel tekoi ma mekloul olangch el ngara eanged el mei.” (Lukas 21:11) Maika el obdisel a delengerenger ma chelebirukel, ma orrengesmengoit ma delengerengerir a rengalek, ma obdisel a chitel a klaumerang ma deleboes el omeruul​—aikaikid el rokui a ulemlaoch el lolecholt er sel “uriul el sils” er tia el mekngit el blekeradel.​—2 Timoteus 3:1-5; Matteus 24:12.

48. Ngtechang a uchul aika el chelebuul er tia el chutem, me ngera uchul me ngmla merael el kuk mo mekngit er sera 1914 el mei?

⁴⁸ Ma lsekum sel gobelment er a eanged a mileketmokl er sera 1914, e ngera uchul maika el chelebuul a ngar er ngii er a chelechang er tia el chutem? Ngngerechelel a Satan el Diabelong. Sera bo lenguu a klisichel a Renged a Kristus, e ngmle kot el mloumekemad er a Satan el ngar er sel diak lemeues el eanged. Misei, e a Satan, “el mengeuid ra belulechad el rokir,” a mlobidokl ngii ma rechanghel er ngii el me er tia el chutem. Ngomekdubech a betok el uldikel er tia el beluulechad, e le ngmedenge el kmo kmedang a telemellel. “Ngdi kom chebuul, kaul chutem ma daob, ele diabelong a mocha medengei el kmo ngkekedeb a taem er ngii, me ngoba meringel cheldechuderreng lechika er kemiu.”​—Chocholt 12:7-9, 12.

49. (a) Ngera mo duubech el mo er tirke el “lolekngemed ra beluulechad”? (b) Ngmekerang e mo “oukerrekeriil” er a rokui el renged a Jehovah?

⁴⁹ Ngmo er ngii a ullebengelel aika el chelebuul? Chochoi!​—sel “cho mokngemedeterir tirkel olekngemed ra belulechad,” sel gobelment er a eanged, el Rengedel ngike el Chimong el Kedidai el Dios. (Chocholt 11:18; Daniel 2:44) Ma Dios a di kea lebo lebechititerir a ngii dil gobelment, ma reklsuul el Kristiano, ma ngii di lechad me bo letemellii tia el chutem el lolab aike el mesisiich el dub ma lechub e ngii dil klekedall er a mekemad. A Dios, a bai melekoi el kmo: “Ma uldesuek a kmo ak mo chemudel a rokui el renged, e mo olekngemed er tir el oba cheldechuderreng er ngak, el mo oitelii el mo er tir.” (Sefania 3:8, NW) Ma Jehovah, el oeak ngike el Kristus er ngii, a mo ousbech a rokui el klisiich el ngar er ngii er a eanged me tia el chutem el mo olekngemed er tirke el rokui el loltirakl er a Satan el ngar er tia el beluulechad. Tia mo er ngii er a beluulechad el rokir, el uai sel Ieleb el mlo er ngii er a taem er a Noa.​—Jeremia 25:31-34; 2 Petrus 3:5-7; 10.

50. (a) Ngerang a “Armageddon”? (b) Te ngera tirke el mo suobel er a Armageddon?

⁵⁰ A Biblia a omekedo er tia el okngemedel aika el renged el kmo ngmekemedil a Dios er a Armageddon. (Chocholt 16:14-16) Ma remedemedemek a rengrir, el tirke el osiik er a Jehovah ma llemeltel, a mo suobel er a Armageddon e mo imuul el mo er sel beches el blekeradel er a Dios. (Sefania 2:3; Isaia 26:20, 21) Ma Biblia a melekoi el kirir el kmo: “Ngdi tirkel medemedemek a mo ungilbesrir el kiei el ngara beluu el ungil a rengrir ra cherrungel budech.” (Psalm 37:11) E seikid e ngmo omuchel sel omengetmeklel tia el chutem el mo Paradis!

A Osisechakl el kirel Sel Bo Deiuul er Sel Beches el Blekeradel

51. Ngera me ngklou a ultutelel obo mosiik er a klemerang er a chelechang?

⁵¹ Kau ngsoam el kiei el ngar er a Paradis? A lsekum e ke dmu ‘Chochoi,’ e ke locha mo dmeu a rengum el mo medenge el kmo sera losaod el kirel aike el chelebuul maike el “olangch” el kirel a ullebongel, e a Jesus a dilechel el kmo: “Tial telecheroll a diak bo lak el dimerkmo le borngii a ikal rokui.” (Matteus 24:34) Engdi, ngkmal mekngit a rengud e le oumesingd er a rechad er a chelecha el taem a ngar er sel meteu el rael el mo er a tellemall. (Matteus 7:13, 14) Ngmla mo kedeb a temir el ngodechii a blekerdelir. Kau a locha kmal dmeu a rengum el kirel a uleklatk er a Jehovah el me er kid! Me ngulterekokl e ngmo meklemeltii a rolem, e le Jehovah a soal obo mnguu a klengar.​—2 Petrus 3:9; Esekiel 18:23.

52. Ngera ke ousbech er ngii me bo lsebechem el lungil el melilt el kirel a klechelid?

⁵² Ma ungil el klaodengei a kmal klou a ultutelel er a chelechang. (1 Timoteus 2:4; Johanes 17:3) Ngsebechem el nguu er ker? Ngsebechem el metik er ngii er a ngii di el klechelid? A rebebil a dmu el kmo a rokui el klechelid a omekrael er kid el mo er sel osisiu el tekoi, aikang a di kakerous el rael e di osisiu el mo er a chetebtel a rois. Ngkol ua ngera el cheleuid el uldesuir! Tirke el melemiakl er a rois a ousbech a map, ma lechub e te omechar er a chad el mo omekrael er tir, me bo lsebechir el loltirakl er sel melemalt el rael. Me nguaisei, ngar er ngii a di ta el klechelid el klemerang el oitikikid el mo er a diak a ullebengelel el klengar, e kede ousbech a ulekrael el mo metik er ngii.​—Rellir ar Apostel 8:26-31.

53. (a) Ngkirem el mekerang, a lsoam el nguu a diak a ullebengelel el klengar? (b) Ngera bebil er a ongarm er a Satan el locha kirem el mo mesisiich er ngii?

⁵³ Me tia el babier a lekiltmeklii a Resioning er a Jehovah el mo ngosukau. Tia ngilsukau el mo medengei a bebil er a klemerang er a Biblia, adang uaisei e ngdiak? Ke locha mla oterekokl a derta el tekoi el kmo ngmlengai er a Tekingel a Dios ma lechub e ngdiak. Me chelechang, a lsoam el lolengeriakl el mo er sel omolatk er ngii, e ngkirem el melemolem el mesuub. El di uai a ungil el osisechakl a kutmeklii a chad el mo kiei er a delongelir a rechad er a bek el sils, me ngdirrek el uaisei a ungil el osisechakl er a Biblia a kutmeklid me bo lsebeched el kiei el lobengterir tirke el mo suobel e mo kiei er sel Paradis el chutem. (2 Timoteus 3:16, 17) Ma Satan a locha mo melasem el mengitechut er kau el ousbech er a resechelim el mo omtok er kau ma lechub e mengarm er kau el mo merechorech a rengum ma lechub e mo er aike el mekngit el deleboes el omeruul. Engdi diak bo mechitechut er a Satan. A osebelem er a ngar er a medam el klebesei kau ma telungalek er kau a ultuil er a omesubem er a Biblia.​—Matteus 10:36; 1 Johanes 2:15-17.

54. Ngera lmuut el ta er a rolel a omesuub el lebilskau a Jehovah el ngar er a beluam?

⁵⁴ Ngdirrek el ngar er ngii a ta er a rolel el sebechem el mesuub, er a di molemolem el mesuub er a Biblia. Ngar er ngii a rechad er a beluam el tir a semeriar er a omesuub er a Biblia e blechoel el mo er aika el miting el ngar er sel Kingdom Hall er tir. Me tirke el mo er aika el miting a ngmai aike el osisechakl er a Biblia e melasem el omeklemalt a klengar er tir me bo lsebechir el mo ungil el chad. Me te ouetkeu er a rebeches el mei, e dmu el kmo: “De bo de ngasech ra bukl ra Rubak, . . . Kede mo mesuub er sel soal a doruul er ngii; kede mo merael ra ikel rael el bla le ngilt.” (Isaia 2:3) A bebil er a ungil el uchul e ngkired el mo er aika el miting el mesaod er a Biblia a losaod er ngii a Hebru 10:24, 25, el dmu el kmo: “E bo de kasisiich el omekses a bltikerreng ma ungil omeruul, e lak de ua blekerdelir a bebil rar chad el mengoit chongdibel er kid, e bai de kachelechel, e domes er ngiil Sils lolekeed, me de mengal mo uaisei.”

55. (a) Ngera bebil er a rolel e a ongdibel er a Jehovah a ngodech er aike el bebil er a klechelid? (b) Ngmekerang e a Rechedal a Jehovah a ngar er a kltarreng el diak er a ngii di el bliongel er a rechad?

⁵⁵ Sel obo msiseb er a ongdibel er a Jehovah, e ke mo metik er sel blekeradel el ngar er ngii el kmal ngodech er aike el bebil er a eklesia. Ngdiak lebo lorael er a blil a udoud, e diak a klaititekangel er a delongelir a rechad, e diak a omengetukl er a rechad el loltirakl er a telungalek er ngii ma lechub e ngildisel a ududel. Sel kot el ngar er uchei el blekerdelir a rechedal a Jehovah a bltikerreng. E a kot, e te betik a rengrir a Jehovah, e ongerung, e te betik a rengrir er a rechad. Maikaikid a olengchelir a remera el Kristiano. (Matteus 22:37-39; Johanes 13:35) Ngungil obo er aika el miting er tir e momes el kmo nguaisei e ngdiak. Ke locha mo mechas a rengum er sel kltarreng er a delongelir. Te betok er a eua el milliol el Sioning er a beluulechad el rokir el ngar er a betok er a 234 el beluu. Engdi, te mesuub er sel osisiu el suobel er aika el miting er tir er a beluulechad el rokir. Ngoumesingd er a rechedal a Jehovah er a beluulechad el rokir a mesuub er sel osisiu el suobel er a di osisiu el taem, e le chelechang e te oliuid e oltobed a babier er a osisiu el taem er a betok el omelekoi. A kltarreng er a chelsel a cheldebechelel a Jehovah er a chelecha el taem a ua leta er a mengasireng el tekoi er a chelsel tia el kakeakl el beluulechad.

56. (a) Ngera el klungiaol obo mngai sel obo mteloi er a ongdibel er a Jehovah? (b) Ngkirel el mo ua ngerang a uldesuem, sel lebo er ngii a techerelbesum? (c) Ngera me ngklou a ultutelel obo mtibir a rengum el mo mesiou er a Jehovah?

⁵⁶ Sel obo blechoel el obengterir a rechedal a Jehovah, nglocha mo kirem el mo omail er kau er ngike el “beches el chad” e omekeroul aika el rodech er a reng er a Dios​—el “bltikerreng, ma deourreng, ma budech, ma kllourreng, ma blekokuii, ma ungilreng, ma blakerreng, ma delemedemek, ma chomengerem.” (Kolose 3:10, 12-14; Galatia 5:22, 23) Tiang a mo uchul a klou el deurreng er kau. Nglocha mo er ngii a bebil er a techerelbesum e le ke kiei er tia el mekngit el beluulechad ma lechub aike el chelitechetum. Engdi Jehovah a mo ngosukau. Ma Tekingel a omeklatk er tirke el melasem el odeuir a rengul el kmo: “Lak el sebek a rengmiu ra ngiidi le ngerang, e di moba chomereng el saul loldars a nglunguuch ma chongit ra bek el tekoi el subedii a Dios ra ikel molengit. Ma diak le metuk ra klemedengei rar chad el budech ra Dios a mo kokar a rengmiu ma chomelebedebekiu el ngara Kristus Jesus.” (Filipi 4:6, 7) A bltikerreng er a Jehovah a mo mekrolau, me ngmo soam el mo mesiou er ngii. Ma Rechedal a Jehovah a kmal mo dmeu a rengrir el ngosukau el mo tibir a klengar er kau el mo er ngike el betik a rengul el Dios e mo ta er a mesiungel. (Psalm 104:33; Lukas 9:23) Chochoi, tia kmal klou el techall. Ka di molebedebek! Ngsebechem el nguu sel turrekong er a diak a ullebengelel el klengar el ngar er a paradis el ngar er tia el chutem, e le ke ta er a remengull er a Jehovah.​—Sefania 2:3; Isaia 25:6, 8.

57. (a) Ngera el deurreng a mo medechel er a delongelel a Dios ma klechad, sel lebo er ngii a beches el blekeradel? (b) Ngera bebil er a klungiaol el bo moldeu a rengum er ngii?

⁵⁷ Ma leuaisei, e bo molemolem el mesuub e momekeroul er a bltikerreng ma deurreng er kau er a Jehovah, ma Ngelekel, me sel melemalt el gobelment el ngar er a eanged. Me sera losaod er tia el gobelment er a Dios maike el klengeltengat el bo loleiitel er bebrir a rechad, e a ulaoch el ngar er a Biblia a dmu el kmo: “Mesang, a blil a Dios chobengterir ar chad. Me ngii me ngmo obengterir el kiei, me te mo chad er ngii, ma Dios a di ngii el mo obengterir.” “A Dios el di ngii,” el ngii a kmal ngar er a bab er aika el mekngit el omerredel er a chelecha el sils, a mo kmeed er a rokui el chad, el ua lebekokeuii el Chedam el mo er tirke el rokui el betik a rengrir e mengull er ngii er a chelsel sel beches el blekeradel. Me nguaisei, ngmo er ngii a di ta el klechelid, sel mera el omengull er a Jehovah el Dios, e a remengull er ngii a mo dmeu a rengrir er sel ungil el deleongel er tir ma Dios el ua rengalek el mo er a Demerir. Ngkol ua ngera lungil el Chedam a bo lolecholt er ngii! “E mo mesuld a bek el iuosech ra mederir, e mo diak a kodall, ma klengiterreng ma langel ma ringel me ngmo diak, ele ngmla nguemed a ikel dimla ngarngii.”​—Chocholt 21:3, 4.

58. Ngera me ke ulterekokl el medenge el kmo a Jehovah a mo ‘remuul a bek el tekoi el mo beches’?

⁵⁸ Misei e tia el klou el mengasireng el omengetmeklel a paradis el chutem el ngar er a eungel a cherrungel el gobelment er a eanged a mo mecherrungel. Ngkmal ulterekokl el di ua lebo lengasech a sils er a tutau e bo lengelt er a lekebesengei. A telbilel a Jehovah el Dios, el ngike el Lulemeob er a eanged me tia el chutem, a blechoel el kmal “ulterekokl e klemerang.” Me ngii ngike el mesubed el mla er a kingelel er a eanged el kmo: “Mesang! Ak meruul a bek el tekoi el mo beches.”​—Chocholt 21:5.

Sel domelekl er itia el babier, ke mekerang e onger er aika el ker?

Ngera bebil er a rolel e a Biblia a kmal ngar er a bab el babier?

Ngera ke milsuub el kirel a Dios?

Ngtechang ngike el Kristus Jesus?

Ngtechang ngike el Satan el Diabelong?

Ngera ma Dios a ulemechei a klengit me ngdi melemolem?

Ngera uchul ma chad a mad?

Ngua ngerang a blekerdelir a rulekoad?

Ngerang a olubet?

Ngmo er ngii a okiis er ker e mekerang e mo er ngii?

Ngerang a Renged, e ngerang mo kutmeklii?

Ngera aike el “olangch” er a “ullebengelel itia el mekngit el blekeradel”?

Ke mekerang e kutmeklau el kirel a diak a ullebengelel el klengar el ngar er a chelsel a Paradis?

[Footnote]

[Siasing el ngar er a 13 el llel]

El ua ta er a blebelel a Dios, e a chad a kuk kmal ngar er a bab er a bek el charm

[Siasing el ngar er a 18 el llel]

A Jesus a mle osisiu ngii me ngke el cherrungel el chad el Adam