A Rolel a Domuchel a Cheldechedechad er a Temel a Odingel

Ngngar er ngii a edei el meklou a ultutelel el tekoi el kired el melatk er a uchei er a dongetmokl a tekoi el soad el ousbech, er sel taem el bo doldingel a obliil: (1) Tia el klumech el kired el omerk er ngii a ungil el chais er a “evangkelio ra rengedel a Dios.” (Mt. 24:​14) Me alta e ngdiak di demereched el mesaod er ngii, engdi ngkmal kired el melatk el olengeseu er a rechad el mo mesang a klungel a ultutelel a usbechellel tia el tekoi, me a lechub e ngmo sebechir el mesang a klungiolel a lekengei el mesuub el kirel. (2) A klemeriarreng er kid el soad a rokui el chad a bo lengai a klungiolir er tia el tekoi, a ngosukid el mo meruul a tekoi el ua Jesus, e le ngsoad el mo remutech a rengrir a rechad. (Mk. 6:​34) Chouaika el klemeriarreng a sebechel el mocholt el okiu a ungil el klikm me a ungil el omerelled el kongei el orrenges er tir sel longedecheduch, e mo kltmokl el melodech a cheldechedechad, e dirrek el lousbech a ker el melisiich er tir el mo ouchais er kid aike el ngar er a uldesuir, me bo dodengei. A Kot el Korinth 9:​19-23 a ochotii el kmo a Paulus a mle sebechel el melodech a tekingel el kirel a ungil el chais el di uleltirakl a blekerdelir a rechad el lulengedecheduch er tir. (3) Ngar er a bebil el beluu, e a rechad el mo mesarech a kirir el mo kerekikl el omtab a blekerdelel aika el beluu er a uchei er a bo loldingel a obliil. Engdi ngngar er a oumesingd el beluu, e a chad er a blai a soal el mereched el mo medengelii a uchul me a ngodech el chad a dechor er a medal a tuangel er a blil.​​—Momekesiu er a Lk. 10:​5.