Ongede el Suobel
Ngtechang a Jesus Kristus?
Ngera ma Jesus a mokedong el kmo ng “kot el mlechell” el Ngelekel a Dios? (1)
Ngera me ngokedongall el “Tekoi”? (1)
Ngera ma Jesus a mlei er tia el chutem el ua chad? (2-4)
Ngera me ngmirruul aike el ongasireng el tekoi? (5)
Ngera ngmo meruul a Jesus er a ngar er a medad el di kmedung? (6)
1. A Jesus a kiliei er a eanged el mle chelechad el reng er a uchei er a lemei er a chutem. Ngii a mle kot el blebelel a Dios, me seikid a uchul e ngokedongall el kmo “kot el mlechell” el Ngelekel a Dios. (Kolose 1:15; Chocholt 3:14) A Jesus a di mle ngii el tang a ulebeob er a Dios. A Jehovah a uluusbech er a Jesus er a uchei er a lemei er a chutem el ua “chad el meduch el melib a blai” el lomeob a rokui el tekoi el ngar er a eanged ma chutem. (Osisechakl 8:22-31; Kolose 1:16, 17) A Dios a dirrek el luluusbech er ngii el ua Lemelekingel. Me seikid a uchul ma Jesus a mle okedongall el “Tekoi.”—Johanes 1:1-3; Chocholt 19:13.
2. A Dios a uldureklii a Ngelekel el me er a chutem er a loiuelii a klengar er ngii er a eanged el mo er a chelsel a omcherellel a Maria. Ma Jesus a dimlak a chad el demal. Me sei a uchul me ngdimlak lemediukes er a klengit ma diak lecherrungel el klengar. A Dios a uldureklii a Jesus el me er a chutem el kirel a ede el tekoi el kmo: (1) Ngmo olisechakl er a rechad a klemerang el kirel a Dios (Johanes 18:37), e (2) mo melemolem er a cherrungel el blakerreng, el mengetmokl er a kerebai el kired el mo oltirakl er ngii (1 Petrus 2:21), e (3) dirrek el mo tongetengii a klengar er ngii el mo melubet er kid er a klengit ma kodall. Ngera uchul me kede uluusbech er tia el tekoi?—Matteus 20:28.
3. Sera bo lak lolengesenges er a Dios, e ngke el kot el chad, el Adam, a rirellii a tekoi el lomekedong er ngii a Biblia el kmo “klengit.” Me seikid e a Dios a milelsii er a kodall. (Genesis 3:17-19) A blekerdelel a klechad er ngii a mlo diak el rredemii a blekerdelel a Dios, me seikid e ngmlo diak el cherrungel. Klemengetel a taem e ngmlekekokil el merael el mo chuodel e mlad. A Adam a chuliuid er tia el klengit el mo er a rengelekel el rokui. Me seikid a uchul me kede rokui el mo mechuodel, e mo smecher, e mad. Me ngmekera tia el klechad e mo suobel?—Rom 3:23; 5:12.
4. A Jesus a mle cherrungel el chad el di ua Adam. Engdi ngkuk ngodech er a Adam, e le Jesus a chillebangel a kmal meringel el lomelasem e di millemolem el lolecholt er a cherrungel el blekongesenges er ngii el mo er a Dios. Me seikid a uchul me ngmle sebechel el tongetengii a cherrungel el klechad er ngii el mo mengkad er sel kngtil a Adam. Tiakid sel lolekoi er ngii a Biblia el kmo ng “olubet.” Ngoeak tiakid e a rengelekel a Adam a sebechir el mo mimokl er a blals el kirel a kodall. Me tirke el rokui el lolecholt a klaumerang er tir er a Jesus a sebechel el muusubes a kngterir e mo nguu a diak a ullebengelel el klengar.—1 Timoteus 2:5, 6; Johanes 3:16; Rom 5:18, 19.
5. A Jesus er a lengar er tia el chutem e ngulemekungil er a resmecher, e ulemekang er a resongerenger, e milengellakl a ses el eolt. Ngdirrek el lullekiis er a rulekoad. Me ngera uchul ma Jesus a mirruul aika el ongasireng? (1) Ngmle mekngit a rengul el lomes er a rechad el chuarm, me ngmlo soal el lolengeseu er tir. (2) Aike el ongasireng el lurruul a ullecholt el kmo ng Ngelekel a Dios. (3) Ngdirrek el lullecholt el kmo ngngera ngmo meruul el kirir a rebekongesenges el chad sel lebo longederedel er tia el chutem el ua King.—Matteus 14:14; Markus 2:10-12; Johanes 5:28, 29.
6. A Jesus a mlad e a Dios a ulekisii el mo reng, me ngliluut el mo er a eanged. (1 Petrus 3:18) Uriul er isei, e a Dios a rirellii el mo King. Me ngdi kmedung e a Jesus a mo choroid aika el chelebirukel ma ringel er tia el chutem.—Psalm 37:9-11; Osisechakl 2:21, 22.
[Siasing el ngar er a 7 el llel]
osisecheklel, ma omerellel a ongasireng, ma tengetengel a klengar er ngii el mle kired a tekoi el mle uldimukl er a urerel a Jesus er a omesiou