Ongeim el Suobel
Ngerang a Moktek er a Dios el kirel Tia el Chutem?
Ngera ma Jehovah a ulemeob er tia el chutem? (1, 2)
Ngera me tia el chutem a diak el paradis er a chelechang? (3)
Ngera mo duubech el mo er a remekngit el chad? (4)
A ngar er a medad el klebesei, e ngerang mo meruul a Jesus el kirir a resmecher? ma remechuodel? ma rulekoad? (5, 6)
A lsekum ngsoam el mo melai a klengeltengat er a ngar er a medam el klebesei, e ngkirem el mekerang? (7)
1. A Jehovah a milebii tia el chutem me bo lsebechir a rechad el loldeu a rengrir el kiei er a chelsel el diak a ullebengelel. Ngmle soal a beluulechad a lolemolem el kiei er ngii a remelemalt e dmeu a rengrir el chad. (Psalm 115:16; Isaia 45:18) Tia el chutem a diak lebo lemetemall; ngbai di melemolem el ngar er ngii el diak a ullebengelel.—Psalm 104:5; Olisechakl 1:4.
2. Uchei er a bo lomeob er a chad a Dios, e Ngngileltii a telkib er tia el chutem e rirellii el mo klebokel el paradis. Ngulemekedong er ngii el kmo ngsers er a Eden. Ngliliang a kot el sechal ma redil, el Adam ma Eba, er tiang. E a mle moktek er a Dios el kirir a mle soal a bo lomechell e lomekeek er a beluulechad el rokir. Me sel lorael a rechad el mo betok e ngdirrek el mlo sebechir el merkii a paradis er a beluulechad el rokir.—Genesis 1:28; 2:8, 15.
3. A Adam ma Eba a rirebet er a klengit er a ldurengrir el tomellii a llechul a Dios. Ma Jehovah a uleltobed er tir er a sers er a Eden. Ma paradis a ririid. (Genesis 3:1-6, 23) Engdi Jehovah a dimlak lobes er a moktek er ngii el kirel tia el chutem. Ngtilbir el mo meruul er ngii el mo paradis, me bo lsebechir a rechad el mo kiei er ngii el diak a ullebengelel. Ngmekerang a bo loruul er tiang?—Psalm 37:29.
4. Uchei er a bo leparadis tia el chutem, e a remekngit el chad a kirir el mengai el mo cheroid. (Psalm 37:38) Tia el tekoi a mo duubech er a Armageddon, el ngii a mekemedil a Dios el mo merrob a chelebirukel. Uriul er tiang, e a Satan a mo mekelebus el 1,000 el rak. Me ngbelkul a kmo ngdiak a ta el mekngit el chad el mo medechel el mo melemall er tia el chutem. Te di rechedal a Dios a mo suobel.—Chocholt 16:14, 16; 20:1-3.
5. Uriul er tiang, e a Jesus a mo mengederedel er tia el chutem el King el kirel a 1,000 el rak. (Chocholt 20:6) Ngar er a cheungel a omengederederel e ngmo choroid a klengit er a uldesued ma bedenged. Me kede mo mecherrungel el chad el di ua blekerdelel a Adam ma Eba er a uchei er a lebo er a klengit. E seikid e ngii a mocha diak a secher, ma cheleuodel, ma kodall. A resmecher el chad a mo mukungil, ma remechuodel a lmuut el mo ngeasek.—Job 33:25; Isaia 33:24; Chocholt 21:3, 4.
6. Sel taem el Longederedel a Jesus el Ta el Telael el Rak, e a reblak a rengrir el chad a mo oureor el lomult er a beluulechad el rokir el mo paradis. (Lukas 23:43) Ngdirrek, el betok el milliol el mlad el chad a lmuut el mekiis el me chad el ngar er tia el chutem. (Rellir a Re Apostol 24:15) A lsekum te melemolem el meruul aike el lolekoi er tir a Dios el kmo ngkirir el meruul, e ngsebechir el melemolem el di ngar el diak a ullebengelel el ngar er tia el chutem. Engdi a lsekum ngdiak, e te mo nguemed el diak a ullebengelel.—Johanes 5:28, 29; Chocholt 20:11-15.
7. Ma kot el moktek er a Dios el kirel tia el chutem a ulterekokl el mo motaut. Kau ngsoam el mo teloi er a redmeu a rengrir el melai aika el klengeltengat? A lsekum nguaisei, e ngkirem el melemolem el mesuub el kirel a Jehovah e moltirakl a llechul. A obo er aike el miting er a Resioning er a Jehovah el ngar er a Kingdom Hall e ngsebechem el mongeseu el mo meruul el uaisei.—Isaia 11:9; Hebru 10:24, 25.
[Siasing el ngar er a 10 el llel]
Ririid el paradis
[Siasing el ngar er a 11 el llel]
Uriul er a Armageddon, e a beluulechad a mo meketmokl el mo paradis