Ongeuid el Suobel
Sel Bo Dekeed er a Dios el Loeak a Nglunguuch
Ngera me ngklou a ultutelel el deblechoel el meluluuch? (1)
Kede meluluuch el mo er techang, e mekerang a doluluuch? (2, 3)
Ngerang aike el lungil el tekoi el sebeched el mesaod er a nglunguched? (4)
Ngkirem el meluluuch er choingerang? (5, 6)
A Dios ngorrenges a bek el nglunguuch? (7)
1. A nglunguuch a sel doba klengariou el reng e dongedecheduch er a Dios. Ngkmal kirem el blechoel el meluluuch el mo er a Dios. Seikid e ngmo sebechem el mo melechesiu er kau el kmeed er ngii el ua omkeed er a kmal sechelim. A Jehovah a kmal ngar er a bab e klou a klisichel, engdi ngorrenges a nglunguched! Kau ke blechoel el meluluuch el mo er a Dios?—Psalm 65:2; 1 Thesalonika 5:17.
2. A nglunguuch a tedebechel a omengull er kid. Me seikid a uchul, e ngdi ta el Dios, el Jehovah, a doluluuch el mo er ngii. A Jesus er a lengar er tia el chutem, e ngmle blechoel el meluluuch el mo er a Demal, e dimlak loluluuch el mo er a ngii di el techang. Me kid me ngkired el mo meruul el uaisei. (Matteus 4:10; 6:9) Engdi, a rokui el nglunguched a kired el melekoi el loeak a ngklel a Jesus. Tiang a olecholt el kmo kede mengull er sel deruchellel a Jesus e dirrek el lolecholt a klaumerang er kid el kirel a tengetengel el olubet.—Johanes 14:6; 1 Johanes 2:1, 2.
3. Sel doluluuch e ngkired el mengedecheduch er a Dios a tekoi el mera el ngar er a chelsel a rengud. Ngdiak el kired el melekoi a nglunguched el bla bo dungil el medengei e di domelekl ma lechub e donguiu er a chelsel a babier er a nglunguuch. (Matteus 6:7, 8) Ngsebeched el meluluuch el ngar er a ngii di el teletael el lolecholt a omengull, er a ngii di el taem, er a ngii di el ker. A Dios a dirrek el sebechel el remenges a nglunguuch el di ngar er a chelsel a rengud. (1 Samuel 1:12, 13) Ngkmal lungil a desiiekii a basio el chelellakl e cheroid er a rechad el debo er ngii e dolekoi a nglunguched.—Markus 1:35.
4. Ngera el tekoi a sebechem el meluluuch el kirel? Ngii di el tekoi el sebechel el ngar er ngii a lrellii er a klausechelei er kau me ngii. (Filipi 4:6, 7) Sel klou el nglunguuch a ochotii el kmo ngkired el meluluuch el kirel a ngklel a Jehovah ma moktek er ngii. Ngdirrek el sebeched el lolengit el kirel aike el dousbech er a klengar er kid, ma chitel a kngtid, ma dirrek el ngeso me bo lsebeched el melemolem el lomtok a ongetikaik el mo er a klengit. (Matteus 6:9-13) A nglunguched a diak el kirel el lolecholt a blechelechelingaol el reng. Me ngkmal kired el di meluluuch el kirel a tekoi el ngii a ruedem aike el soal a Dios.—1 Johanes 5:14.
5. Ngsebechem el meluluuch er a ngii di el taem el bo lsoal a rengum el lolecholt a omereng el saul ma lechub e ke oldanges er a Dios. (1 Kronika 29:10-13) Ngkirem el meluluuch sel lebo er ngii a mondai er kau ma dirrek el sel mchelebangel a chomelsemai el kirel a klaumerang er kau. (Psalm 55:22; 120:1) Ngmelemalt el tekoi a omoluluuch er a uchei er a omomengur. (Matteus 14:19) A Jehovah a mengemedaol er kid el mo “blechoel el meluluuch.”—Efesus 6:18.
6. Ngileakl el kmal kired el meluluuch a lsekum kede mla ruebet er a oberaod el klengit. Chouaise el taem e ngkmal kired el lolengit er a klechubechub er a Jehovah ma klausubes er ngii. A lsekum kede ouchais a kngtid er ngii e melasem el mo er a tkurrebab el klisiched el diak deluut el mo omelekl er sel derirellii, e a Dios a “kmal kltmokl el mo ousubes.”—Psalm 86:5; Osisechakl 28:13.
7. A Jehovah a di orrenges a nglunguchir a remele malt el chad. Ma lsoam a nglunguchem a lemorenges er a Dios, e ngkmal kirem el melasem el kiei el loltirakl a llechul. (Osisechakl 15:29; 28:9) Ngkmal kirel el mo ngar er a iou a rengum sel moluluuch. (Lukas 18:9-14) Ngkirem el mo oureor el kirel aike el moluluuch el lolengit. Seikid e ke olecholt el kmo ke mera el loumerang e dirrek el nglunguchem a mera el ngar er a chelsel a rengum. E ngdi seikid e a Jehovah a mo sebechel el longer a nglunguchem.—Hebru 11:6.