Jesus Kristus Ngii Ngtechang?

“TE betok el chad el diak Lekristiano a oumerang el kmo Ng mle ngar er a bab e mellomes a rengul el sensei. Ngmle ta er tirke el kot el merael a chisel el chad el mle kiei.” (The World Book Encyclopedia) “Ngii” ngtechang? Ng Jesus Kristus, el ngike el uchul a Klekristiano. Ke medenge el kmo ngii ngtechang? Ngngar er ngii a rellii er a klengar er kau?

Aike el dilubech er a omesiungel a Jesus a llechukl er a Biblia er a chelsel a eua el babier er a reksi el domekedo er ngii el kmo Evangkelio. Ngua ngera el klemerang aike el cheldecheduch? Uriul er a lorritel er aikang, e a ta er a merael a chisel el chad er a reksi el Will Durant a milluches el kmo: “A lsekum te di rechad er a ta el telecheroll a mlo sebechir el melib er a kmal mesisiich e merael a chisel el chad, el kmal ngar er a bab a blekerdelel ma uldesuel el kirel a klodam er a klechad, e ngmo ua ongasireng el tekoi el kuk klou er aike el mengasireng el tekoi el llechukl er a chelsel aike el Evangkelio er a Biblia.”

Engdi a rebetok el milliol el chad er a Ongos ma kuk bebil er a beluu, e a Jesus Kristus a di ua lechad er a ngodech el beluu. Te locha oumera el kmo ngkiliei, engdi te diak lomdasu el kmo ngngar er ngii a ultutelel er a klengar er tir. A rekuk bebil a omdasu el kmo ngdiak a belkul a bo lolatk er a Jesus e le te mla omes aike el lurruul tirke el leko te oltirakl er ngii. A rebebil el ngar er a Siabal a locha mo dmu el kmo: ‘Te urrebetii a kenzibakudang er a Nagasaki, el beluu el ngar er ngii a lmuut el betok el Kristiano er a oumesingd el beluu er a Siabal.’

Engdi, ngsebechem el mo otelecheklii a toktang el kirel a secherel a chad a lsekum ngii el chad a diak loltirakl er a ulekrael er a toktang? Ngkmal diak. A rechad er a Klsuul el Klekristiano a meketeketa el mengemikr er a ulekrael er a Jesus el kirel a smecheklel aike el mondai er tir er a bek el sils. Me nguaisei, ngera me ngdiak molasem el mesuub el kirel a Jesus el kuk di kirem, er a bai motngeklii e le mekngit el blekerdelir tirke el leko te Kristiano a uchul, tirke el diak loltirakl er a ulekrael er ngii? Morritel er a Biblia, e mesa el kmo ngtecha ngii el Jesus e mekerang e ngmo sebechel el ngodechii a klengar er kau.

Bltikerreng—A Ulekrael er Ngii

A Jesus Kristus a mle klou el sensei el kiliei er a Palestine el bekord el 2,000 el rak er a mla me mong. Ngdi mekesai el tekoi a dodenge el kirel a klengar er ngii er a ledirk kekere el ngalek. (Matteus, er a 1 ma 2 el klou el bliongel; Lukas, er a 1 ma 2 el klou el bliongel) Sera lebo el 30 a rekil, e a Jesus a ulemuchel er a omesiungel el mo ‘ochotii a klemerang.’ (Johanes 18:37; Lukas 3:21-23) Tirke el teua el chad el uluuchais er a klengar er a Jesus a milsaod el kirel a urerel er a berkel a klumech el mo er a buai, el ike el ullebongel el ede el rak ma tedobech er a klengar er ngii er tia el chutem.

Sera loruul er a urerel, e a Jesus a dirrek el uluuchais er a redisciplo er ngii er sel kot el klou a ultutelel el tekoi el luluusbech er ngii el mo mesmechokl aike el kakerous el mondai el ngar er ngii er a klengar er tir. Ngera isel klou a ultutelel el tekoi? Ngbltikerreng. Ngar er sel kot el merael a chisel el cheldecheduch er a reksi er a klechad, el domekedo er ngii el kmo Cheldechedechal el Ngar er a Rois, e a Jesus a ullisechakl er a redisciplo er ngii er a rolel el kirir el ochotii a bltikerreng el mo er a rechad. Ngdilu el kmo: “Misei e a ikel ngiidi le ngerang el somiu a lruul ar chad lekor kemiu, dilerrek el moruul el uaisei el morar chad.” (Matteus 7:12) Me tia el llach a domekedo er ngii el kmo Mekreos el Llach. Tirke el “chad” el lullutk er tir a Jesus a uldimukl er a recherroed. Ngar er tia el osisiu el cheldecheduch, e ngdilu el kmo: “Bo le betik a rengmiu rar cherrouiu e moluluuch el kirir ar uldechelakl er kemiu.” (Matteus 5:44) Choua itia el bltikerreng ngdiak bo losmechokl aike el mondai el dechelebangel er a chelecha el sils? Ngike el mle merreder er a rechad er a Hindu el Mohandas Ghandi a millatk el uaisei. Ngdilu el kmo: “A bo [de]dak el kirel a otireklel aike el osisecheklel a Kristus er a Cheldechedechal el Ngar er a Rois, e seikid e ngmo sebeched el mesmechokl aike el mondai . . . er a beluulechad el rokir.” A lsekum a rokui el chad a mo oltirakl er a osisecheklel a Jesus el kirel a bltikerreng, e ngsebechel el omekungil aike el mondai er a klechad.

A Omerellel a Bltikerreng er Ngii

A Jesus a uleltirakl er aike el lullisechakl. Ngmle kerekikl el kirel a klungiolir a rebebil e ulechotii a bltikerreng er ngii el oeak a omerellel. A ta er a klebesei, e a Jesus ma redisciplo er ngii a ullisechakl er a rebetok el chad, e dimlak a temir el mo omengur. A Jesus a milsa el kmo a redisciplo er ngii a mle kirir el mo “telkib lolengull,” me te mlo er a diak a rechad er ngii el basio. Engdi a seked a uleakuchei e mlong e mengiil er tir. Ke milekerang oleko kau a mla er a tia el blekeradel el ua Jesus? A Jesus a “mlo chubteterir” me “ngulemuchel lolisechakl er tir a betok el tekoi.” (Markus 6:30-34) Tia el dmolech el klechubechub a milekrollii el mo ngosuterir a rebebil.

Aike el lurruul a Jesus el mlo klungiolir a rebebil a dimlak di losisecheklel er a tekoi er a klereng. Ngdirrek el ngilsuterir er a bebil er a rolel. El ua tia el kmo, ngulemeka er a 5,000 el sechal (el dilerrek el redil ma rengalek) el tirke el lulerrenges er ngii el mo telia el sils. E uriul e ngulemeka er a lmuut el 4,000 el chad. E a kuk ta er a taem, e nguluusbech er a kleim el blauang ma eru el ngikel, e uriul, e nguluusbech er a kleuid el blauang ma sese el ngikel. (Matteus 14:14-21; 15:32-38; Markus  6:35-44; 8:1-9) Ngmle ongasireng el tekoi? Chochoi, ngmirruul a mengasireng el omeruul.

A Jesus a dirrek el ulemekungil er a rebetok el smecher. Ngulemekungil er a remeiko, ma rechitechut, ma rekemkom, ma remechad. Ngdirrek el lullekiis er a rulekoad! (Lukas 7:22; Johanes 11:30-45) A ta er a taem, e a ta er a mle kemkom a ullengit er ngii el kmo: “A lungilbesul ra rengum, e ngsebechem el kikidak.” Ngmilekerang a Jesus? “Nguldersii a chimal el rutechii, e dilu er ngii el kmo, ‘Ngsoak; me bo mklikiid.’” (Markus 1:40, 41) A Jesus a kmal mle soal el ngosuterir. Ngoeak aike el ongasireng el omeruul, e ngullecholt er a bltikerreng er ngii el kirir a remetacherbeserir.

Ngkora meringel er kau el mo oumerang? Engdi a Jesus a mirruul a oumesingd er aike el mengasireng el tekoi el ngar er a buai. E dirrek a rulemtok er ngii, el tirke el millasem el osiik a kngtil er a bek el techall, a dimlak lsebechir el omtok el kmo ngmirruul aike el mengasireng el tekoi. (Johanes 9:1-34) Ma lmuut el tang, aike el mengasireng el omerellel a mla er ngii a moktek er ngii. Ngullengeseu er a rechad el mo dongchii a Jesus el ua ngike el lulderchii a Dios el mei.—Johanes 6:14.

A detelkib el omtab er aike el osisecheklel a Jesus ma klengar er ngii e ngolekeed er ngii er kid e mekrolid el mo oltirakl er sel bltikerreng er ngii. Engdi, ngdiak di letiakid el rolel e a Jesus a ngar er ngii a rellii er a klengar er kau. Ngdimlak di leklou el sensei el ullisechakl er a bltikerreng e lemerekong. Ngullecholt el kmo ngmle kiei er a uchei er a lebe lechad er tia el chutem el ua di-ta el Ngelekel a Dios. (Johanes 1:14; 3:16; 8:58; 17:5; 1 Johanes 4:9) Ngdirrek el ngar er ngii a klengar er ngii er a uriul er a klechad er ngii, ma uchul e nglmuut el klou a ultutelel el kirem. A Biblia a olecholt el kmo a Jesus a milekiis er a kodall e chelechang e ngmengedereder el ua King er a Rengedel a Dios. (Chocholt 11:15) A Jesus a dilu el kmo: “A diak a ulllebengelel klengar tiakid el bo lodengelkau el dital meral Dios, ma Jesus Kristus el ngikel mulderchii.” (Johanes 17:3; 20:31) Me nguaisei, a bo dodengelii a Jesus Kristus e ngsebechel el mo uchul a diak a ullebengelel el klengar el ngar er a Paradis! Ngmekerang e mo uaisei? Ngera me ngdiak molasem el mesuub a lmuut el betok el kirel a Jesus e mesa el kmo ngmekerang e ng “mengedereder er [kid] a bltikerreng ra Kristus” el mo oltirakl er ngii? (2 Korinth 5:14) A Resioning er a Jehovah a kmal sorir el mo ngosukau.—Johanes 13:34, 35.

A lsekum ngdiak louchais, e aike el rokui el bades a mlengai er a Tekoi er a Belau el Oidel a Biblia.