Mesaod er a Renged

Part 1: Ngmekerang a dotutii a ngerecheled el ouchais el kirel a Rengedel a Dios? Ngsebeched el omeksemeriar er a chad el omuchel a cheldechedechad el oeak sel dosaod a kakerous el tekoi, engdi ngkirel el mo bleketakl el kmo kede omerk el kirel a Rengedel a Dios.

A klou a ultutelel el telengtengil tia el ureor a uldimukl a donguiu me a lechub e dosaod a bades el kirel a Renged. Me sel mosaod el kirel a Renged, e mngesuterir tirke el chad el mongedecheduch er tir el mo medengei el kmo ngerang a Renged. Nglocha kirem el mesaod a lmuut el betok el tekoi er a di molekoi el kmo a Rengedel a Dios a kabelment. A rebebil a meringel er tir el omdasu er a kmung ngerang el diak lesang el kmo ngkabelment. Ngsebechem el mesaod er tia el tekoi er a betok el rolel. El ua tiang, a eolt a diak desang, engdi ngar er ngii a klisichel er a klengar er kid. Ngdiak el sebeched el mesa Ngike el omtebechel a eolt, engdi ngbleketakl el kmo ngar er ngii a klou el klisichel. A Biblia a melekoi el kirel el kmo ng “King el diak a uchelel ma ulebengelel, el mo cherechar.” (1 Ti. 1:17) Ngdirrek el sebechem el melekoi el kmo ngar er a meklou el beluu, e a rebetok el chad a dirkak lesa merreder er a beluu me a lechub e lebo er a capital. Engdi ngsebechir el mo medengei aika el tekoi el oeak a chais. Me nguaisei, a Biblia el mlotobed er a kuk betok er a 2,200 el omelekoi a ouchais el kirel a Rengedel a Dios; ngouchais er kid el kmo ngtecha mlukngerachel el mo mengedereder er ngii e ngerang meruul er ngii a Renged. A Ongkerongel, el motobed er a kuk betok el omelekoi er a ngii di el magazine a “Ouchais er a Rengedel a Jehovah,” el ua lemocholt er a medal ngii el babier.

Me bo el sebechem el ngosuterir a rechad el mo medengei el kmo ngerang a Renged, e nglocha sebechem el mesaod a bebil er a tekoi el sorir a kabelment a bo longetmokl el ua ungil keizai er a beluu, budech, diak a delengerenger, diak a omengetukel er a rokui el bedengir a rechad, ungil el skuul, me a ungil omengetmeklel a klengar. Mochotii el kmo ngdi okiu a Rengedel a Dios e aika el tekoi me a lmuut el bebil el urungulel a klechad a mo sebechel el mecherrungel.​—Psa. 145:16.

Molasem el omeksemeriar er a rechad me bo el sorir el mo chedal tia el Renged, el Jesus Kristus a mo King er ngii. Mouchais el kirel aike el mengasireng el tekoi el lurruul el olechotel aike el bo loruul er a ngar medad el klebesei. Bo blechoel el mesaod el kirel aike el kmal ungil el blekeradel el lullecholt. (Mt. 8:2, 3; 11:28-30) Mosaod el kmo ngtilengetengii a klengar er ngii el kired e a uriul e a Dios a ulekisii el mo nguu a diak el ngemed el klengar el ngar er a eanged. E ngar isei e ngmo mengedereder el King.​—Rel. 2:29-35.

Part 2: Molisiich el kmo a Rengedel a Dios a mengedereder er chelechang el ngar er a eanged. Engdi mutebengii el kmo a ruumesingd el chad a omes a mekngit el tekoi el duubechang er a beluulechad er chelechang e omdasu el kmo a Renged a dirkak bo longedereder. Mkengei er tia el tekoi, e moker er tir el kmo te medengei a tekingel a Jesus Kristus el kirel a olechotel a omengederederel. Mosaod a bebil er aike el telengtengil a olangch el ngar er a Mateus er a 24 el klou el bliongel, Markus er a 13 el klou el bliongel, me a lechub a Lukas er a 21 el klou el bliongel. E sola e moker el kmo ngera uchul me a chouaika el tekoi a mo duubech er a beluulechad er sel taem el Kristus a mlo king el ngar er a eanged. E bo monguiu er a Ocholt 12:7-10, 12.

A olechotel a tekoi el loruul a Rengedel a Dios a sebechem el menguiu er ngii er a Mateus 24:14, e mouchais el kirel a prokuram el olisechakl a Biblia er a beluulechad el rokir el meketmeklang er chelechang. (Isaia 54:13) Mouchais er a rechad el kirel aike el kakerous el skuul el lengai a klungiolir er ngii a Resioning er a Jehovah, el ngii el rokui a mengai er a Biblia, el diak locheraol. Mosaod el kmo obengkel a urered el oldingel a obliil, e kede dirrek el mesuub a Biblia el obengterir a rechad me a telungalek el ngar er a blirir er a chelsel a betok er a 230 el beluu. Ngera el kabelment er a klechad a sebechel el kutmeklii a chouaitia el prokuram er a osisechakl el diak el di el kirir a rechedal e ngdirrek el kirir a rokui el chad? Mongemedaol er a rechad el mei er a Blil a Ongdibel, el me teloi a miting me aike el meklou el ongdibel er a Resioning er a Jehovah, e lesa olechotel a chouaisei el osisechakl el mla ngmodech a klengar er a rechad.​—Isa. 2:2-4; 32:1, 17; Jn. 13:35.