Kau Ngngar er Ngii a Reng er Kau el Diak el Mad?

NGNGAR ER NGII a klengar er a uriul er a kodall? Tia el ker a mla mekerrau a rengrir a rechad el kirel a betok el telael el rak. Ngar er a bek el telecheroll, e a rechad er a kakerous el bliongel er a klechad a mla melebedebek er tia el tekoi e di tir el loltobed a kakerous el klaumerang er tir el kirel.

Meliuekl er a beluulechad el rokir, el luldimukl er aike el iungs er a Taiheiyo el ua Polynesia, ma Melanesia, ma Micronesia, e a rebetok el chad a oumerang el kmo a “reng” er a chad a melemolem el ngar sel lemad a chad. Ngmera el ngar er ngii a kmung ngerang el ngar er a chelsel a bedengel a chad el tuobed e melemolem el ngar sel lemad a chad? Ngerang a reng el ngar er a chelsel a di ngar el chad? Ngngera mo duubech sel demad? A mlukreng el Tekingel a Dios, el Biblia, a meskid a klemerang e ungil el nger el kirel aika el ker.

Ngerang a Reng?

Ngar er a chelsel a Biblia, e sel tekoi el loleiuid er ngii el kmo “reng” a di belkul a “telil” a chad. Engdi tiang a uldimukl er a kuk betok el tekoi er a di sel louteliil a chad. El ua tia el olechotel, a ta er a remelluches er a Biblia el Jakobus, a melekoi el kmo: “Ma chelechad el diak a reng er ngii a ulekoad.” (Jakobus 2:26) Me seikid, e a reng a sel klisiich el mengitengtik er a bedengel a chad.

Choua itia el klisiich a ulterekokl el diak di lolutk el mo er sel telil a chad, ma lechub e ngeolt el merael el mo tmuu e me tuobed er a olemedel a chad. E ngera me ngdiak? E le uriul er a bo lak louteliil a chad, e a klengar a melemolem el ngar er a chelsel a cells er a bedengel el tedeb el taem—ma lechub e “ngsese el bung er a klok,” a doltirakl a lolekoi a The World Book Encyclopedia. Tiaikid a uchul ma omengedechuul el lmuut el lolluut er a telil a chad a sebechel el loureor el tekoi, ma dirrek el sebeched el ngmai a klekedall er a bedengel a ta er a chad el mtechei a telemall el klekedellel a bedengel a kuk tang. Engdi sel ngeuil a klengar sel lriid er a chelsel a cells er a bedengel a chad, e ngdikea ngii di el cheldechuul el sebechel el lolutii a klengar er ngii el chad. Ma dikea ngii di lildois er a telil a klengar el sebechel el smisichii a mla mad el cell. Me seikid, e a reng, a sel diak lemeues el klisichel a klengar—ma lechub e ngngeuil a klengar—el ngii a meruul a cells me ngdi ngar. Tiaikid el klisichel a klengar a mesisiich e melemolem el ngar er ngii el oeak sel douteliil.—Job 34:14, 15.

Tia el reng ngdi oureor er a chelsir a rechad e merekong? A Biblia a ngosukid el mo metik er a mellomes el nger er tia el tekoi. A mellomes a rengul el King el Solomon a milluches el kmo: “Ngmekera e sebechel a chad el mo ultebechel el medengei el kmo a reng ra chad a merael el bedul bab, e a reng er a charm a merael el bedul iou el mo soiseb ra chutem?” (Olisechakl 3:21) Ma leuaisei e a charm ma rechad a dul lolekoi el kirir el kmo ngngar er ngii a reng er tir. Engdi tia ngmekerang e uaisei el tekoi?

A reng, ma lechub a klisichel a klengar, a sebeched el lomekesiu er ngii er a klisichel a dengki el remurt er a chelsel a mesil ma lechub a klalo el loumesil. Tia el diak lemeues el klisichel a dengki a sebeched el lousbech er ngii el meruul a betok el kakerous el tekoi, el lultuil er a bedengel a mesil el lomsang a klisichel. El di ua tia el olechotel, a stob a rruul el kirel el loltobed a kleald, ma computer a dousbech el mengederoder a uldasu e meluches ma lechub e ngmeruul a ochur, a TV a rruul el loltobed a llecheklel a tekoi ma oto. Me nguaisei, engdi tia el dengki a diak lobult el mo ua teletelel sel mesil el lomsa klisichel. Ngbai di melemolem el di klisiich e merekong. Me ngdi osisiu, a klisichel a klengar a diak lobult el mo ua teletelel ngike el chad ma lechub e ngcharm el lolisiich er ngii. Ngdiak a teletelel, ma diak a klisichel el lomdasu. A chad ma charm a dul di ngar er ngii a di “derta el reng” er tir. (Olisechakl 3:19, New World Translation) Misei a uchul, me sel lemad a chad, e ngdiak a reng er ngii el tuobed e melemolem el ngar el ngar er a kmung ker.

Ma leuaisei, e ngua ngera blekerdelir a rulekoad? E ngera duubech el mo er a reng sel lemad a chad?

“Ke Lmuut el Mo Chebechab”

Ngike el kot el chad, el Adam, er a ldurengul el mo diak el lolengesenges a llechul a Dios, e a Jehovah a dilu er ngii el kmo: “Ke mo kesib e mo meringel el oureor el omekdubech a dellomel el dimerkmo cho mluut el mora chutem el ngii cho mlengai er ngii. Ele kau a ulebeob ra chutem, me ke lmuut el mo chutem.” (Genesis 3:19) A Adam ngmla er ker er a uchei er a Jehovah a lengai a chebechab el mebii? Ngdimlak lengar er a ngii di el ker! Ngdimlak lengar er ngii. Ma Jehovah el Dios er a ldu el kmo “ke lmuut el mo chutem,” engdi mle belkul a kmo a Adam a mo mad. Me ngdimlak lemoiuul a klengar er a Adam el mo er a basio el kirir a rechelechad el reng. Sel lemad e ngdi lmuut el mo diak a klengar er ngii, me ngdi mo dibus. A belsel el lebilsa Dios a mle kodall—el mo diak a klengar—el dimlak el loiuelel a klengar er ngii el mo er a kuk ta er a basio.—Rom 6:23.

E kuk mekera tirke el bebil el mla mad? A blekerdelir a rulekoad a obeketakl el ngar er a Olisechakl 9:5, 10, el donguiu er ngii el kmo: “A rulekoad a diak a ngera el lodengei . . . Ngdiak a ureor, ma omelib, ma klemedengei ma lechub e ngellomes el ngar er a chelsel a debull.” (Moffatt) Ma leuaisei, e a kodall a melekoi er a blekeradel el diak a ngerang. A milluches er a Psalm a melekoi el kmo a chad sel lemad “e a reng er ngii a tuobed, e ngii a moluut el mo er a chutem; e sel sils e a uldesuel a mo diak.”—Psalm 146:4, NW.

Me ngbleketakl, el kmo a rulekoad a diak a ngera el lolechesuar, ma diak a ngera el loruul. Ngdiak a ngii di el ngera el lodengelii. Ngdiak el sebechir el mesekau, ma kal rengesau, ma lechub e longedecheduch er kau. Ngkmal diak el sebechir el ngosukau ma kal sebechir el tomellau. Me ngkmal diak el kirem el medakt er a rulekoad. Engdi ngmekerang a reng e “tuobed” er a chad sel lemad?

A Reng a “Moluut el Mo er a Mera el Dios”

A Biblia a melekoi el kmo a chad sel lemad, “e a reng a moluut el mo er a mera el Dios el ngii el milsterir a reblebelel.” (Olisechakl 12:7, NW) Tiang belkul a kmo ngklalo el reng el tuobed er a chad e mesebesebek er a melidiul el merael el mo er a Dios? Ngkmal diak! Sel rolel a Biblia a lousbech er tia el tekoi el “moluut” a diak lolekoi el kirel a omengitengtik el ngar er a ta er a basio el mo er a tang. El di ua tiang, a remla er a chelebirukel el Ngelekel a Israel a ledilu er tir el kmo: “A Rubak el olab a bek el klisiich a kmo, . . . ‘E ngdi cho mluut el mer ngak, e ak mo chemau kemiu.’” (Malaki 3:7) Ma Israel a ‘lluut’ el mo er a Jehovah e ngmle belkul a kmo ngdi mle kirir el lobult er aike el cheleuid el lomerolir e lmuut el mo oltirakl aike el melemalt el rael el mla er a Dios. Ma Jehovah a ‘lluut’ el mo er a Israel e ngdi mle belkul a kmo a kengei er ngii a lmuut el mo er a rechedal. Me ngngar er aika el eru el blekeradel e a tekoi el “moluut” a uldimukl er a blekeradel er a omeruul, el diak lolekoi el kirel a lolukl a chad er a ta er a basio el mo er a kuk tang.

Me ngdi osisiu, a lemad a chad me le “moluut” a reng el mo er a Dios e ngdiak a ngii di el lomengitengtik ma lechub e ngomerael el ngar er tia el chutem el mo er a eanged. Molatk er tia el tekoi el kmo, a reng a di sel klisichel a klengar. Sel ta el lriid seikid el klisiich er a bedengel a chad, e ngmocha di ta el Dios a sebechel el lolutii el msang. Ma reng a “moluut el mo er a mera el Dios” el belkul a kmo a ngii di lomelatk er a klengar er a ngar er a medad el kirel ngii el chad a mocha mui el lultuil er a Dios.

El ua tia el lolechotel, ka molebedebek er tia el tekoi, el lolekoi er ngii a Bades el kirel a kodellel a Jesus. A ta er a remelluches er a Gospel el Lukas a mesaod el kmo: “Itia e a Jesus a uleldiu el klou a ngerel el kmo, ‘Chedam, ak loia reng er ngak ra chimam!’ Me ngdilu el uaisei e suebek a telil.” (Lukas 23:46) Ma reng er a Jesus er a ltobed er ngii, e ngdimlak lemeues el merael el mo er a eanged. A Jesus a dimlak lebekiis er a kodall el mo lmuut er a ongedei er a klebesei. E liluut el mla er ngii a 40 el klebesei el lemla er a chutem er a uchei er a lengasech el mo er a eanged. (Rellir ar Apostel 1:3, 9) Engdi, sel taem er a lemad, e a Jesus a mle klou a rengul el mecherei a reng er ngii er a chimal a Demal, el mui el loumerang er sel klisichel a Jehovah el lmuut el mo olutii a klengar er ngii el msang.

Chochoi, ngdi ta el Dios a sebechel el loluut a klengar er a rechad el me ngar. (Psalm 104:30) Ngkol ua ngera el klou el techall a lebkisii choua itia el tekoi!

A Ulterekokl el Omelatk

A Biblia a melekoi el kmo: “A sikang a mei el bo lorrenges ra ngerel [a Jesus] tirikel rokui el ngara debull, me te tuobed.” (Johanes 5:28, 29) Chochoi, a Jesus Kristus a tilbir el kmo tirke el rokui el ngar er a debull el ngar er a omeltkel a Jehovah a mo mekiis, ma lechub e ngmo oluut a klengar er tir el mesterir. Me ngmo diak lemorenges a mekngit el chais el kirir a rechad el mla mad, e kede bai mo orrenges a chais er a deurreng el kirir a rechad el mla lmuut el me ngar. Ngkol ua ngera el deurreng a mo er ngii sel bo douetkeu er a rebetik er a rengud el mla er a debull!

Ngsoam el lmuut el mo medengei a betok el kirel a kmo ke mekerang e mo ngmai a klungiolem er tia el omelatk er a klengar el mla er a Dios el mei? Aki mengemedaol er kau el mo meluches el mo er a ta er aika el address el llechukl er a eou el kirel a babier el dai er ngii a kmo Ngsebechem el Mo Sechelil a Dios!

A oidel a Biblia el lousbech er ngil a Kedeb el Chuodel el Testament ma Beches el Testament engdi a lengodech e ngolecholt.