Kemiu el Ngeasek​—Ko Mo Mekerang a Klengar er Kemiu?

GSOAK a kot el ungil er a klengar er ngak.” Aikang a tekingel a ta el ngeasek el redil. Kau a ulterekokl el soam a osisiu el tekoi. Engdi ke mekerang e ngmai a “kot el ungil” er a klengar? Aike el kombalii el oltobed a chisel me a omesodel a tekoi er a beluulechad, resechelim, me a resensei er kau, a locha mo melekoi el kmo ngoeak a omongereker a betok el udoud e moldeu er a rengum er a ngarbab a deruchellel el ureor​—me bo er a blsachel er a remera el chad!

Engdi a Biblia a omeklatk er a rengeasek el kmo a loltoir a tekoi er a kerruul e ngdi ‘ua loltoir er a eolt.’ (Olisechakl 4:4) A ta er a uchul tiang a kmo, te di mekesai el ngeasek a mera el sebechir el mo merau e mo merael a chisir. E tirke el mlo sebechir a blechoel el kmal metirm a rengrir el mlecheblad er a chouaisei el tekoi. A ta el ngeasek er a Britain a uleltoir a kebkall el deruchall er a ureor el oeak a ngarbab el skuul e dilu el kmo, “A ungil el klengar el oeak a kerruul er a chad a di ua bechachau el baks. Sel ta el mesa chelsel me a lechub e molebedebek aike el mo rsel a chouaisei el klengar engdi bechachau el diak a ngerang er ngii.” Nguaisei, a urerel a chad a sebechel el mo uchul a klemerau me a chetengakl el kirel. Engdi ngdiak el sebechel el lodesebii a rengum el kirel a usbechem er a “tekoi er a klereng.” (Matteus 5:3, New World Translation) A 1 Johanes 2:17 a dirrek el omeklatk el kmo a ‘beluulechad a mo nguemed.’ Me a oblo merau er tia el beluulechad, me ngdi kirel a di tedeb el taem.

A Olisechakl 12:1 a mengelechel er a rengeasek el kmo: “Molatk er Omebelem sel dirk mngeasek.” Nguaisei, a kot el ungil el rolel el mousbech er a klengar er kau a mo mesiou er a Jehovah el Dios. Engdi kot, e ngkirem el mo rredemelel a chad el mesiou er a Dios. Ngmekerang a omoruul er tiang? Me a omousbech er a klengar er kau el mesiou er a Dios e ngngera uldimukl er ngii?

Bo Mrredemelel a Ta er a Sioning er a Jehovah

A kot, e ngkirem el mekurulii a urungulem el mo soam el mesiou er a Dios​—e le alta demam me a delam a Kristiano, engdi tiang a diak el di el ngii el mo er ngii er kau. Ngkirem el di kau el mo er ngii a deleuill er kau me a Jehovah. A ta el ngeasek el redil a dilu el kmo: “A nglunguuch a ngosukau el mo er ngii a deleuill er kau me a Jehovah.”​—Psalm 62:8; Jakobus 4:8.

A Rom 12:2 a ochotii a ta er a tekoi el kirem el meruul er ngii. Ngmelekoi el kmo: “Bo msal medengei el kmo ngngera soal a Dios, me ngngera ungil lodeuir a rengul a Dios.” Ngmla ta el moumededenger a bebil er a tekoi el bla mosisechakl er ngii? A leuaisei, e motireklii tia el uleklatk el ngar er a Biblia e “bo msal medengei” el kmo aika el tekoi a klemerang! Di el kau el merritel a suobel. Monguiu er a Biblia me aike el babier el mesaod a suobel er a Biblia. A omosuub el kirel a Dios e ngdiak di mousbech er a uldesuem el merritel a tekoi e lemerekong. Ngkirem el mengoit a taem el melebedebek aike el monguiu me bo el sebechel el mo medechel er a rengum. Tiang a mo mekurulii a bltkil a rengum el mo er a Dios.​—Psalm 1:2, 3.

E a ongingil, e molasem el louchais aike el mosuub el mo er tirke el omdak el ngar er a skuul. A ureor er a odingel a obliil a ongingil el tekoi el kirem el meruul er ngii. A lebebil, e ke locha mo metik er a chad el omdak el ngar er a skuul sel moldingel, e tiang a sebechel el choitechetur a rengum. Engdi a Biblia a mengelechel er kid me lak bo de “merur ra evangkelio.” (Rom 1:16) Kau a omesterir a klumech er a klengar me a omelatk! Me ngera me ke merur er ngii?

A lsekum a demam me a delam a Kristiano, e ke locha mla obengterir el meruul er tia el ureor. Engdi kau ngsebechem el remuul a betok er a di mdechor er a medal a tuangel e lako mongedecheduch me a lechub e ke di merous a babier me a tract? Ngsebechem el di kau el mengedecheduch er a medal a tuangel er a obliil, e ousbech er a Biblia el olisechakl er a chad er ngii el blai? A lsekum e ngdiak e molengit a ngeso er a demam me a delam me a lechub e ngta er a klou el chad er a ongdibel. Mrellii el mo turrekong er kau el mo rredemelel a dirkak el metecholb el chad el mla mo omerk er a ungil el chais!

Omerollel a taem, e ngmo sebechem el rullii a telbilel a reng er kau​—me ke iaksok er a Dios el mo mesiou er ngii er chelecha el mong. (Rom 12:1) Engdi a telbilel a reng a diak el kora di berrotel el tekoi. A Dios a soal a rokui el chad a ‘lolecholt ra ngerir e lsobel.’ (Rom 10:10) Sel taem el ometecholb, e a kot e ke ochotii er a ngerem a klaumerang er kau er a mederir a rechad, e mochu metecholb er a ralm. (Matteus 28:19, 20) Ngklemerang el kmo a techolb a kmal klou a ultutelel el bakes. Engdi lak momai er a rengum el melatk el kmo kele bo lak el sebechem el lomelemii a telbilem. A obo multuil er a Dios el kirel a klisiich, e ngmo meskau a “diak le metuk el klisiich” el mo ngosukau el mo mesisiich el dechor.​—2 Korinth 4:7; 1 Petrus 5:10.

Sel ometecholb, e ke mocha ta er a Sioning er a Jehovah. (Isaia 43:10) Tiang a ngar er ngii a klou el ngedechii er a rolel a mousbech er a klengar er kau. Me a telbilel a reng a uldimukl er ngii a ‘chomchitii a klechad er kau.’ (Matteus 16:24) Me ke locha mo mengoit a bebil er a turrekong el murruul el di kirem me a lechub a tekoi el mullatk el kmo ngmo uchul a ungil el klengar el kirem e mo “omuchel losiik ra rengedel a Dios ma llemeltel.” (Matteus 6:33) E a telbilel a reng me a techolb a mkais a betok el techall el mo sebechem el meruul er tiang. Ka me bo dosaod a bebil er ngii.

Aike el Techall el Mo Mesiou er a Dios el Mui el Taem

● Mui el Taem el Omesiou a ta er aika el techall. A chad el ngar er a mui el taem el omesiou a telecholb e ungil a blekerdelel el Kristiano el mla kutmokl a temel me bo el sebechel el chemoit a lekesengil e ng 70 el sikang er a bek el buil el omerk er a ungil el chais. A omongoit a klou el taem el loldingel e ngmo ngosukau el lomekeroul er a decham el omerk er a klumech e olisechakl er a rechad. Te betok el ngar er a mui el taem el omesiou a dmeu a rengrir sel lengesuterir a rechad el losuub a Biblia el obengterir el mo metecholb el mo Sioning er a Jehovah. Ngera el ureor a sebechel el mekesiur a chouaisei el deurreng el kirem?

A rebetok el ngar er a mui el taem el omesiou a ngar er ngii a mekekerei el urerir el olengeseu er tir el omechar aike el ousbech. A rebetok a dima mengetmokl er tir el kirel tia el ngerachel el oeak a lsuubii a ta er a bedengel a ureor er a skuul me a lechub a demerir me a rederrir. A lsekum e kau me a demam me a delam a omdasu el kmo ngungil a obo molai a lmuut el bebil er a omesuub er a uriul er a omtobed er a ongeteruich me a ongeru el skuul, e ngkirem el oterekeklii el kmo a moktek er kau, a diak el kirel me bo el luchul e bo mosuk a betok el udoud, e ngbai kirel me bo betik er a ureor el sebechel el ngosukau er a omesiungem me bo mteloi er a mui el taem el omesiou.

Engdi a klou a ultutelel el tekoi er a klengar er a chad el ngar er a mui el taem el omesiou, a diak el urerel, e ngbai omesiungel​—el olengeseu er a rebebil el mo nguu a klengar! Ngera me ngdiak mrellii a turrekong er kau el mo teloi er a mui el taem el omesiou? A mui el taem el omesiou a blechoel el mo uchul a kuk bebil er a techall er a omesiou. El ua tiang, a rebebil el ngar er a mui el taem el omesiou a melukl el mo er aike el basio el lousbech er a rumerk er a klumech er a Renged. A rekuk bebil a suubii a ta er a omelekoi e mesiou er a ongdibel el lousbech er ngii el omelekoi el ngar er a belurir me a lechub el ngar er a ngodech el beluu. Nguaisei, a mui el taem el omesiou a kot el ungil el rolel a klengar!

● Skuul er a Biblia el kirir a Rekristiano el Obekel. Tia el skuul a mesterir a techellir a rubekel me bo el sebechel a Jehovah me a cheldebechelel el ousbech er tir. A rebetok el tuobed er tia el skuul a mo modurokl el mo olengeseu aike el basio el ngar er a belurir el ousbech a ngeso. Me a rebebil a mo modurokl el mo er a ngodech el beluu a lsekum ngsebechir. Ngsebechir el mo mesiou el ua temporary special pioneer el mo omuchel e menglou a ureor er aike el basio el ngar er a mesechesechel a meklou el beluu.

● Skuul er a Biblia el kirir a Remesobil el Odam a mleketmokl el olisechakl er a rediak el bechiil el mechuodel me a rudam el olengeseu er a remechuodel el rredemelel a ureor. Tia el eai el sandei el skuul a mo mesaod a tekoi el ua ngerechelir a remechuodel me a rudam el olengeseu er tir, me a bldeklel a tekoi, me a rolel a longedecheduch er a buai. A rebebil a modurokl el mo mesiou el ngar er a belurir. E a rekuk bebil a mo mesiou el ngar er a ngodech el beluu.

● Omesiou el ngar er a Bethel a uldimukl er ngii a dosiou el diak dudeuudel el ngar er aike el obis er a branch er a Resioning er a Jehovah. A rebebil el ngar er a Bethel a olengeseu el meruul aike el babier el mesaod a suobel er a Biblia. A rebebil a meruul a kuk bebil er a ureor, el ua omengetmeklel a blai me a klekedall el lousbech el meruul aike el babier el mesaod a suobel er a Biblia me a lechub e te mengetmokl aike el lousbech tirke el ngar er a Bethel. Aika el rokui a mekreos el techall er a omesiou el mo er a Jehovah. Me a lmuut el tang, tirke el ngar er a Bethel a dmeu a rengrir el medengei el kmo a ngii di el tekoi el loruul a mo uchul a klungiolir a rebetok el odam el meliuekl er a beluulechad.

A lebebil e a rudam el ngar er ngii a ileakl el duch er tir a loutkeu er tir el mo mesiou er a Bethel. Engdi a rebetok el odam a mosisechakl er a uriul er a lebo er a Bethel. Tirke el ngar er a Bethel a diak el losiou el kirel a kerruul e te bai ungil a rengrir er aike el mla meketmokl el kirir el kirel a omengelir, delengcheklir, me a sesei el cheral a siungel a bedengir. A ta el ngeasek el ngar er a telungalek er a Bethel a mesaod er a omesiungel el kmo: “Ngmera el ungil! Ngdiak el beot a ureor, engdi ak mla ngmai a betok el klengeltengat e le ngak el mesiou el ngar er tiang.”

● Omesiou el mo er a ngodech el beluu a msang a techall a chad el mo teloi er a ureor er a okedecherul a blai er a branch me a Kingdom Hall. Tirke el domekedong er tir el kmo te ngar er a omesiou el mo er a ngodech el beluu, a merael el mo er a ta er a beluu el mo olengeseu er a chouaisei el ureor. Tiang a ta er a teletelel a chedaol el omesiou, el di ua urerir tirke el ulemekedechor er a templo er a Salomon. (1 King 8:13-​18) A remesiou el mo er a ngodech el beluu a mukerreu el ua blekerdelir a rengar er a telungalek er a Bethel. Ngmera el klou el techall a lobang tirka el odam me a rudos el ngar er tia el ureor el mo uchul a odanges el mo er a Jehovah!

Mosiou er a Jehovah el Oba Klengar er Kau el Rokir

A omosiou er a Jehovah sei a kot el ungil el rolel el mousbech er a klengar er kau. Ngera me ngdiak mrellii a turrekong er kau el mo mesiou er a Dios el mui el taem? Mosaod er a mui el taem el omesiou el obengkel a demam me a delam, me a remechuodel er a ongdibel er kau, me ngike el odam el oldingel a ongdibel. Me a lsekum ke semeriar el mo er a Bethel, Skuul er a Biblia el kirir a Remesobil el Odam, me a Skuul er a Biblia el kirir a Rekristiano el Obekel, e bo er aike el miting el ngar er ngii er aike el edei me a lechub e ngeua el sils el ongdibel el kirir tirke el chad el semeriar aika el tekoi.

Nguaisei engdi, ngdiak el rokui el chad a mo rredemelel me a lechub e ngmo sebechir el mo mesiou el mui el taem. A lebebil er a taem e a secherel a bedenged, me a tekoi er a udoud, me a ngerecheled er a chelsel a telungalek a uchul me ngmo kesai el tekoi a sebeched el meruul. Me a leuaisei engdi kid el blak a rengud el Kristiano a kired el oltirakl er tia el omellach el ngar er a Biblia el kmo: “Bo le betik a rengum ra Rubak el Dios er kau era rengum el rokir, ma chomeltkem el rokir, ma chomelebedebekem el rokir.” (Matteus 22:37) A Jehovah a soal a omoruul er sel sebechem el oltirakl er a blekerdelel a klengar er kau. Me a leuaisei e ngngar er a ngii di el blekerdelel a klengar er kau, e mrellii a omesiungem el mo er a Jehovah el mo kot. E mruul a ungil el turrekong er kau er a klereng. Nguaisei, a “molatk er Omebelem sel dirk mngeasek”​—e ke mo mukngeltengat el diak a ulebengelel e le kau el mirruul el uaisei!

Aki uluusbech er a Chuodel el Testament er a Chedaol Biblia me a Beches el Testament el di mla oidel a Biblia el tekoi er a Belau el kirel aike el bades el ngar er a chelsel tia el babier.