“Mo Lmuut er a Bek el Beluu er a Beluulchad”

1. Ngera klaisisiu er a rekot el Kristiano me a Resioning er a Jehovah er chelecha el taem?

TE MLE blak a rengrir el lomerk. Te uleba klengariourreng el kongei er a ngelsuil me a ulekrolel a chedaol reng. A odechelakl a dimlak el butek a ngerir. Me a Dios a kmal ulemekngeltengat er tir. Tia klemerang el kirir a rekot el Kristiano me a Resioning er a Jehovah er chelecha el taem.

2, 3. Ngera uchul me a babier er a Rellir a kmal ileakl?

² Aika el smiich el cheldecheduch er a babier er a Rellir a re Apostol a ulterekokl el mla smisichii a klaumerang er kau! Ngmera el ileakl el babier e le ngdi ngii el tang a ouchais a reksi er a rekot el Kristiano.

³ A babier er a Rellir omasech er a re 95 el chad er a 32 el beluu, 54 el mats, me a 9 el iungs. Ngmera el smiich el cheldecheduch el kirir a redi chad, remekedidai a rengrir el chad el mirruul a klsuul el klechelid, rengarbab a rengrir el chad er a balatiks, me a ruldechelakl el kmal mle mekngit a blekerdelir. Engdi a ngaruchei er ngii ngmesaod er a rudam me a rudos er kau er a taem er a rechapostol el mle chuarm a mondai er a klengar engdi te uleba blakerreng el lomerk.

4. Ngera uchul me kede omelechesiu er kid el close er a rechad el ua apostol Paulus, Tabitha, me a relmuut el bebil er a reblak a rengrir el sioning er a irechar?

⁴ Ngbekord el 2,000 el rak a delongeled kid me a reblak a rengrir el apostol Petrus me a Paulus, toktang el Lukas, bekururau el Barnabas, klou a blekengel el Stefanus, ungil a rengul el Tabitha, omtechakl er a rechad el Lydia, me a lmuut el bebil er a reblak a rengrir el sioning. Engdi kede omelechesiu er kid el kmal close er tir. E ngerang? E le kede oba osisiu el ngerachel el meruul er a remo disaiplo. (Mt. 28:19, 20) Ngmera el chetengakl el mei er kid el teloi er tia el lureor!

5. A rultirakl er a Jesus er a uchei te ulemuchel er a ngerechelir lomerk er ker?

⁵ Molatk er a ngerachel el Jesus a milsterir a rultirakl er ngii. Ngdilu el kmo: “Sel le mer kemiu a Chedaol Reng, e ng mor ngii a klisichiu, me kom mo ochotek er a Jerusalem, ma Judea el rokir, ma Samaria, el mo lmuut er a bek el beluu er a beluulchad.” (Rel. 1:8) A kot e a chedaol reng a mo mesterir a klisichir a redisaiplo el mo ocholt “er a Jerusalem.” (Rel. 1:1–8:3) Ongingil, e ngoeak a ulekrolel a chedaol reng e te mo ocholt er a “Judea el rokir, ma Samaria.” (Rel. 8:4–13:3) E a uriul e te ngiluu a ungil chais el mora “bek el beluu er a beluulchad.”​—Rel. 13:4–28:31.

6, 7. Ngera kede dolab sel domerk el dimlak er a rekot el Kristiano?

⁶ A rudam me a rudos er kau er a taem er a rechapostol a dimlak a cherrungel el Biblia er tir lousbech er ngii el lomerk. Ngdimlak a Ebangkelio er a Mateus el mora kmeed el 41 C.E. A bebil er a babilengel a Paulus a leliluches er a uchei er a bo lemerek el meluches a babier er a Rellir er a bekord el 61 C.E. Me nguaisei engdi tirka el Kristiano dimlak a personal copy er tir er a cherrungel el Biblia e dimlak a kakerous el babilengir el sebechir el mechei lobengterir a rechad el semeriar. E a uchei er a bo loltirakl er a Jesus a Rechijudea el Kristiano e te di ulerrenges aike el Bades el tekoi er a Hebru er a blil ongdibel er a Rechijudea. (2 Ko. 3:14-16) Engdi mo lmuut er tir me ngmle kirir el kerekikl el mesuub a bades e le te ulterekokl el di mle quote a bades el lousbech er a memory er tir.

⁷ Chelecha el taem e a ruumesingd er kid a oba personal copy er a Biblia me a betok el babier el mengai er a Bades. Kede meruul er a remo disaiplo e omerk er a ungil chais er a 240 el beluu el ngar er a betok el lomelekoi.

Mukrael er a Chedaol Reng

8, 9. (a) A chedaol reng ngrirelleterir a redisaiplo er a Jesus el mo meruul a ngerang? (b) Ngera ngoltobed a blak a rengul mesiou loeak a ngelsuil a chedaol reng?

⁸ A Jesus er a ledu er a redisaiplo er ngii me lebo lochotel e ngdilu er tir el kmo: “Sel le mer kemiu a Chedaol Reng, e ng mor ngii a klisichiu.” Ngoeak a ulekrolel a chedaol reng er a Dios el ngii a oureor el klisichel, e a rultirakl er a Jesus a sioning el mora beluulechad el rokir. Ngoeak a chedaol reng e a Petrus me a Paulus a ulemekungil er a resmecher, uleltobed er a remekngit el chelid, e dirrek el ullekiis er a rulekoad! Me nguaisei engdi a chedaol reng el lengiluu a mla er ngii a klou a ultutelel el moktek er ngii. Ngrirelleterir a rechapostol me a redisaiplo el mo sebechir el louchais er a melemalt el klemedengei el ngii a uchul a diak a ulebengelel el klengar el mora rechad.​—Jn. 17:3.

⁹ A sils er a Pentekost 33 C.E., e a redisaiplo er a Jesus a mlo sebechir el “melekoi a tekoi er a ngodech el beluu, el ikel le rirelleterir a Chedaol Reng el mo sebechir el melekoi.” Me ngmlo sebechir el “ouchais a mengasireng el tekoi el bla leruul a Dios.” (Rel. 2:1-4, 11) Kid a diak dolekoi a ngodech el lomelekoi loeak a mengasireng el rolel. Me nguaisei, engdi ngoeak a ngelsuil a chedaol reng e a blak a rengul mesiou a oltobed a babier el mengai er a Biblia el ngar er a betok el lomelekoi. El ua tiang, a bek el buil e te print a betok el miliol el copy er a A Ongkerongel me a Awake! e a website er kid er a jw.org oltobed a betok el babier me a video el mengai er a Biblia el ngar er a betok er a 1,000 el omelekoi. Aika el rokui a ngosukid el “ouchais a mengasireng el tekoi el bla leruul a Dios” el mora rechad er a bek el beluu, kebliil, me a omelekoi.​—Och. 7:9.

10. A 1989 el mei e ngngera mla meketmokl el kirel a oidel a Biblia?

¹⁰ A 1989 el mei e a blak a rengul mesiou a mla emphasize er a meruul er a New World Translation of the Holy Scriptures el ngar er a betok el omelekoi. Tia el Biblia mla tuobed el ngar er a betok er a 200 el omelekoi me a copy er ngii a bla le print el ngar er a betok er a 240 el miliol, e dirk betok a merael el mei. Ngdi ta el Dios me a chedaol reng er ngii a sebechel loterekeklii el kmo a Biblia a ngar ngii el kirir a rekmal betok el chad.

11. Ngmekera loliuid aika el babilenged?

¹¹ A ureor el loliuid a loruul a rebetok el telael el Kristiano el volunteer el ngar er a betok er a 150 el beluu. Ngkmal diak lemechas a rengud e le ngdiak a ngodech el cheldebechel er a beluulechad el lomekrael er ngii a chedaol reng el mo ungil merkii a klumech er a beluulechad el rokir el kirel a Jehovah el Dios, Mesias el King er ngii, me a Renged el mla meteketek er a eanged!​—Rel. 28:23.

12. Ngmilekera Paulus me a relmuut el bebil er a Rekristiano e meruul er a ureor el lomerk?

¹² A Paulus er a lomerk el mora Rechijudea me a Rechisentael er a Antiok er a Pisidia, e “tirke el rokui el rredemelel a diak a ulebengelel el klengar a mlo oumerang.” (Rel. 13:48, NW) A ulebongel er a babier er a Rellir e a Lukas a meluches el kmo a Paulus a “di chilolt e ka le mokebai el omerk ra rengedel a Dios.” (Rel. 28:31, BT) Ngika el apostol ngomerk er ker? Ngomerk er a Rom el capital er a renged luleba klisiich er a beluulechad! Tirka el mle kot el mo oltirakl er a Jesus ulemerk el loeak a ngelsuil me a ulekrolel a chedaol reng el locha ulemerk loeak a loltobed a cheldecheduch me a lmuut el bebil er a rolel.

Melemolem Alta Ngngar Ngii a Odechelakl

13. Ngera uchul me ngkired el meluluuch sel bo dechebangel a odechelakl?

¹³ A redisaiplo er a Jesus er a taem er a rechapostol er a bo lechebangel odechelakl e te milluluuch lolengit er a Jehovah me lebesterir a blekeu. Me ngngera dilubech? Te mlo mui er a chedaol reng e ngiluu a klisiich el mesaod a tekingel a Dios loba blekeu. (Rel. 4:18-31) Kid me kede dirrek el meluluuch lolengit er a llomeserreng me a klisiich el mo melemolem lomerk alta ngngar ngii odechelakl. (Jak. 1:2-8) Kid el Jehovah omekngeltengat er kid e olengeseu er kid loeak a chedaol reng er ngii, a uchul me kede melemolem lomerk. Ngdiak a sebechel stob er a ureor el lomerk, ngka el ultok me a ka lemeringel lodechelakl. Sel loldechelakl er kid e ngkmal kired el meluluuch lolengit er a chedaol reng me a llomeserreng me a blekeu el mo omerk er a ungil chais.​—Lk. 11:13.

14, 15. (a) Ngera dilubech er a lebo er ngii “odechelakl er ser a le mad a Stefanus”? (b) Te milekera rebetok el chad er a Siberia e mlo medengelii a klemerang er chelecha el taem er kid?

¹⁴ A Stefanus a mle blekeu lomerk er a uchei er a lokodir a recherrouel. (Rel. 6:5; 7:54-60) Sera leduubech a “meringel el lodechelakl” er tiakid el taem e a rokui el disaiplo ulebriid er a Judea me a Samaria te di mle rechapostol a kiei. Engdi tia dimlak leterebengii a ureor el lomerk. A Filip a mlora Samaria e “omerk ra Kristus el morar chad” me te mlo er ngii a rebeches el disaiplo. (Rel. 8:1-8, 14, 15, 25, BT) A Bades a dirrek louchais el kmo: “A re bebil er a ruumerang el ulebriid er odechelakl er ser a le mad a Stefanus a mlo mekelekelii a Fenisia, ma Siprus, ma Antiok el ouchais er a Ebangkelio el di mlor a rechad er a Judea e merekong. E mlarngii ar bebil er tir, el chad ra Siprus ma Kirene, ma le bocha ra Antiok e te dirrek el mlengedecheduch rar Chigriik lomerk ra evangkelio ra Rubak el Jesus el mor tir.” (Rel. 11:19, 20, BT) Me a odechelakl a uchul me nguleberk a klumech er a Renged er tiakid el taem.

¹⁵ Osisiu el tekoi a dilubech er sel mle Soviet Union. Tokubets er a chelsel aike el rak er a 1950 el rebetok el telael el Sioning er a Jehovah a mlodik el mora Siberia. Tir el ulebriid el mora kakerous el basio a uchul me a ungil chais a uleberk er tia el klou el beluu. Ngdimlak a rolel e tirka el betok el Sioning a sebechir el di tir el metik a udoud el mo merael el 6,000 el mael el mo omerk er a ungil chais! Me nguaisei engdi kabelment a ngiltiterir el mong. A ta el odam a dilu el kmo: “A rullab a derreder itir a uchul me ngmlo sebechir a rebetok el telael el bliochel a rengrir el chad er a Siberia el mo medengelii a klemerang.”

Mukngeltengat er a Jehovah

16, 17. A babier er a Rellir ngngera el sioko a lebeskid el kirel a klengeltengat er a Jehovah er a ureor el lomerk?

¹⁶ Ngbleketakl el kmo a Jehovah ulemekngeltengat er a rekot el Kristiano. A Paulus me a rebebil a millalem e melubs “ngdi Dios ingii ia uchul e ng merrael ngii el dellomel el mo klou.” (1 Ko. 3:5, 6) A babier er a Rellir a ochotii el kmo te di mirrael el mo betok e le Jehovah ulemekngeltengat er a ureor er a berkel a klumech. El ua tiang, a “tekingel a Dios a mengal uleberk, ma rultirakl er a Jesus el mlar a Jerusalem a mengal mlo betok.” (Rel. 6:7) A ureor er a berkel a klumech el uleberk a uchul me a “ongdibel er a Judea me a Galilea me a Samaria el rokui a siliseb er a taem er a budech, e meteketek. Me sera lorael el loltirakl er a omeluu er a Jehovah me a ngelsuil a chedaol reng, e ngdi mirrael el mo obdois.”​—Rel. 9:31, NW.

¹⁷ Me a Rechijudea me a rechad el millekoi a tekoi er a Grik er a Antiok er a Siria a rirengesii a klemerang er a resioning el kmal uleba blekeu. A Bades a kmo: “Me a lmuut kung, a chimal a Jehovah ulebengterir, me a rebetok a mlo oumerang e ulebult el mora Rubak.” (Rel. 11:21, NW) A Rellir a melekoi el kirel tia el mats el kmo: “A tekingel a Jehovah merrael el mo klou e menga el uleberk.” (Rel. 12:24, NW) E oeak a berkel a klumech er a Paulus me a relmuut el bebil el mora Rechisentael e a “tekingel a Jehovah uleberk el mo klou e mesisiich.”​—Rel. 19:20, NW.

18, 19. (a) Kede mekerang e medengei el kmo a “chimal a Jehovah” a obengked? (b) Mouchais er a ta er a example el lochotii el kmo a Jehovah olengeseu er a rechedal.

¹⁸ A “chimal a Jehovah” a kmal lobengked er chelecha el taem. Tiakid a uchul me te betok a mla mo oumerang e tuib a klengar er tir el mora Dios e metecholb. Me a lmuut kung, ngdi oeak a ngelsuil a Dios me a klengeltengat er ngii e ngsebeched el loutekangel a mesisiich el ultok e a lebebil e ngmeringel el lodechelakl, e melemolem lomerk er a klumech el ua lurruul er ngii a Paulus me a rekot el Kristiano. (Rel. 14:19-21) A Jehovah el Dios a blechoel lolengeseu er kid. A “diak a ulebengelel chimal” a diak bo lemekimd lolengeseu er kid er a chelsel a rokui el ringeled. (Dut. 33:27) E lak dobes el kmo ngngarbab el ngklel a Jehovah a uchul me ngdiak bo lechititerir a rechedal.​—1 Sa. 12:22, NW; Psa. 94:14.

¹⁹ Tia ta er a olechotel: A Brother Harald Abt a luldureklii a re Nazi el mora Sachsenhausen concentration camp er a temel a Ongeru el Mekemad lengii el dimlak el stob el lomerk. E a May 1942 e a rebulis a mlora blil e arrest er a bechil er a Elsa e nguu a kekerei el ngelekir el redil. A Elsa a luldureklii el mora kakerous el kiamp. A Sister Abt a kmo: “Aike el betok el rak el kngar er aike el camp er a Dois a ulsisecheklak er a kmal klou a ultutelel el tekoi. A chedaol reng er a Jehovah a kmal sebechel smisichau sel omchelebangel a kmal meringel el ringel! Uchei er ak mengai el mo kelebus e ak chiliuii a babilengel a odos el dilu el kmo sel omchelebangel er a kmal meringel el ringel e a chedaol reng er a Jehovah a meskau a chelellakl el reng. A kulemdasu el kmo ngdi milenglou a tekingel. Engdi sera bo kchebangel a ringel e ak mlo medengei el kmo a tekingel a kmal klemerang. Ngmera el mlo uaisei. Ngmeringel er kid a luchesii er a uldesued a lsekum e ngdirkak de experience er ngii. Engdi ngmera el dilubech el mei er ngak.”

Molemolem el Lomerk er a Klumech!

20. Ngera ngmirruul er ngii a Paulus er a lekelebus er a blil, e tia ngmekera sebechel melisiich er a rebebil el odam me a odos?

²⁰ A ulebengelel a babier er a Rellir a melekoi el kmo a Paulus a mle blak a rengul el “omerk ra rengedel a Dios.” (Rel. 28:31, BT) Ngii el mle kelebus er a blil a uchul me ngdimlak el sebechel loldingel obliil. Me nguaisei engdi ngmillemolem el lomerk el mo er tirke el mle er ngii. Chelecha el taem e a rebebil er a rudam me a rudos er kid a diak el sebechir el tobed er a blirir e locha di dengarech me a lechub e te kiei a nursing home e le te mechudelang, ngar ngii a secherir, me a lechub e ngchelitechetul a bedengir. Me nguaisei engdi a bltkil a rengrir el mora Dios me a urungulir el mo ungil merkii a klumech a lmuut el mesisiich er a uchelel. Kede meluluuch el kirir e dirrek el sebeched el meluluuch lolengit er a Jehovah me lerelleterir el mo meet er a rechad el sorir el mo medengelii ngii me a moktek er ngii.

21. Ngera uchul me ngkired el lomerk er a klumech loba orechudel el reng?

²¹ A ruumesingd er kid a sebechir el loldingel obliil e meruul aike el lmuut el bebil er a rolel e kede omerk er a klumech. Mada rederta er kid loruul aike el rokui el sebechel el mo otutii a ngerecheled el lomerk er a klumech er a Renged, e olengeseu el mo ungil merkii a klumech el mora “bek el beluu er a beluulchad.” Tia el lureor a kired el meruul er ngii loba orechudel el reng e le “olechotel” a demiel a Kristus a bleketakl el mues. (Mt. 24:3-14) Ngmochu diak a taem. Chelechang e “doitel a klisiched el rokui el mo blak a rengud er a urerel a Rubak.”​—1 Ko. 15:58, NW.

22. Chelecha el dongiil er a sils er a Jehovah e ngngera kired el rullii er a rengud el mo meruul er ngii?

²² Chelecha el dongiil er a “klou e kdekudel sils er a RUBAK” e derellii er a rengud el mo melemolem loba blekeu el mo ungil merkii a klumech. (Joel 2:31) Ngdirk sebeched el metik er a rebetok el uai a rechad er a Berea el tir a “mle blak a rengrir el orrenges a osisechakl.” (Rel. 17:10, 11) Mada bo dungil merkii a klumech el dimerekmo ua denguu a tekoi el kmo: “Ng ungil a urerem, kau el ungil e blak a rengum el mesiou!” (Mt. 25:23) A lsekum e kede blak a rengud el meruul er a part er kid er tia el ureor er a omeruul el disaiplo e oba blakerreng el mora Jehovah, e ngmera el mo dmeu a rengud el mo cherechar le kede uleba chetengakl el techall el mlo ungil merkii a klumech er a Rengedel a Dios!