4 EL SUOBEL

Ngera Uchul Me Aki Mirruul er a Beches el Oidel a Biblia?

Sel kot el New World Translation of the Holy Scriptures el mlotobed

Rechad el omes er a New World Translation of the Holy Scriptures er a beluu er a Congo (Kinshasa) — Congo (Kinshasa)

A New World Translation of the Holy Scriptures el mlotobed er a beluu er a Rwanda — Rwanda

A Symmachus fragment el ngar er ngii a ngklel a Dios er ngii — Symmachus fragment el olecholt er a ngklel a Dios el ngar er a Psalm 69:31, el mirruul er a bekord el 300 me a lechub e ng 400 el rak er a uriul er a Kristus.

A Resioning er a Jehovah a uluusbech e uleltobed e mirrous a kakerous el oidel a Biblia el kemanget el taem. Engdi aki milsang el kmo ngusbechall a beches el oidel a Biblia el mo ngosuterir a rechad me “bo lodengelii a klemerang,” e tiang a soal a Dios el kirir a rokui el chad. (1 Timothy 2:3, 4) Me sera 1950, e aki ulemuchel el oltobed a dertelkib er tia el Biblia er kemam el New World Translation. Tia el Biblia a mla moiuid el ngar er a melemalt el rolel el kuk betok er a 130 el omelekoi.a

Ngmle usbechall a Biblia el beot a bo dodengelii. A cherengel a taem e ngsebechel el mengodech a omelekoi me a betok el oidel a Biblia a ousbech a tekoi el diak a rechad el medengei me a lechub e ngdikea lousbech. Me a lmuut el tang, a babier er a irechar a bla lebetik el ngii a kmeed el osisiu a tekoi er ngii me aike el kot el omelechesel a Biblia, el ngosukid el mo ungil el medengei a belkul aike el tekoi er a Biblia el ngar er a Hebru, Aramaic, me a Grik.

Ngmle usbechall a Biblia el uleltirakl er a tekingel a Dios. A ruliuid er a Biblia a kirir el oltirakl er a kot el omelechesel er a bai lolodech a mlukreng el tekingel a Dios. Nguaisei, engdi a oumesingd el oidel a Biblia a diak lousbech er a chedaol el ngakl el Jehovah.

Ngmle usbechall a Biblia el mo oldanges er Ngike el Milluches er ngii. (2 Timothy 3:16) A Biblia el New World Translation a ousbech er tia el ngakl el Jehovah el bekord el 7,000 el taem el oltirakl aike el Biblia er a irechar, el ua lemocholt er tia el siasing el ngariou. (Exodus 3:14, 15, momes er a footnote) Me a uriul er a betok el rak el lorriter e longetmokl er tia el Biblia, e ngkmal dmeu a rengud el menguiu er ngii e le ngbleketakl el olecholt er a uldesuel a Dios. Me a lengar er ngii a New World Translation er a omelekingem me a lak, e aki melisiich er kau el mo blechoel el menguiu er a Tekingel a Jehovah er a bek el sils.—Josua 1:8; Psalm 1:2, 3.

Ngera uchul me aki ulemdasu el kmo a beches el oidel a Biblia a mle usbechall?
Ngera kirel a chad el meruul er ngii er a bek el sils a lsekum e ngsoal el mo medengei a soal a Dios?

a Ngdirkak el lebo er ngii a New World Translation el tekoi er a Belau. Engdi, ngsebechem el ngmai a klungiolem er ngii el ngar er a bebil er a omelekoi.