26 EL SUOBEL

Ngmekerang Aki Molengeseu el Mengetmokl er a Blil a Ongdibel er Kemam?

A Resioning er a Jehovah el mengetmokl er a Blil a Ongdibel er tir el ngar er a Estonia — Estonia

A Resioning er a Jehovah el mengetmokl er a Blil a Ongdibel er tir el ngar er a Zimbabwe — Zimbabwe

A ta er a Sioning er a Jehovah el omtechei aike el kirel el utechioll er a Blil a Ongdibel er a Mongolia — Mongolia

A ta er a Sioning er a Jehovah el mengesbereber er a Blil a Ongdibel er a Puerto Rico — Puerto Rico

A bek el Blil a Ongdibel er a Resioning er a Jehovah a olecholt er a chedaol el ngklel a Dios. Me a leuaisei, e aki melatk el kmo ngklou a ultutelel el kirel a omengull er kemam, e kmal lungil el techall aki mobang sel ki molengeseu el mengetmokl er a blil a ongdibel me di el kltmokl e lungil er a ues. Me a rokui el chad a sebechir el mo olengeseu el mengetmokl.

Aki olengeseu el mengetmokl er a uriul er a miting. A uriul er a bek el miting, e a rudam me a rudos a mengetmokl er a Blil a Ongdibel. Ngar er ngii a klou el omengetmokl er a Blil a Ongdibel er a bek el sandei. A ta er a remechuodel me a lechub e ngodam el mesiou er a ongdibel a omekrael er a ureor el oltirakl er a babier el mesaod aike el ureor el kirel el ruoll. A rederta el chad a sebechir el meriik, e melemed, me a lechub e te vacuum, e melemed aike el ngar er ngii a hokori, e omechobech a kingall, e melatech a benjo, e melemed a mado me a dirk, e mengoit a komi, me a lechub e te mengetmokl er a mekesokes, el oltirakl aike el kirel meketmokl. A lekesengil e ngta er a ta el rak el ngar er ngii a klou el omengetmokl. Me sel ki bechititerir a rengelekam me lolengeseu el oureor, e aki olisechakl er tir el mo olecholt a omengull el kirel a Blil a Ongdibel.—Olisechakl 5:1.

Olengeseu el meruul aike el kirel el ruoll. A bek el rak, e ngngar er ngii a omerriter el kirel a oketmeklel a chelsel me a ikrel a Blil a Ongdibel. Ngoeak tia el omerriter, e ngblechoel el ngar er ngii a ureor el mengetmokl er a blil a ongdibel me lak lebo er ngii a klou el telemellel el mo uchul a chitel a udoud. (2 Kronika 24:13; 34:10) A ungil el kltmokl el Blil a Ongdibel a mekreos el basio el kirel a omengull el mo er a Dios. Me sel ki mteloi er tia el ureor, e aki olecholt el kmo ngbetik a rengmam er a Jehovah me a blil a omengull er ngii. (Psalm 122:1) Tiang a dirrek el mo uchul a ungil el ocholt el mo er a buai.—2 Korinth 6:3.

Ngera uchul me aki blechoel el mengetmokl er a blil a omengull er kemam?
Ngera el tekoi a kirel el ruoll me di lolemolem el kltmokl a Blil a Ongdibel?