A David a Dimlak el Medakt

Ke mo mekerang sel obo medakt?— Ke locha mo er a delam me a demam el olengit a ngesou. Engdi ngar er ngii a kuk ta er a chad el sebechel el ngosukau. Ngii a lmuut el mesisiich er a ngii di el chad. Ke medengei el kmo ngtechang?— Ochoi, ng Jehovah el Dios. Ka me bo dosaod el kirel a ta er a kekerei el chad er a Biblia el ngklel a David. Ngmle medengei el kmo a Jehovah a blechoel el olengeseu er ngii me ngdimlak el medakt.

Sel taem er a dirk el tolechoi a David, e a demal me a delal a ullisechakl er ngii el mo betik a rengul er a Jehovah. Tiang a ngilsuir a David el mo diak el medakt el mo lmuut er a ledubech a kdekudel el tekoi el mo er ngii. Ngmle medengei el kmo, a Jehovah a mle Sechelil e sebechel el ngosuir. A ta el taem er a lomes a sib a David, e a ta er a klou el laion a mlei el mengchii a ta er aika el sib! Ke medengei el kmo ngmilekerang a David? Ngultirii a laion e mekodir el di olab a chimal! E a kuma er a lodelecheklii a sib, e a David a dirrek el milekodir! Omomdasu e ngtechang a ngilsuir a David?— Ochoi, ngmle Jehovah.

Ngmla er ngii a lmuut el ta er a taem el David a mle ileakl el bekeu. A rechad er a Israel a mlo oumekemad er a rechad er a Filistia. A ta er tirka el soldau er a Filistia a kmal mle imis el metongakl el chad, ngmle mekoar el chad! A ngklel a mle Goliath. Ngika el mekoar el chad a ulemekako er a resoldau er a Israel me a Jehovah. A Goliath a milsemai er a resoldau er a Israel el me oldechelakl er ngii. Engdi a rokui el chad er a Israel a mle imis el medakt el mo oldechelakl er ngii. Me a David er a lerenges aika el chisir, e ngdilu er a Goliath el kmo: ‘Ak mo oldechelakl er kau! A Jehovah a mo ngosukak, me ak mo mesisiich er kau!’ Omomdasu e a David ngmle bekeu?— Ochoi, ngkmal mle imis el bekeu. Ngsoam el mo medengei el kmo ngera dilubech er a uriul?

A David a ngiluu a belechel me a kleim el meaiu el bad, e mirrael el mo oldechelakl er ngika el mekoar el chad. Me a Goliath er a lesang el kmo ngkmal mle kekerei el chad a David e ngulemekako er ngii. Engdi a David a dilu er ngii el kmo: ‘Kau a mei el oba saider, engdi ngak a ekong el oba ngklel a RUBAK!’ E ngiluu a bad el loiang er a belechel e rirurt el mo er a Goliath, e ulemalech el melemalt el kirel a medal. Me a bad a silbechii er a medal a bdelul! Me ngika el mekoar el chad a miltilech er a chutem el mad! Me a rechad er a Filistia a kmal mlo medakt me te rokui el di chiliis. Ngmilekerang e a kekerei el chad el ua David e mlo sebechel el mo mesisiich er a mekoar el chad?— A Jehovah a ngilsuir, e le Jehovah a lmuut el kmal klou a klisichel er ngika el mekoar el chad!

Ngera sebechem el suubii er a cheldechedechal a David?— A Jehovah a lmuut el klou a klisichel er a ngii di el chad. E ngii a Sechelim. Me a lsekum ke lmuut el mo medakt, e molatk el kmo, a Jehovah a sebechel el ngosukau el mo bekeu!