A Josia a Mla er Ngii a Rungil el Sechelil

Omomdasu e ngmeringel a doruul a melemalt el tekoi?— A ruumesingd el chad a omdasu el kmo nguaisei. A Biblia a ouchais er kid el kmo ngmle ileakl el meringel er a buik el ngklel a Josia el meruul a melemalt el tekoi. Engdi ngmla er ngii a rungil el sechelil el ngilsuir. Ka me bo dosuub a lmuut el betok el kirel a Josia me a resechelil.

A demal a Josia a mle Amon, el king er a Juda. A Amon a kmal mle mekngit a blekerdelel e milengull a bleob el chelid. Sera lemad a demal, e a Josia a mlo king er a Juda. Engdi ngii a di mle eai a rekil. Omomdasu e ngmle mekngit a blekerdelel el ua demal?— Ngdiak, ngdimlak el ua demal!

A Josia er sera lekekerei el ngalek, e ngmle soal el olengesenges er a Jehovah. Me ngmillilt er a resechelil el tirke el chad el betik a rengrir er a Jehovah. E tir a ngilsuir a Josia el mo meruul a melemalt el tekoi. Te rua techang a rebebil el sechelil a Josia?

A ta er a resechelil a mle Sefania. A Sefania a mle profet el milengelechel er a rechad er a Juda el kmo a mekngit el tekoi a mo duubech el mo er tir a lsekum te mengull a bleob el chelid. A Josia a ulerrenges er a Sefania e milengull er a Jehovah, el diak el bleob el chelid.

A kuk ta er a sechelil a Josia a mle Jeremia. Ngmle kmeed el osisiu a rekrir e kiliei el kaiuekeed er sera lemekekerei el mo meklou. Te kmal mle ungil el kausechelei me sera lemad a Josia, e a Jeremia a lilechesii a ileakl el chelitakl er a klengiterreng el kirel. A Jeremia me a Josia a mle kaingeseu er a delongelir el mo meruul a melemalt el tekoi e mo olengesenges er a Jehovah.

Ngera sebechem el suubii er a kerebai er a Josia?— A Josia er sera lekekerei el buik, e ngmle soal el meruul a melemalt el tekoi. Ngmle medengei el kmo ngkirir a resechelil el di tirke el chad el betik a rengrir er a Jehovah. Mada bo molilt er a resechelim el tir a betik a rengrir er a Jehovah e sebechir el ngosukau el mo meruul a melemalt el tekoi!